Christmas Ciang Inn Ka Ngai – 1 ~ Hau Za Cin

Christmas Ciang Inn Ka Ngai – 1 ~ Hau Za Cin

Christmas hong tun sim in inn ka ngai hi. Ka inn uh, ka innkuanpihte, ka khuapihte, ka lawm leh ka gualte ka phawk mahmah hi. Leitung koi mun peuh ah om leng i omna peuh ah inn bel na om sam hi. Innkuan zong na om hi. Lawm leh gual zong na om hi. Khuapih tuipih zong na om sam hi, ahi zongin kibanglo hi. I khankhiatna, i nu leh i pa tawh i tualbualna, i lawm i gual tawh i sangkah khopna, i zawllen khopna, i la sin khopna, i kithuah, i kikholhna munte i phawkdan kibanglo hi. Ei hong pattahte, ei hong dom, hong khoi a hong lamsanga, hong it hong ngai mahmahte kiangah om pen tawldam in ‘dam man’ om zungzung hi.

Singapore hoihna: Singapore khuapi laizang leh sumbuk omna phual Orchard Road phei teng Christmas hun ma kha khat pek pan in kizem in Christmas Tree leh pak hoihnono tawh kilawmsak mahmah hi. Zan khuamial zawh ciang pai leng vantunggam kigen mahmah bangin tee zihziah a, aksi kibawltawmte, meivak tee diamdiamte, lui tui luang banga kizom a pai deudeute cih bangin lamdung khempeuh kipuah sitset ahih manin etlawm in kipaisan theilo hi. Khuasung peuhmah lah siangtho sitset, leivui omlo, niin them kipai cih lah omlo, motor car khu ngengngang cih lah omlo in khualak vak nungakte lah siangtho sitset in a hoihnono in kizem lai uh hi. A nop a gen dingin hih kaan a nop tamlo dinga, a etlawm kigen ding hileh zong a dang behlap tuan ding omlo ding hi.

Ahi zongin Christmas hong tun sim a leitung hoihna leh etlawmna te sanga lungsim tawng ah lungdamna, lungnopna a zongte adingin mit tawh muh theih ciang lel in lungkimna hong pia taktaklo hi cih kitel hi.

Laphuakpa in, “Joy to the world the Lord has come” na ci ngeungau hi. Leitung aw lungdam in kiko in, awng in, nang adingin Gumpa hong pai hi, a cihna ahi hi. Hih san ah JOY a cih ciangin leitung hoihna te i muh cianga i lungsim sunga lungkimna i neih pen hilo in, Gumpa hong pian mana mihing lungsim sungah lungnopna hong om pen a genna ahi hi. Lungsim thukpen ah lungdamna, lungkimna ahi hi. Tua bang lungkimna pen Gumpa om peuh leh kingah thei kawikawi a, innkuanpih u leh nau tawh omkhawm leng kicing diak hi. A langkhat ah i lungnopna pen i it i ngaih, ei hong ngai hong deihsakte tawh om leng zong a nopna kibanglo hi. Ei guak om ding, leitung hoihna thupina khempeuh kimu zihziah ding, ahih hang tua bang mun ah lungnopna kicing omlo hi.

Shillong phawkna: December 2011 hong tun ciangin lawmte ‘leave’ ngah in inn lam ah Christmas zang dingin kithawithawi uh a, lungsim ah hunlui tampi hong phawksak hi. Kei zong hun khat laiin Christmas kiim teng hun-awng neiin khua lam ah Christmas zang dingin ciah ngei tak mah hiveng maw, ka ci hi. Shillong ah ka sangkah lai ka phawk a, Christmas lap dinga khualam zuana Bus tawh ka ciah vangvang khawng ka mitkha ah hong kilang hi. Khuapi laizanga Roman Catholic biakinn hoih mahmah kong tual ah maan (photo) nihvei, thumvei khawng kilak khit ciang Police Bazar lam manawh in kipaisuk a, inn lam ah puak ding Shillong Shawl leh ‘second hand puanthak’ honkhat PB Overbridge tengah khu ngengngang in va kising a, mi teel khitna lak pan i muh, i mit hong la penpen leh hoih i sak penpen i lei khit ciang plastic golpi tawh khai neinai in innsapna Nongthymmai lam kizuanto kik hi.

City Bus sungah khe ngakna ding zong kitalo zah donga mi kihen lak ah Khasi nupi te’n a thungpi dim uh tawh meh a puak uh kawmkal ah ei zong kihen gawp in i nung i mai ah kua om cih zong phawklo in kiphu litlit in bangcici hiam in innsapna kitung thei sam hi. Nitak nitum ding huihvot hong nung mahmah muk keusak lua ahih manin muk hum kawmsa in lamdunga Voksa bak khat khawng lei dingin kipaikhia a, khut lop kiuhkeuhsa in nitak meh huan kipan pah hi.

Bus tawh Aizawl lam ah: Nitak annek khit ciang zan nai 9pm a Aizawl Bus lap dingin van teng Taxi sungah ah guang in kidiangkhia sam a, vuikhu ngengngang lak ah Bus station na om hi. Nak bing pian, vot si, khut lop kiuhkeuh tawh kiling pian setset a, ahi zongin inn ciah ding akihih manin kilawp veve hi.

Bus in khua pan tai to in Shillong khua lu a tun ciang leh dak suk leng khuapi meivak taang ziaizuai a, nopci mahmah hi; ahi zongin a nopzaw in mailam ah hong ngak ahih manin khawllo in kipaizel hi. Nai thum sung khawng akitaai zawh ciang ihmut kipanta ding cih laitak Bus hong khawl a, “Khana Khaiga” (Anne ding) hi mawk hi. Anne lo teng Bus sungah ihmut taktak om theilo ahih manin kihi neunau hi. Zan thapai a kitaai khit, Silchar zang dung ah Bus in tutphah leh i taw kimat man mello a hong seep toh ziahziah khit ciang khuavak zul in Silchar khuapi kitungto a, zing maiphiatna mun ah ekbuk kicinglo, ahih hang i nuailam in lah hong nawhta cih kikal khawnga om geigai pen a noplo penpen ahi hi!

Aizawl tungto, Champhai tungto, Murlen tungto…a nuamzaw hunte in hong muaktoto a, a noplam zong phawk manlo in hun in hong hiaihiai hi.

Christmas i cih bang taktak hiam? Leitung gum dingpa, Honkhia ding pa, mawhna pan hong gum a, sihna pan nuntakna ah hong hon dingpa pianna ahi hi. Immanuel, eite tawh Pasian hong omkhawm ahi hi. Ei te tawh hong omkhawm dingin hong pianna ahi hi. Hong pianglo hileh eite tawh hong omkhawm theilo dinga, eite tawh kikhawllo ding hi. Amah eite tawh hong omkhawm mah bangin ei leh ei zong omkhawm leng nuam zungzung hi. Eite omkhawmna ah Amah hong om lai leh a nopzaw om nawnlo hi. Leitung lungkimna tawh kidim a, lungnopna tawh kidim hi.

Tua ahih manin hih bang hun nuam hong tun ciang it leh ngaih meltheih u leh nau tawh omkhop ding a thupina hong phawksak hi. Leitungah a taamsuak ding kuamah ki omlo hi. Leitung a luah zong ki omlo hi. Bangtan hun kinei cih zong a thei ki omlo hi. Christmas bangzahvei kizang lai ding cih zong a thei ki omlo hi. A zang thei dinga i om a, i it i ngaih tawh a zangkhawm thei ding ihih leh hun ciil kei ni. Sum ciil kei ni. Kisikna omlo dingin i utna mun penpen ah zang ni. Nop i sak nading penpen mun ah zang ni.

A zing a thai mah ciang ‘tua lai ah na zang kha leng hoih ding hiven’ i cihlohna ding mun ah zang ni. Na nu na pa tawh na zatkhop theih leh a hampha hiteh. Na u na nau tawh na zatkhop theih leh a hampha hiteh. Nang guak, nang bek khattang keleu a na zat leh bel a nop dan kidang kha mai ding hi. Na duhduh ne inla, na deihdeih lei inla, na ut bangbang in om in. Midang leh nang adinga hoihlo leh siat gamtat ahih kei naak leh na kisik kei ding hi.

Mundang, gamdang pan etna: Hih bang hun hong tun ciang, mitkha ah i khua i tui hong kilang a, i lawm i gualte i mang sung nangawn ah kimu daudau hi. A kikhopna ding uh biakinn leh a kongtualte, a kikawm ding a mipi leh kikhopna biakinn sungte, a kikhop tawp uh ciang a paina ding uh kongzingte kigalmuh in ei zong a tua mun ah om dingin i lungsim ah i bawltawm hi. Nupi te’n, ‘i pumpi a omloh hang i lungsim om hi,’ a cih bangun i lungsim bekmah tawh kihawhzo hi. A lasak dingte uh i bilkha in za a, a kihona dingte i mitkha in bawltawm hi. Naupang kimawlte leh khuasung mipi kileh ziahziahte mitkha ah bawltawm in utna peuhpeuh kitung ziauziau hi.

I lawmluite kimu in, i hunlui te kimu kik hi. I kikholhna hun nuamte hong kilanga, i lenlai hunte kimu kik hi. Phawkna leh amau tawh omkhop nopna hong lian mahmah hi, tua pen lungzuanna hi a, kitheihmawhbawl theih hilo hi. A hun a bei ciangin ‘ei zong hun khat ciang tua bangin kimu kik takpi ding hi hang’ cih tawh kinem in lungkimna takpi lo tawh kilungkimsak tawm in i kihehnem hi. A taktak in a ki utlua hizen a, a kiphawklua, a kilungzuanglua hizen hi.

Thukhupna: Bangbang hileh Christmas pen Jesu Christ (Jesu = gumpa, savior; Christ = sathau nilhpa, annointed) eite mawhna pan hong gumkhia ding leh sihna pan nuntak tawntungna i ngahna dinga hong paipa pian hun lungdam bawl ahih manin Amah tawh zangkhawm leng tua hun a nuam penpen hun hong suak ding hi. It leh ngaih, lawm leh gual – eiteng om khawm in Amah omlo hileh a nop dan bucinglo ding ahih manin tukum Christmas hun ah na it na ngaih tawh hong piang naungek Jesu tawh a nuam thei bangpen in na hun na zangin. Christmas zat nuam! Hau Za Cin (Phuitong Liim)