Cimawh huh (Helpmeet)

Cimawh huh (Helpmeet)

Pasian in Adam a piansak cil-in huan sungah Adam a huh thei taktak ding om lo ahih manin, Adam sung panin amah a huh dingin huhnu (helper) khat bawl a, tua pen numei kici Eve ahi hi. Pawlkhatte in numeite sangin pasalte pha zaw hi ci-in numeite pen pasal aa dingin kisapna (object) bang bekin ngaihsun khial uh hi. Hi lo hi. Pasal om kei leh numei bek piang thei lo hi. Tua mah bangin numei om kei leh pasalte suak thei lo ding uh hi. Pasal lo tawh beh le phung thu kigen ngei lo a, ahi zongin numei lo tawh beh le phung piang thei tuan lo hi. A cimawh tuak a kihuh ih hi hi.

Pasalte bang khat peuhpeuh ah numeite sangin lungkia hakzaw uh hi. Pasalte pen numeite sangin vang phazawin lianzaw uh hi ci uh hi. A hihna zong om kha mah ding hi. Tua mah bangin numeite zong pasalte sangin a thuakzawhna uh a liatzawkna mun om hi ci-in scientist te in gen uh hi. Leitungah pasal meigong sangin numei meigong a tam zawkna pen numeite pen a tu a tate uh tawh thuak zo takin nuntakpih zo zaw ahih manin numei meigong a tamzaw ahi hi ci uh hi. Pasalte a zite uh si leh thuak zo lo, om zo lo, lungleng khuangai baihzaw uh hi. Zi nei kik thei ih cita zongin a kilawm nawn lo putek pipi nangawn in zong zi hong deih hehu pahpah uh ahih manin, tua bang pipi-in pasal meigong a tam sangin a thuak zo zaw numeite meigong tam zaw hen cihna hi ding hi, ci-in Science lam mipilte in numeite pen pasalte sangin thuakna lamah a vang phazaw a thuak zo zaw ahihna uh gen hi.

Meigong cih kammal ih zak ciangin numeite a cihna ahi phadiak dingin kingaihsun pah hi. Hi mah hi, meigong ahihnak leh numei tamzaw tawntung hi. Pasal meigong zong bel om lua hi. Meigong min pen numeite in puapha deuh hi. Kamsiatna bangkhat a bat hangin hamphatna khat hi gige hi. Leitungah pasal meigong sangin numei meigong tamzaw hi. Pasal mipha zah sangin numei mi phazah tamzaw hi. Kum 70 pha khin putek khat zong om thei tuan lo-in nungak moi nono smally mah deih pah lai hi. Tua manin pasal meigong a om ding sangin numei meigongin om leh siangtho zaw sa hi ding hiam leitungah pasal sangin numei meigong tamzaw in, pasal vekpi sangin numei vekpi mi sazian zui-in tamzaw lai hi. Science has established that women have a greate pain-threshold than men. Natna satna ah zong numeite in pasalte sangin thuak teitai zo zaw mawk mah uh hi. Numeite pen a thuak tawntungte ahi uh hi.

Na zi, na nu le na sanggam numeite hehpih in. Na cihmawhna hong huh amaute ahi uh hi. Numeite pen pasalte ii kicin lohna (man’s incompleteness) a kicing sak cimawh huhnu (helpmeet) ahi uh hi. Hih huhnu (helpmeet) hihna pen neuzawkna (inferiority) hi lo hi. Pasalte zong numeite huhnu dingin a kipiakna pen liatzawkna (superiority) hi lo zaw-in a kicingnai lo pasal (inadequacy man) ahihna hong kilangsak hi zaw hi. Pasal le numei liangko ih kikim a, ahi zongin numei pen pasal hi lo-in pasal pen numei hi lo hi. Kilamdang hi. Liangko kikimna (equality) tawh ih panmun tuamte a kikhek thei hi lo hi. Equality does not lead to interchangeability of roles.

Pasian in numei le pasal a kihuh dingin ahong bawl ahih manin, khat bek ahi ei le ei kihuh mawk mawk loh ding ahi hi. Pawlkhatte pen sex tawh kisai ah amah le amah kihuh ziauziau thei hi. Hih pen mawhna hi. Pasalte in numei lo tawh a khut vang zangin sex lungkimna bawl ziauziau hi. Numeite in zong pasal lo tawh a kutmee zangin sex lungkimna zang thei hi. Masturbating must be a sin. Anu ding apa ding a om laiteng ei le ei, ih khut khawng ih khutmee khawng zatna tawh sex zat ding hi lo hi. Numei le pasal nih kikal bekah omkhopna (sex) zat ding ahi hi. Omkhopna sex tawh kisai ah khat bek ih kihuh leh mawhna hi a, nih sangin ih tamzawk leh zong mawhna hi. Nupa kihuhna ah nih bek lian pha ding hi. Nih sangin tawmzaw lo ding. Nih sangin zong tamzaw lo ding hi. Na helpmeet na huhnu ding na muh mateng na tha sit in. Na kisik kei ding hi. Kihuh sak in.

Suang Dal