COVID-19 Delta News Update: August 04, 2021
US gam sung Covid-19 din mun: Tulai tak leitungbup ah hong kizel kik Covid-19 Delta variant natna pen USA gam sungah ah zong natna ngah thak Thein khat (100,000) val hong khang kik ahih manin alahuai dinmun ah hong tung kik aa, US gam sungah tu nipi sung natna ngah thak leh asi anuai aa bangin kimu thei hi.
- ~ August 03, 2021: Natna ngah thak – 104,758; Asi – 516
- ~ August 02, 2021: Natna ngah thak – 76,371; Asi – 263
- ~ August 01, 2021: Natna ngah thak – 76,680; Asi – 213
Covid-19 natna pen nungkum natna akhang pen kha te bangin hong khang kik ahi hi. Abeisa ah I gen zel mah bangin natna ngah thak akibehlap atamzaw pen Covid-19 vaccine asun nailo te leh Dose khat vei bek asun pan te na hi uh hi. Tua ahih manin vaccine sun nailo te aman lang thei thei in sun tek ni.
Leitungbup Covid-19 case 200 million pha ta:
Leitung gambup Covid-19 natna ngah (New Global Covid-19 cases) pen 200 million cing ta hi ci in World Health Organization (WHO) in taangko khia hi. Tulai tak natna kilawh a nasia mahmah Covid-19 natna nam ahi Delta Variant natna pen gam 135 ah kimu ta aa, Alpha variant pen gam 182 leh Beta variant pen gam 132 ah kimu ta hi.
US ah naupang te tung Covid-19 kimu khang:
Nung nipi sung US gam sung teng ah naupang kum 18 nuai siah 72,000 te in Covid-19 natna ngah uh aa, 84% khang hi ci in Naupang Siavuan te kipawlna ahi Pediatricians group ten genkhia uh hi. July 22 pan July 29 sung bek bek in naupang natna ngah 717,26 khang ci uh hi. Covid-19 pandemic kipat zawh pan tuni ciang dong US gam ah naupang 4.2 million in Covid-19 natna ngah (positive) hi ci uh hi.
US ah in-class sang teng kihong kik ding:
US gam State atam zaw ah naupang te Sang kihong kik ta dingaa, avekpi phial in sang mah ah kah (in-class) ding uh hi ci uh hi. Ahi zongin Covid-19 Delta variant hong khang kik ahih manin Sangnaupang khempeuh maituam (Mask) thuah sak ciat ding hanthohna nei uh aa, mun pawl khat ah Mask policy zat ding taangko khia uh hi.
US Covid-19 case atam zaw Delta variant hi ta:
US gam sungah Covid-19 natna ngah thak 93% pen tulai tak aminthang Covid-19 Delta variant lungno hi ta hi ci in the US Centers for Disease Control and Prevention (CDC) in genkhia uh hi. Adiak diak in Iowa, Kansas, Missouri and Nebraska state teng ah Delta variant lungno pen 98% khang hi ci hi.
Kumpi Nasem te leh Covid-19 vaccine:
Abeisa hun in President Biden in Federal kumpi nasem (Federal employee) khempeuh Covid-19 vaccine sun tei tei ding thu taangkona aneih khit zawh ciang State leh Local kumpi ten zong Kumpi nasem te vaccine sut tei tei ding thu piakna nei uh hi. Virginia State sungaa om City employee khempeuh in zong Covid-19 vaccine sut ding kisam hamtang hi ci in Richmond, Virginia, Mayor Levar Stoney in taangko khia aa, nasep hong kuan te in Vaccine sun khin hi cih proof na kilak tek ding hi ci hi.
White House ah US surgeon generals te meeting sam:
US gam sungah Covid-19 Delta natna khang tek tek na tawh kizui in White House Covid-19 response team in abeisa hun aa US Surgeon General asemsa teng khempeuh White House ah sam in meeting neih pih ci hi hi. Tua lak ah Surgeon General lui te ahi Dr. Antonia Novello, Dr. Joycelyn Elders, Dr. David Satcher, Dr. Richard Carmona, Dr. Regina Benjamin and Dr. Jerome Adams cih te zong kah uh ci uh aa, tulai tak Covid-19 natna dal zawh ding tawh kisai thu kikupna nei uh ci uh hi.
Mai nipi 4 sung Covid-19 natna khang sem sem lai ding:
US gam sungah hong tung ding nipi 4 sung Covid-19 natna khang sem sem lai ding hi ci in US Centers for Disease Control and Prevention (CDC) in taangko khia uh hi. Tu kha bei ma in natna ngah thak 6700 pan 24000 khang thei ding hi ci in CDC in ummawh uh ahih manin akua mapeuh ciah leh kuan kidawp ding thupi mahmah ding hi.
More: Ih Kiging khol hiam? ~ Thomas Mung
Illinois state in maituam policy laih kik:
US gam sungah Covid-19 natna hong khan mahmah kik na hangin Illinois state Sang khempueh ah maituam (mask) thuah kik tei tei ding hi ci in Illinois Gov. J.B. Pritzker in taangko khia hi. College, University pan kipan Pre-K, K-12 sang khempeuh kihel hi ci in genkhia hi. Ref: Fox News, CNN, CDC, Worldometers, Thomas On Sian Mung (Thomas Mung Guite) Washington D.C August 04, 2021. MOMNO Media & Museum
Comment piaknop aomleh...