Christian Hymn te’ Tangthu ~ Rev. Zam Khat Kham

Christian Hymn te’ Tangthu ~ Rev. Zam Khat Kham

Dedication :: A Tuntunna-ah hih late sa dena midangte’n zong a sak theih nadinga a hilh den hong nusia khin ka pianna ka pa H. Go Suan Nang leh A tapate khat bangin hong ngaihsun-a na khempeuh-a hong deihsak mahmah den thugen lagen a siam hong nusia khin ka sungpa Gen Do te’ tungah hih laibu tungtawnin lungdam ka ko hi.

Zam Khat Kham. A pa H. Go Suan Nang leh a nu Vung Khaw Haute’ sung panin April 29, 1969 ni-in Tedim khua ah suak hi. Faith Baptist Bible College-Tedim (BABS, 1990), Berean Baptist Bible College & Seminary-Bangalore, India (MDiv, 1994), leh Jangshin University Graduate School PCTS-Seoul, South Korea (ThM, 2005) te ah pilna sina, Mandalay University of Distance Education-ah Psychology major tawh leitung lam pilna BA sin hi.

April 15, 1995 ni-in ordination kipia a, 1991 kuma kipan Leilum EBC pawlpi ah pastor sem hi. 1994-2003 sung THUPHA PUAK editor sema, FBBC ah laihilh hi. 2003 kumin Laisiangtho Thuhaksate kici laibu khat gelh ngei khin hi. A zi Go Khan Lun tawh tapa 2 leh tanu 4 nei uh a, Tedim khua, Lawibual vengah teng uh hi (Tu laitak Concordia Seminary Graduate School, St. Louis, MO, USA ah PhD (Systematic Theology) a sin laitak hi).

Thumasa

Pawlpi tangthu i et ciangin Pasian’ thu kihilhna leh la sakna tonkhawm den hi, cih kimu thei hi. Hotkhiatna thu kigenna cialpite peuhmah ah thu leh la tonkhawm den-a, kha khanlawhna kici rivival kikhopnate peuhmah ah la lo-in, a diakdiak-in mipi lasakna lo-in, thuhilhna guak, thu guak, kicing thei ngei lo hi. 16th century lai-a Protestant Reformation Movement, 17th century Pietistic Renewals-a kipan 19th century leh 20th century sung America leh Europe gamte-a kha khanlawhna i cih revival mei a tawhkuang Christian hymn-te mah ahi hi.

I gam-a Pasian’ thu hong puak missionary-te in zong hih thu tel mahmah uh ahih manin thu leh la mah tawh hong pantah uh hi. Laisiangtho leh Pasian’ thu kigelh tuamtuamte ong teisak mahbangun Christian hymn-te hong teisak uh a, Pasian’ hehpihna hangin leitunga la hoihpente mah i ngah kha hi.

Tua banah i gam-a lungdamna thu hong puak masa Cope Topa-a kipan sangmangte hong kuankhiat lai-un a gam uh America ah piangthak la, Evangelical la a laan mahmah lai ahih manin Mangkama la ngaih a kiciteng mah i ngah kha sawnsawn hi. Cope Topa-a kipan sia masate, a diakdiak-in thu leh a a va deuh Rev. S.T. Hau Go’ hanciamna tungtawnin leitung mun tuamtuam-a mite’neihte sanga niam zaw het lo la ngaih tampi nei i hih manin Pasian’ zat hih mi thupite’ tunga i lungdam ding mangngilh ngei kei ni.

1994-2003 sung, Evangelical Baptist Conference pana kha sim-a kihawmkhia THUPHA PUAK editor ka sep sungin, i sak mun zawkdeuh Christian hymn-te kua’phuah hi a, bang hanga kiphuak hiam cih thute“Christian Hymn-te’Tangthu” ci-in column khat hongin tawlkhat sung ka suaksak den hi. A kuamapeuh, a diakdiak-in Pasian’ nasemte, in phattuampih mahmah uh cih ka mu a, lungdam kohna laikhak zong tampi mah ka ngah hi.

Tua hun sung mah-in Tedim Evangelical Baptist Church sunga khangnote in “La leh A Phuakte’ Tangthu” kici laibu khat bawl uh a, tua sunga hel dingin tanghtu pawlkhat hong nget bangun ka pia hi. A laibu sah lo-in dawng tampi kihel zo lo banah bu tampi kihawm zo lo a, bei pah sawnsawn hi. Tua hun laipeka kipanin tua bang thu manphate sawtpi a kikep theih nadingin laibu-in kibawl zo leh cih ka ngaihsut ahi hi. A hun pia zo lo, a sum a paii-in sam den sawnsawn ahih manin tu ciang hong suak hi.

Sawltak Paul in, “Uangtatna hong tun leenggahzu na kham kei un. Tua sangsikin Khasiangtho tawh na kidim zaw un. Late, hymn-te leh khalam late-in khat leh khat na kihopih un. Lasa-in na lungsim sunguah Topa’ phat un”(Eph. 5:18,19) ci-a hong sawlna i man theih nadingin i saksak late’ khiatna thei-a a kiphuahna tangthu i theih ding thupi mahmah hi. Tua banga i theihna tungtawnin tua late in khiatna hong nei deuh hi.

Kua in bang thu hangin bang hun lai-in bang la na phuak hiam cih i theihna tungtawnin ei’ nuntakna-a Pasian’ nasepnate leh hong makaihnate kimu kitel thei deuh hi. Paul mah in, “Ka kha-in la ka sa dinga, ka lungsim-in (theihtelna-in) zong la ka sa ding hi” (I Cor. 14:15) a cih mahbangin i sak late’ khiatna tel sinsen-a, tua late’ tangthu i theih ciangin i lasak hong lim deuh a, khiatna hong neih deuh hi.

Hih laibu sunga tangthute ka teina ah ei’ kam-a om lian lo laimal tam simsim ka tuak kha a, Mangkam-a kizang bangbanga ka koih lel tampi om hi (gentehna-in, hymn, pianist, organist, music, poem, violin, leh la dawng saupite kilawhna kammalte). Tua banah, la pawlkhat a Mangkam pana ei’ kam-a kitei nai/kha lo om-a, tuate zong tei tawm se lo-in ahi bangbangin ka suaksak lel hi. Tei vial lehang, la tei lah i vakna hi lo ahih teh, siasak lel kha ni, ci-a ka tuaci koih mai hi.

Thu-ummite kilawhna kammal zong “Christian” mah ci-in ka zanga, “K” tawh “Khristian” lo-in “C” tawh ka “Christian” hi. A sim peuhmah in a theih veve, leitung bup-a kizang kammal mah zang lel le’ng hoih ka sa hi. Ei’ kam-a om lah hi tuan lo mawk ahih manin mi’ a i zat veve, i leii in a lawh theih veve mi’ gelh bangin gelh pah mai lehang ka cihna hi.

Pawlkhatte bangin bel “Tapidaw” cih kammal peuh zong zang thei uh a, ei mite’ sungah, a diakdiak-in khualam khawnga te in,“Tapidaw” cih kammal bel nidanga ABM pawlpi a kici deuhte a lawhna vua a zat uh ahi hi. RC pawlpi, Tapidaw pawlpi, EBC pawlpi, AG pawlpi, cih bangin lo den uh hi. A peuhmah-in a Kawlkam khiatna leh i zatna mahmah kituak lo ahih manin leitung bup-a kizang, i leii in a lawh theih luat lel “Christian” mah zat pah lel ding hoih a sa pawl ka hi hi.

I Topa’ min mahmah zong mun khat ah “Zeisu” kici a, a dang mun khat ah “Jesu” kici kawikawi hi. I Tedim Labu a kitei masate ah “Zeisu” cih kammal kizanga, Rev. S.T. Hau Go’ tei Xristian La, Tedim Kam sungah “Jesu” na zang hi. Hih laibu sunga late tua mun nih pana kila ahih manin min khat bek kimlai,“J” leh “Z”-a ki malgawm nam nih-in kizang hi. Zon-olna bangah a bul lam leh a dawn lamah om tuak zawzen hi.

Hih laibu ka bawlna ah Mangkama kigelh laibu tampi mah ka enkaak-a, mun khatkhat-ah laphuakte’ suah kum khawngte a na kilamdan hun peuh zong om zanzan hi. A kiphuahna thu mahmah zong khat’ gen leh khat’ gen kibang lo thei-a, hymn dawng khat in tangthu nih leh thum a nei thei mah zong hi lel leuleu hi. Tua ahih manin i theihsa thu khatpeuh tawh kituah lohna a om zenzen leh lamdang ngaihsut lo-a, tangthu a cingzaw-a i kan beh ciat ding hi mai ding hi.

Hih laibu ka bawlna ah mi kim’ deih la khempeuh kihel lo kha ding hi. Kei mahmah in zong ka hel nop pawlkhat ka hel theih loh om hi. A tangthu ka ngah zawh loh man ahi hi. Mai lamah Pasian’ deihna a om leh a bu nihna kibawl zo henla, hih sunga kihel lo la pawlkhat hihel-in, khangthak laphuaksiamte’ late zong tampi kihel leh, cih ka lunggulhna ahi hi.

Ei’ kam-a laibu bawl bel sum leh paii lamsangah meetna a om lo, supna hizaw thei den napi-in hih bang laibute ei’ kam-in om leh cih ka deih luatna-in hih laibu kong bawl ahi hi. Bang bang ahi zongin, kicing lo pipi mah-in tu-a ciang kong tun hi. Kicin lohna, khialhnate kimaisak-in, mai lamah a hoihzaw-a i hanciam ding kong thum nuam hi. A phat taak Pasian a kiphat nadinga a khang a khanga kiphuak hih late’ thu i theihna tungtawnin i Pasian’ minthanna i telna khang semsem ta hen.

A hawmkhia:

• Rev. Zam Khat Kham
• Ba-141, Lawibual,
• Tedim 03041
• Chin State, Myanmar
• Khatvei khetna, bu 2000
• July 2005

Zam Khat Kham
Tedim, July 2005