Christian Hymn te’ tangthu: Thupha Na Ngahsa Ngaihsun Pha In

Count Your Blessings (Ephesians 1:3)
Johnson Oatman, Jr. (1856-1922)
Edwin O. Excell (1851-1921)

I saksak hymn-te’ lakah a kisa munpen khat ahi hih la a phuakpa Rev. Johnson Oatman, Jr. pen 19th century nunung lam leh 20th century bul lama gospel la tampi a phuak mi minthang khat ahi hi. America gam Medford, New Jwesey ah April 21, 1856 ni-in suak hi. A neutunga kipanin lasiam khatmah ahi a pa’ lasaksakte tungtawnin gospel la tawh khangkhiato hi.

Kum 19 a phak ciangin Methodist pawlpi ah lut a, kum tam simsim khit ciangin ama’ tenna kiima Methodist pawlpite ah thu a hilh theih nadingin license kipia hi. A khan sungin la dawng 5,000 val a phuah hangin sumzon paiizon lam a sem den khat hi a, a nunung lam ciang bangin New Jersey a insurance lianpi khat ah a za lianpi-in om a administrator sem hi. A ma’ phuah la dangte lakah, “Higher Ground” (A Sangna Lam Ka Kahto Hi), “No, Not One!” cihte minthang deuh hi.

Oatman’ phuah late lakah hih la mah a ngaihpen dingin kingaihsun hi. Edwin O. Excell in 1897 kumin kaikhawma a khet Songs for Young People labu sungah kikhen masapen a, tua huna kipan leitung bupah a kisa hi mai hi. Khat bangin, “Nitaang bangin leitung a mialna munte vaaksak hi” ci zawzen hi.

America gama kiphuak la a kici peuhmah lakah hih la zah-a Great Britain gama mi’ deih mahmah la om nai lo ding hi, kici hi. Evangelist Gipsy Smith in England gama a bawl cialpi tawh kisai The London Daily in a genkikna ah, “Mr. Smith in la thulu ‘Thupha Na Ngahsa Ngaihsun Pha In” ci-in hong pulaak a, ‘South London ah pisalte in hih la sa uh a, naupangte’n muktum (singsiit) in, nupite in hih la mah tawh luai sunga a naungeekte uh awi uh hi’ ci-in gen hi” ci zawzen hi. Wales gamah khakhanlawhna a tun lai-in Wales gama kideihpen khat ahi “Lam Ong Hilh In, Tung Pasian Aw” cih la tawh a kisakhawm munpen la ahi hi.

Hih la a aw a a phuakpa Edwin O. Excell bel gospel laphuak minthang khat mah ahi hi. America gam Stark County, Ohio ah December 13, 1851 ni-in suak hi. Kum 20 a phak ciangin lasakzia a hilh sia khat-in om khin hi. America gam buppi ah zin kawikawi-in lasak sinna sang phuan kawikawi hi. America gam khanglamah khakhanlawhna tampi a pian nadinga Pasian’ mizat Sam Jones tawh kum 20 val sung kithuah uh hi. Ama’ hun lai-in la makaih siampen khata kiciamteh ahi hi.

Lamal la-aw dawng 2,000 val a phuah bek tham lo-in labu 50 khenkhia laimawk a, Chicago ah music khetkhiatna company lian mahmah khat nei lai hi. 1921 kum, Louisville, Kentucky ah Gipsy Smith tawh cialpi a bawl laitak thakhat thu-in a cina a, kum 70 a pha hih laphuaksiampa in khawl hun nei lo a kisa ziahziah chorus sa mite tawh Pasian phatna la sa dingin van innpi hong zuatsan ta hi.

Rev. Zam Khat Kham
Christian Hymn te’ tangthu 2005