Coronavirus na ngahphial zongin nasi keiding hi ~ Khawm Pau

Coronavirus na ngahphial zongin nasi keiding hi ~ Khawm Pau

Tulai tak in aminthang mahmah mipil misiam kumpi te na ngawn alinglawngsakzo coronavirus Convid-19 kici natna hang in kanuntakna ah katuahkhak Zeisu hoihna khattawh thalakhawm leng ut ing. 1999 Kum Kawlpi kasangkah laitak in ikawlgam khangtolo ihihman lungno min kiphuaktheilo Sungpai zavaat akicipong natna laang mahmah a, tua natna angahte kikhoingam nawnlo zahdong in om in misi nisim luangnih luangthum kivui ziahziah in natna ngahkhakding kilung patau mahmah hi.

Tua hun laitak peen Topa sung ah kathalawp mahmah hunsung hi a kidop theihzah in kidawm in ahizong hih natna kangahzong in kasikeiding hi cih khamuanna khat kasung ah om hi. Ahang in ka biak kaneih Zeisu pen natna namkim adamsakpa bekthamlo in misi nangawn athosakkik theipa hi cih upna kasung ah om hi. Kakhamuandiakna Laisiangtho peen Luka 17:11-19 na sung hi.

Jesuh in Miphak Sawm Damsak

11 Jerusalem khua manawhin Jesuh a pai laitakin Samaria le Galilee gam kikal tawnin a pai hi. 12 Khuaneu khatah a lut dektak laitakin miphak sawm in a dawntuah uh hi. Jesuh tawh a kigamla munah ding uh a, 13 nakpitakin kiko-in, “Topa Jesuh aw, kote hong hehpih in,” a ci uh hi. 14 Jesuh in amaute a muh ciangin, “Pai unla siampite va kivelsak un,” a ci hi. Amaute a va pai uh ciangin lamkalah a dam uh hi. 15 Amaute sung panin a damlam a kitheih ciangin khat hong lehtai kik a, nakpitakin Pasian a phat hi. 16 Tua ciangin Jesuh’ khe mai-ah bokin a lungdamna a ko hi. Hih mipa pen Samaria mi ahi hi.

Zingsangkhat sangkahding tho in zingtung ann kaneekkhit phet ka thungpi man in innnuai katuahsuk leh ka awk ongsuakziau in restroom kapai leh tui bekbek kalu kataw ah leeng in inntung kahkik zonawnlo in kabawkcip hi. Ni ongkaai ciang limlangh ah ka ki et leh kamit te nathuk in kaguhbekphial cianta hi. Atawpna ah kamit mang in khua kamunawn kei a, mite pauna aw zong amal kitelnawnlo in khua kazanawnkei hi. Kalungsim tawngpan Miphaak-10 te adamsakkik ka Pasian aw kei ongdamsakkik in kasepnop tampi omlai hi ci in lungsimtawng ah thu kangen hi. Mikhempeuh in asiding in onglamkhin uha lungnopnading ci in zato ongpuak uhhi.

Zingsang kakhanlawh ciang Kawlpi zato nahimawk in kakiim kapaam ah keidan damlo vive zato innpualam luipang ah nakigualsuk zihziah a khua muthei kahihman in aw adam kahimawk a ci in Pasian min kaphat hi. Ni-3 sung zato ah kalup khitciang inn ciahthei in Biak Inn ah Teci panding bekbek kalungsim ah om in lawplua kahihman in ann zong kanezokei phial hi. Topan minthan khempeuh tangtawntung ta hen!

Leitung in siatna lam manawh toto a nat leh sat thutuamtuam ong tamtoto tading hi. Ikidoptheihzah in ikidawmdinh a ahizong in nat le sat khat ituahphial leh zong eite Biak Pasian peen natna namkim pan ongdamsaktheipa, misisa athokiksak pa hi cih upna nei in khamungtak a Zeisu tung ah ikingakding kihanthawn nuam hihang. Topan minthan na ngahta hen! Thang Khawm Pauzomi