COVID-19 Humpi kua sungah Topa’ vantungmi tawh ~ Dr. Dongno

COVID-19 Humpi kua sungah Topa’ vantungmi tawh ~ Dr. Dongno

COVID-19 kici, coronavirus pandemic pulnatna-in 2019, December kha-in Sen gam Wuhan khuapi pan ong kipan khia hi. Azawng, ahau kuamah zah lo-in leitung mun khempeuh ah ong kizeel aa atuntunna gam ah gam makaite nasiatakin patau, linglawngin, hih natna bangci bawl ding, bangci kidal ding cih sum-leh-pai tampi bei-in hanciam uh hi. Leitung Cidamna Kipawlna, WHO in zong ahithei bangin cinate kikep nading leh akilawh loh nading zehtan ding thukhun taangkona nei hi.

Hih virus pen i pau, i khuh leh i hetchei ciangin droplets, cil sung ah virus om aa tua pan khat leh khat kilawh hi. Na khat pepeuh tung atukna lawng kha-in tua tawh i mit, i kam, i nak i lawnna panin zong kilawh hi. I kam sung pan gil sung ah valh lehang phamawh lo hi. Kam sung pan ahi zongin nak pan diik kha-in tuap sung atun ciangin natna apiang ahi hi.

A masa-in, cisa tua ciangin khaksawh om lo-in khuh aa, gawl sung na, thazaw, thei-in cisa kahto aa asawt ciangin nak hak sa-in huih kham zo lo-in ICU ah oxygen diikna ventilator zat kul hi. Hih pan hoih kik lo-in suuk semsem leh sih tawh kizom ta hi.

Hih coronavirus natna pen a om ngei nai lo natna thak khat ahih manin, kibawl nading zatui om lo hi. Tua ahih ciangin tu tadihin hih natna athuakte ading ahi thei zahin noptuamna angah nading ciang bek kibawl thei hi. Tu-in a dam nading zatui America, France, Israel, Australia, gam tuamtuam ah nasiatakin zong uh aa asawt lo-in kingah ding lametna lianpi om hi. Tua baan ah kidal kholh nading, vaccine zong nakpitakin ki hanciamin tu-in potential 83 bang kimu khin ta hi.

Tua zatui akingah masiah, khat-khit-khat kilawh loh ding athupipenpen ahi hi. Tua ahih manin, mi khat tung ah hih natna lungno akimuh ciangin thakhatin zato ah kipuak pah in ki tuam kep hi. Cina pa/nu tawh aki sukha mite a inn ciat uah nipi nih sung vak khia sak lo-in ki-en cik hi. Inn ciat ah om ding, mihon peel ding maituam thuah ding leh khat-leh-khat pi 6 bang ki hal ding, khut kilen lo ding, khut sawp zeelzeel ding aa mai khawng lawnglawng lo dingin zehtan ding thupi hi. Na ci asat aa na khuh leh anaipen zato ah kilak pah ding hoih hi. Hih natna tawh leitung ah nisimin a tultulin kisi ziahziah aa America gam ah tam sipenin tuni dong New York khuapi ah asi tampen hi.

Ei Kawlgam ah 2020 March kha sungin coronavirus natna ong tung hi. America pan aa ong zin, zi nei ding tangval hoih Khaisan Tedim gam, Kapteel khua atun ciangin hih natna angahna ong kilang aa testing akibawl ciangin Mar 23, 2020 ni-in coronavirus kimu ahih manin Kawl gam bup ah amasapen COVID-19 cina-in kiciamte hi. Tedim zato ah ki tuamkoih, quarantined pah hi. Ataktakin, Kawlgam ah testing hihna van kicing lo-in ki bawl kim zo lo ahih manin hih a masapen ong suak hi. Mipi testing kibawl hi leh, gentehna-in Mandalay ah Wuhan khuapi pan nisimin vanleng tamveipi ong tu ahih ciangin, hih pen amasapen hi khol lo thei kha ding hi.

Hih COVID-19 cinate kikep nading innkhan atuam kisam aa, 24/7 etcing gige ding kul hi. Siahuan, siamah, zato nasem kicing leh oxygen diik set, ventilator kigingsa-in om ding aa electricity hoihtak aki-ngahna District Zatopi ah kipuak ding ahi hi.. Ahih hangin Falam Zatopi ah cina pa puak ding deih lo-in hluttaw dong ah nial uh hi.

Hih pen tu 21st century hun adingin, a tualniam ngaihsutna, kideidanna ahih khak ding adahhuai thu khat ahi hi. Cidamna lam, health thu athei lopi, layman mawkmawk, aa-naa nei khatin anial ahih leh hih akilawh thei natna, tung ah ama thuneih nang om lo hi. Health-te a dot ding hi.

Siahuanpi pa-in saang lo ahih leh, kum sawtpi zato lam asin zawh ciangin, cina abawl theih nadingin, “kuamah deidan lo, natna deidan lo-in ka siam tawpin cinate ka bawl ding hi” ci-in Physician’s Oath, kiciamna aneih khit ciang bekin lukhu-nelkai kikhu sakin, letmat laipi kipia pan ahih ciangin tua akiciamna apalsat suak ding hi. Hih bang natna Zato van akicinzawkna ah kisaang lo cih pen Human Right violation ahi hi.

Tu-in zato van, electric leh atuamtuam akicin lohna Tedim zato ah, kikem hi. Hih natna pen nasia semsem thei aa sun-leh-zan ventilator zang lo ding kici thei lo hi. Tua hileh Tedim zato ah a si ding ahi hi.

Falam Divisional Hospital pen Falamte aituam Zato hi lo hi. Division ai ding aa ong kipia hi aa, Falam pen a-omna amun bek ahi hi. Amau thuneih nang om tuan lo hi. Amau mah bangin akibangin Tedimte Zato zong ahi hi. Tonzangte Zato zong ahi hi. Cina mikhempeuhte Zato ahi hi. Banghangin i Zato ah i cina ong nial uh hiam?

Nidang lai pekpekin hibang pandemic , pulnatna om ciangin khua khat leh khua khat daai kikai-in khua sung ah mi lut ding ki phal lo ngei mah hi. Tua hun lai-in zatui om lo, zato om lo-in, adiakdiakin pulnatnate, lungno, virus/ bacteria hang ahih lam kithei lo ahih ciangin, “dawi-sia, kau-sia” nei akisak lai, tribal hun lai ahi hi.

Tua bek hi lo-in Tedim ah veeng khatin ni 3 in electricity mei nai 2 sung bek kingah hi napi Pyi-ne Sipyin vuangyi U Soe Htet-in nai 13 sung akingah bangin gen aa, mei set adingin zong kha simin, Ks 325,000 kipia hi ci-in gen lai hi. Hih sum ong kipia takpi ahih leh banghangin mei kicing lo hiam? Tu laitakin dot ding hun hoih khat ahi hi. I gam makai i muan MP-te, AD, Myo-mi/ba, ZYA, CSO-te’n ong phut ding uh i ngak hi.

Hih thute i ngaihsut ciangin Jerusalem pan Jericho aa pai damiahte bawlsiat, akisuam, akinusia pa huh lo aa, a paisan Siampi pa leh Levite ong phawk sak hi. Atung aa i gensa mah bangin, hih natna pen, ICU aa kikoih ding akul thei natna ahi hi. Ahih hangin asi dingin zato van kicin lohna, mei kingah lohna Tedim zato ah, kinusia hi.

Hallelujah! Topa Min thang tahen. Good Samaritan ei tawh om hi. I To Zeisu-in ong don, ong khoi, ong kem ahih manin Tedim aa COVID-19 avei cinate-in tua natna aneih lam uh zong phawk lo-in bangmah ci lo uh hi. Kumpi Darius-in Daniel humpi nelkai kua sung ah akhiat ciangin, Pasianin a vantungmi pai sak aa humpite kam ahuk sak mah bangin, coronavirus pulnatna lungkhamna kuam thukpi, Tedim zato isolation khan sung ah Topa tawh om khawm uh ahih manin, a vantungmite-in virus humcip sakin bangmah thuak lo uh hi.

Thamaangin, vitamin kipia lai ahih ciangin, ankam lim, thau tiuteu-in cii-zol pingpengin om uh hi. Hih pen alamdang mahmah khat ahi hi. Topa hoih hi. Tu-in quarantine sung aa kikoihte hitaleh innciat isolation, locked down aa omte zong cidamtak leh suak tatakin pusuak khia thei baih ta ding uh hi.

Hih COVID-19 hangin nekding dawn ding haksatna athuakte adingin huhna zong alamdangin, mimal ahi zongin, kipawlna, biakna lampan leh kumpi-in hithei zahin kipia hi. Huhna apia, khat ciat tung ah ni khat ni ciangin Topa-in, “Ka ci anat lai takin nong khoi hi.” (Mat.25:36) ong ci ding hi. Lungdamhuai hi.

Hih natna hangin, Tedimte ong kilipkhapin ong kigimneih kha thei lai ding hi. Hih natna pen alauhuai natna himah hi; ahih hangin, akihhuai natna, azumhuai natna hi lo hi. Leitung ah akizahtakpenpen, England Kumpinu’ tapa, Prince Charles in zong hih natna ngah hi. England gam Ukpa, British Prime Minister Boris Johnson in zong ngah hi.

Australia ah zong Home minister Petter Dutton in zong ngahin, Israel gam Prime Minister Benjamin Netanyahu in zong ngah hi. Leitung aa minthang vangvang, Hollywood zohshin menta, Actors-te lak aa mingthangpen khat ahi, Tom Hank in zong ngah hi. A vek un dam kik zo uh hi. Mi mawkmawk ahi liai lote-in zong angah natna ahi hi. Maizum nading, thanem nading bangmah om lo hi.

COVID-19 natna angah i sanggamte ong nial Falam Zatopi ah Tedimmi (Zomi) Civil Surgeon, Si-yong Ohk-Gyi, nih ahi Dr Song Za Tual, leh Bone Specialist Dr Kam Za Dal-te ban ah Anaesthetist Dr Thomas Sian Za Kham, Dr Thang Cin Mang (a nung ciangin Child Specialist), Dr Huat Za Mang ( anung ciangin Surgeon) leh Dr J. Suan Za Dong, Eye Specialist-te-in a pilna, asiamna uh siit lo-in kum sawtpi, sem ngei ciat uh hi. Falam nuam sa-in a mite-in zong it uh hi. Kei 1980-1988 kum giat ka om sungin zong ka lungkim zahin deihsakna tawh hih Zatopi ah ka sem hi. Dr J Suan Za Dong