China in Pakistan tungah galdona teembaw nih kipialo in aki leisak hizaw ci

China in Pakistan tungah galdona teembaw nih kipialo in aki leisak hizaw ci

Jan. 28, 2017: China in Pakistan tungah Gwadar teembaw phual cin’na dingin galdona teembaw nih pia hi cih new report a om manin tua teembawte a mawkna in kipia lo a, a kizuak ahi hi ci-in Chinese foreign ministry spokesperson Hua Chunying in hilhcianna bawl a, gam nih kikal a ”military deals” om bangin a kileisak hi zaw hi ci hi.

Pakistan media reports in Monday in China in Pakistan Navyte kiangah Kiginni in China-Pakistan Economic Corridor (CPEC) humbitna dingin galdona teembaw nih hong pia hi ci-in suaksak hi. Ms. Hua hih bang media report om manin teembaw nihte a khawnkhong a kipia (donation) hilo a, gam nih kikal-ah military trade cooperation om mah bangin Pakistante teembaw lei dingin China ah hong pai uh hi ci hi.

Pakistan gam-a nisim a kisuaksak Dawn news in hih teembaw nihte pen China-Pakistan Economic Corridor (CPEC) tuipi lampi humbitna dingin “joint security” dingin kizang ding hi ci hi. Dawn in Pakistan Maritime Security Agency (PMSA) in hih teembawte gel pen Gwadar teembaw phual (port) humbitna bekin kizang zo dinga, Pakistan Navy ten hutkhiatna nasepna leh a mangte zonna in zang ding uh hi ci uh hi ci hi. A teembawte gel pen Gwadar port ah kipia khia loin China gam-a om Guangzhou ah Pakistante kipia khia hi.

Dawn news in China in teembaw nih Dasht leh Zhob kici bawl beh lai a, a sawt loin Pakistan Navyte zat dingin pia khia lai ding hi ci hi. China in India gam a suam den Jaish-e-Mohammad (JEM) makaipipa Masood Azhar UN Security Council 1267 committee bangin khalna piak ding hi a cih hangin China in khalna pia nuam lo a, hih thu tawh kisai a kidotna ah Ms. Hua in China in hih thu tawh kisai gam tuamtuam tawh gen khopna kinei lai ding hi ci-in dawng hi.

A sawt loin a tawp pah ding US Assistant Secretary of State for South and Central Asia Nisha Desai Biswal in China in gam 48 kipawlna Nuclear Suppliers Group (NSG) ah India member ahih ding dal hi a cih dotna Ms. Hua in a dawn’na ah, “Nuclear Suppliers Group (NSG) member hih theihna ding pen mangpha khakna letsong piak bangin kipia thei lo hi,” ci hi. India in NSG ah member a hih theihna dingin ngetna lai a khiat hangin India pen non-NPT (NPT thukimna suai kai lo) ahih manin ka gensa ka gen kikik kei ding hi ci hi.

#Behlapna: China pen terrorism do a kicih hangin US nangawn in terrorist in a ciamteh Jaish-e-Mohammad (JEM) makaipipa Masood Azhar tungah khalna na pia nuam lo a, India nasia takin langpang in, Pakistan galvan hoih nono pia den hi. China pen hong hat luat ding deihsak huai lua lo a, kumpi a gensia ngam peuhmah thong ah khum lianlian a, communist gam ahih mah bangin Christian ten bawlsiatna nasia takin a thuak hangin leitung adingin Christian a khan’na pen gam hi ci-in kiciamteh hi. A sawt loin China pen Christiante a tamna pen gam hi ding hi kici hi. Thang Khan Lian