Coronavirus tawh kisai Kalaymyo kuam ading ZYA pan zaksakna

Corona virus (COVID-19) tawh kisai Kalaymyo kuam ading ZYA pan zaksakna

1. Muanmawh huai mite (Kawl/Zomi kihel gai) kikep na mun pen Kawl phonggyi sangte ah kizang in dim kawikawi pianta hi. Hih ading Zomi biakinn huang or biakna zumte zat theih ding kigin kholhsa in omthei leh. Zattheih ding aki phal i omle ZYA zumah kizasak ding hihang.

2. Cisa, bukkhuh, gawlna le thabei cihdan in na omle bangmah zumhuai hetlo a aman lang in kikepna phualte ah ki ap zaw in. Na ki ipsim na in mi tampi lawhzaw thei ahih manin kipulak ngam zaw ding hihang.

3. Misih na phual ah pailoh a phamawh ki om thei ahih manin inntek tanu/thusate in sigalte zattheih ding khut silna/ satpiang tawh cihte gelsak hamtang ding hihang.

4. Kikepna phual a nasem ding mi kicing zo mahmah lo ahih manin aki piakhia zo i omle kizasak hamtang ding hihang.

5. Pawlpi ciat in hih corona virus pulnatna tawh kisai a hun ciangtan ding kigen khol thei nailo ahih manin, ih pawlpi sung menggong daipamte le a cimawh zawdeuh innkuante ading antang, sathau, nekledawn i kigin kholh theih tek nading zong ki theisak nuam hihang.

6. Kumpi thu tangko na mah zui ni. Kalaymyo kuam a om Zomi Pawlpite kumpi in upna thu hang hilo a pulnatna kilawh na hang in mipi kaihkhopna pen hong kham phot ahihna telsiam mahmah phot ni. Tapidawte ading in zong hong uk kumpi thu manding cih i theihsa tek ahih manin zui in mang photphot ding ki theisak nuam hihang. ZYA HQ (Kalaymyo, March 31, 2020)

Corona Pulnatna (COVID-19) natna tawh kisai theih huai thu

Hih natna mihing tung atun teh a nuaia bangin hong piangding hi.

1. Ni 1 pan ni 3 sung – Cisa tawmtawm om ding, gawl na hiauhiau ding, lutang zong na hiauhiau ding

2. Ni 4 na – Cisa tawmtawm mah om ding, lutang nazaw deuhdeuh ding, gawl zong nazaw deuhdeuh ding, nekledawn kam lim nawn phalo ding, sungpai ding

3. Ni 5 na – Gawl hong namahmah ding, annek teh zong nading, tuidawn le cin zong nading, pau le cin zong nading, khutlekhe te hong nading, pumpi tawlin tha beiding

4. Ni 6 na – Cisa omding, gawl na mahmah tading, khuh hong suakding, nak hak sading, khutlekhe nasemsem ding

5. Ni 7 na – Cisa 100 val hong omding, nak khuh mahmah ding, khuh teh khaksawh hong omding

6. Ni 8 na – Tha omnawn vetlo in, tawl mahmah in, nak haksa sa mahmah ding

Atom in, Cisa ding, gawl na in khuh suak ding tuakhit teh tawl in tha hong beile a naipen zato, sikhan(clinic) ah pai pah in.

Original: Dr Zin Min Tun genpan kilet khia hi. Zomibup ahun lap in kidop theih nading deihsakna tawh. ZYA HQ, Kalaymyo, March 25, 2020