Cial thuahthuah – 2 Tim 4:4

Cial thuahthuah – 2 Tim 4:4

“Mite in thumaan a ngaihnop loh hun, amau’ deihna bek a zuihnop hun,
amaute’ zaknop thute bek a gen ding sya a cial thuahthuah hun hong
tung ding hi. Amaute in thumaan thutak ngai nuam nawn loin, tangthu
phuahtawm peuh ngaihsutpi in nei uh hi.”

“Sya ding cial thuahthuah” cihleh “sya ding zong” cih kibang lo hi.

Zong: Pawlpi kem syate in amau a laih to ding sya a hun zui-in zongin
a pattah ding uh ahi hi. Sya zong cihleh sya cial thuahthuah cih
kibang lo hi. Sya ih zon ciangin pawlpi mite’ sungmah ah ih zon ding
ahi hi. A taktak in cilehang zon ding cih sangin Church pastor te in a
pawlpi mite amau mun a laih dingin sawtpi lai pekin pantahin a kisam
munte ah a kisap hun ciangin a koih theih pah lianlian ding uh a kul
ahi hi. Tua bangin ih pattah theih loh ciangin kizon hong kul ding mah
zong na hi hi. Pawlpi hong makaih taltakte pen hih kipattahna ah
thanem hi hang. Pawlpi mite sungah Pasian’ nasem nuam taktakte zong
khia-in mukhia-in nasep guat theih ding cihthute ah kitha nem mahmah
mawk hi.

Ih thanemna: Hong thanem sak thute in, sial daai neihna, beh lungsim
khua lungsim neihna, sum le pai le min le za ding lungsim neihna,
nuntak zawnna peuh-a neihna, Lai Siangtho thei cian khol lopi a thei
kisak mahmahna, Pasian’ thuhilh theih nadingin LST hilhcian thei dek
suai lo ding hina pi’n thuhilhsya ut theih mahmahna, a ngai nuam
sangin a gen nuam vive ih hihna, Lai Siangtho syate in hilhcian zawh
nading lampi ih vaihawm zawh lohna, LST’ thuneihna a thukzaw a ih kan
nop lohna, Lai Siangtho bulphuh mel lo a ih zingvaihawmna, Lai
Siangtho siksan lopi-in Pawlpi ki-uk nading vaihawm in hih bang ciang
bek mah tawh kisuk pei kito peina, Lai Siangtho thuneihna a sangpen ah
ih koih zawh lohna ih kimop zawh lohna ih kitah zawh lohna, sumpi tawh
kisai ah piak ding zah pia lo na pi’n tam pia kisak mahmahna, ngahna
maan lo napi’n piakkhiatna ah maan kisak mahmahna, Sumpi zong a maan a
pia nuam lo na pi’n Pasian’ mi kisak mahmahna, Khrih adingin khut tum
ngam lo na pi’n eimau’ lungtang adingin ih khuttum ih zial pahpahna,
Pawlpi’ kalsuan zia Lai Siangtho tawh kituak vet lo na pi’n maan kisak
mahmahna, LST’ gen thupha taktakte sangkhol lo napi’n thupha sang
kisak mahmahna, Lai Siangtho’ gen Kha gah taktakte tawh kidim zo ngei
lo na pi’n kha mi kisak mahmahna le ih nisim nuntakna ah kibup apna
tawh thu ngen taktak zo khol lo napi-in thunget hat kisak mahmahna cih
thute hi phadiak hi.

Lai Siangtho in hih bang daan ding ahi, a cih thute ah Zomi Christian
makai tampitakte thanem mahmah uh hi. A kisam taktak thute ah kithanem
mahmah lai hi. Tua banga a thanem kiteelna tawh hong kahto hunbit
pawlpi nasemte pen Kha lam ah a thanemte, bangmah taktak a thei khol
lote na hi gige thei hi. (Ci le sa lam ah bel thahat in, pil-in, tei
thei mahmah kha mah ding uh hi. Ahi zongin Pawlpi kalsuan zia taktak
le LST paizia taktak le Christian hihna taktak tawh kisai thute le
pianthakna taktak le Kha mitna taktak cih thute tel cian khol lo uh
ahih manin hong makaihna vuah thanemna bekbek mah hi dinga, ahi zongin
amaute ahih leh thahat pianghtak kha mi kisa-in tawntawn, diangdiang
lamlam ding uh hi). Hih a tunga ih gen thanemnate hangin “cial
thuahthuahna thu” hong piang hi. Hih bang thanemna a thahatna mun ah
mihingte deihna bek kizui in thu kihilh a, thumaan thutak kiza nuam
nawn lo hi. Mihingte pen eimau deihdaan thu kigen thu kihilh kingai
nuam beka, Pasian’ deih thuhilhna kiza nuam masa lo tawntung hi. Nang
le kei in bel Pasian’ deih thuhilhna mah ih za masa nuam ding hi.

Cial: KVBC gam sungah MC ngah ding, Ordination ngah ding pen vantung
gam ngah ding sangin hamsa zaw inteh ci-in sanggam Lusei te le Pawite
in gen uh kici liang hi. Pawlpi’ ciapteh sya suah ding pen hamsa pipi
in ih kipia a, pawlpi khat in sya guk sagih bang a tawm pen kinei hi.
Tua banah sya tuamtuam pawlpi in ih ciapteh noploh se ahi Lai Siangtho
sang man hitaleh, evangelist hitaleh Pawlpi in thuhilh thei sya tampi
eimau sungah nei napi hangin, apualam mi, a pualam pan thuhilh dingin
sum guai-liangin ih cial thuahthuah se uh hi. Lai Siangtho in cial
thuahthuah a cih hihte ahi hi. Lai Siangtho in a deih vet loh, a kisam
khol lo thute ah kitha hat thei mahmah hi.

Mite in eimau’ deihna zui-in eimau zaknop thute bek a gen ding
thuhilhsya kicial hi. Kisam hi. Kihel hi. Kizang hi. Tua bangin ih
zat lohte, ih heel lohte, ih cial lohte, ih sap lohte mite’ zatloh
Pasian zat loh Kha tawh kidim lo ci-in ih daaithah hi. Ahi zongin ih
Lai Siangtho in bang hong gen hiam cihleh “Mite in thumaan a ngaih nop
loh hun, amau’ deihna bek a zuihnop hun, amaute’ zaknop thute bek a
gen ding sya a cial thuahthuah hun hong tunng ding hi, na ci zaw hi.
Tua bek tham loin, amaute in thumaan thutak ngai nuam nawn loin
tangthu phuahtawm peuh ngaihsut pi in nei ding ci ahih manin, sam
khang, cial khang, zang khang, deih khang, heel khang, theihpih khang
cih-a eimau’ bulphuh thute hanga thumaan thutak hilhsyate a nialnial
kha ih hiam cih kingaihsun kawm in, Pasian’ deihte, Pasian’ teelte mah
a deih thei a teel thei, a zong thei, a mukhia thei, a sam thei, a
cial thei, a zang thei dingin Topa in lam hong lak henla, Topa’
Lungdamna thu Lai Siangtho thu a hilh thei taktak ahi tua Kha Siangtho
tawh kidim zo tawntung thuhilh syate’ gente bekmah ngainuam in zaknop
a sa ngiat thei dingin Kha Siangtho in hong lawng kim ciat ta hen!

Evan. Suangh Dal