China kumpi nuai ah Hong Kong bit nawnlo

China kumpi nuai ah Hong Kong bit nawnlo

China kumpi in Hong Kong mipite tungah a kul bangin thusitna leh gawtna pia thei, cih thukhun thak khat Thursday ni taangko dingin a kisak laitakin Trump kumpi in China tungah bangci bangin gawtna pia thei ding ci-in vaihawm hawm hi. Hi bangin USA leh China kikal lang nih kimuanlahna kawmkal ah Hong Kong pen China kumpi thuneihna nuai ah bit nawn lo, suakta nawn lo hi, cih thu Mike Pompeo in hong kitaangko khia hi.

State Secretary Mike Pompeo in tuni a genna ah: “US State Department in Hong Kong pen China nuai ah bit nawn lo hi cih kitel hi,” ci-in gen hi. Trump kumpi makaihna nuai ah US kumpi in China leitaw lam gam tawh sumbawlna khakcip ding maw, gakcipna khat bawl zaw ding… ci-in a ngaihsut laitak ahi hi.

Hong Kong tungah China kumpi in a ut bangin mipite thusit theihna leh gawtna thukhun thak a bawl pen Hong Kong adingin sih dak ging mah tawh kibang hi, ci hi. Hong Kong in China gam a om ngei lo suakta tak a thugen theihna, suakta tak a mipi kikhop theihna, suakta tak a amau leh amau vaihawm a thukhen zum pan thukhen theihna nei uh ahi hi.

A zenzenin US kumpi in sumbawlna lam gakna maw gawtna a bawl leh tua pen a beisa kum zalom lai pek pan a leitungbup sumbawlna mun thupi Hong Kong adingin vaisahpi khat suak ding hi. Tua pen China kumpi adingin zong gawl kimeksak tawh kibang ding ahi hi. Bang hang hiam cih leh sumbawlna leh vanpuakna ah Hong Kong tawnin leitungbup tawh tuipi tawnin kizom uh hi. Hong Kong bulphuh sumbawlna ah China mihaupite tampitak kihel uh hi.

Tulaitak a Trump kumpi geelna pen a beisa kum a China kumpi tungah gawtna a piak dan mahin Hong Kong pan a US hong kipuak vante tungah gawtna liau sum hon khat bawl sawm hi. China kumpi in Hong Kong mipite ut ut a bawl theihna ding thukhun a kipsak dung zui-in US in hih bangin geel sawm ahi hi. US State Secretary Mr. Pompeo in Congress ah, “Tuni-in Hong Kong pen 1997 ma USA tawh kizop bangin kizom theinawn lo hi.

Hong Kong in China nuai ah suahtakna nei nawn lo hi. Hong Kong pen China gambup adingin a suakta leh a etteh huai a khangto mipite cihtheihna phualpi khat hi dingin lametna i neih ngei pen tu-in tua bang hi nawn lo hi. China kumpi in ama ut bangin tu-in peipuang ta hi,” ci hi.

President Trump bek hi loin US ulian tampite in China kumpi gamtatziate mitphia loin encik den a, a sawt loin President Trump in Hong Kong tawh kisai sumbawlna thusuah executive order khat tangko ding hi.

Hong Kong pen Britain kumpi in 1964 kum a thukimna om bangin 1997 kum July kha in China kumpi tungah ap ahi hi. 1992 kumin US kumpi in Hong Kong pen Britain kumpi nuai a a om lai bangin kizopna a ngei bangin neihpih ding, cih thukhun kipsak uh a, tua thukhun pen tu-in ngaihsut phat loh phamawh ta, ci uh hi. A beisa kum November kha sungin mipi lungphote tungah China kumpi sawltak palikte tatsia lua hiam gam lua uh ahih manin US kumpi zong lung nuam mawh mahmah khin ahi hi.

Hi bang thu teng leh Covid-19 hang teng khawng tawh tulaitakin USA leh China kumpi pen kingik ngik uh a, Taiwan gam tung, Hong Kong tung leh South China sea kim teng ah galkap thahatna kilaklak uh ahi hi.

More: Hong Kong ah numei khatin thautawh mi 4 kap, 1 si in 3 liam

Pawlkhat in leitung galpi thumna piang ding hi, ci uh a, ahi zongin gal piang taktak leh sum tam bei lua, mi tam si lua banah lang nih in metna bangmah lemlawh om tuan loin supna vive hi, cih tel mahmah uh ahih manin galpi piang ken teh, a ci zong tampi om hi. Source: The New York Times/ The Tedim Post