Christmas Zaideih ~ John T Hum

Christmas Zaideih ~ John T Hum

Christmas pen dawibiate biakna pan hong piang hi-a Kristian ten bawl ding hoih lo hi, cih bang a um pawl zong om hi. LST sungah Jesu suah phawkna na bawl un cih omlo a, Khistian masa ten zong na bawl lo mah hi. Mikhat peuh i suahni pan hong piang ahi phial a, Jesu suah ni tektek ahi kei zong zong leitungah Gumpa mihing bangin hong pian phawkna neih hun pen a kilawm mahmah khat ahihi. LST in na khempeuh sin in ahoih nate len kip un ci ahihman ahoih in ka ngaihsun hi.

Ahi zong i zatzia man leh man lo om thei hi. Ih zat zia man kei leh ei tungah mawhna om ding hi. Gentehna in, leitung ci leh sa gualnopna zatna, zu leh sa tawh zang a, mihing nopsak na ding a zatna lauhuai hi. Pawlpi pawl khat te ah, Christmas hun pen mizawngte tungah piak khiat hun leh lungdam na thu taangko na in nei uh a, Pasian minthan nading zangh uh a tua pen Pasian muhna ah namtui mahmah ding ka ngaihsun hi.

Chrismas hong tun sim in izat ngei pawlkhat ah pawi hoihnono ki lak in, naungek ih suaksak a, anu Mary in a-ang ah a tawi ngiiungeeu i mitkha ah imu hi. Mitampi in Jesu pen naungek bek in amit kha in bawl a, a picing khin ahihna, leh asepna te i mu to kei hi. Tu-a ka gen nop thu pen hong pianna i manggilh loh mah bang Jesu hong pai a deihna leh asep khiat pawlkhat Christmas message a gen nuam ka hihi.

Christmas thu tel beh huai pawlkhat

Chrismas kammal pen namnih kigawm, Christ, (Khris Jesu) leh Mass (mipi) kigawm cihna ahihi. A siangtho mahmah Pasian leh mawhnei, gilo, mihing te Jesu in hong gawmtuah cihna ahi hi.

Christmas Ki bawl masakna

Eden huan ah Chrismas kibawl masa hi. Pasian in amah leh mihing te hong gawm kik na ding ganhing khat la in na go-a, avun, mihing nupa te silh sak in, asisan tawh biakna bawlsak hi. Tuani in Christmas ava siim pen abawlsa ganhing teng hi pah hi. Pasian in hihbang ganhing si luansak na tawh Khris gumpa sih ding leh Khirs sihna in Pasian leh mihing kikal, mihing namnih (Jews leh Gential) kikal ah kilem na om ding na gen khol hi. Khrismas pen kilemna lim hong lak ahihi (Eph 2)

Gulpi lutang ki tuan kham

Numei sungpan a piang numei suan in na lutang hong tuan kham ding hi, cih Pasian in gen hi. Hih ka sim ciangin banghang avek a that khin lo a, a lutang bek tuan kham aitam cih ka ngaihsun hi. Adeihna ahang pen hi bang hi. Gulpi in mihing tungah lutang sem lo ding (uk na neilo ding) cih ahihi.

Anih na-ah, Satan pen Zuautheipa ki ci a, anasep pen zuau gen bek ahihi. Zuau gen masa a, ama zuau I up khak ciang bek I tungah nasem in thunei hi. Lutang ihcih pen zuauthu hong pai na mun ahih man tua mun tuatkhap kul ahihi. Khris mite in lutang ki tuankham khin ahihna tel leeng khemna I um kei ding hi.

Bang zuau nam gen hiam?

Khatna: Pasian in sel sim nei hi: Satan vanzat namte pen Pasian kammal muanlah nading vive hi. “ Pasian in hih ne ken hong citak pi hiam? Amah na sut ding uh a deihlohna hi” cih ahihi. Mihing sungah, Pasian in kei hong gen khiat khit loh, a ipsim thu pawlkhat om lai ci-a, muanlahna guan hi.

Nihna: Kha ki tangsapna sang sangin pumpi ki tangsapna thupi zaw

Hih suangte khomun suaksak in. (nang zong nagil kial ding hi, na pumpi kisapna don masa in), cih kammal, zuauthu zangh den hi. Ih thunget ding Lai Siangtho sim ding masak lo in, vai dang te thupi zaw hong ci den hi. Hih pen ama zuau bulom hi. Pasian gam leh adikna zong masa un, na kisap dang te uh hong pia thuah ding hi cih, kammal tawh I zawh kik ding kisam hi.

Thumna: Biakna min paulam in nasep nop bang sem in. Pasian kammal amun leh a hun kituak lo in zangh in:

Biakinn khum dawn ah Jesu pai pih a, hih pan ki kia sak in, vantung miten na khe in lei a sukkhak loh naang hong dom ding hi.

Jews miten a ngaihsut khial thu pawl khat om hi. Eite pen Pasian teltuam te ih hih manin Pasian in (bangbang i sem zongin) hong nusia lo ding hi. Pasian kammal sang masa te ih hihi. Jerusalem biak innpi ei sungah om hi, Pasian in eite i galte khut sungpan hong hon ding hi, cih te amau upna a hihi. Ahi zong Pasian kammal azuih loh uh teh tua kimuanna te in na hon zolo uh hi.

Dawimang pan biakinnpi siksan in Jesu na ze-et hi. Lai Siangtho ama’ mun tawh kituak lo in na zangh hi. Biakna min paulam a, utteng sep gawp zong khemna ahihi.

Liina: Hong bia le cin hih leitung hauhna, minthanna teng kong pia ding hi. Hih pen dawimangpa kawl nian ahihi. Jesu in,”Na Topa Pasian bek na bia dinga, ama’ na bek nasem ding hi,” ci hi. Mikhat in leitung khempeuh angah hangin anuntakna mangthang leh bang sum tawh lei kik ding ahiam? Na neihsa zah sum tawh lungkim in, kong paisan kei dinga, kong nusia kei ding hi, cih kammal te tawh leh do ding kisam hi.

Na gina kei, na mel ahoih kei, na pil kei, mite bang kei teh, na mawh zel veh, cih kammal te satan vanzat hi. Um ken.

Numei suan in na lutang hong tuan khamding hi, a cih mah bang zuau genna bul satan lutang tuatkhapsa ahi hi. Zuau um non ken. Pasian kammal Thuman thutang bek um in. Hih in Christmas hong puak suahtakna ahihi.

Dawimangpa nasepna siasak dingin Pasian Tapa hong kilangh zo hi (I John 3:9).

Hih in Christmas deihna ahihi.

John T Hum