China gamsung ah Bus leh Truck khat kiphukha, mi 10 si in 38 liam

China gamsung ah Bus leh Truck khat kiphukha, mi 10 si in 38 liam

China ah Passengers apua Bus khatleh Cement Truck khat ki phukha ahih manin, mi 10 si a, adangzong mi 38 bang liam cih AFP News pan kiza hi. Thursday (Mar 02) nitaklam in thupiang hi a, Kawlgam tawh gamgi kinai aom Yunnan Province sungah aki phukha ahihi.

Xinhua News Agency te genkhiatna ah Cement Truck pen lamlang ah ki lumlet in, mi apua Passenger Bus pen lampang ah kilawnkhia cihi. Hih Bus leh Truck te ki limphutkhak mahmah uh ahih manin, aphual ah mi 9 sipah a, zato aki puakkhit ciangin khat sihbeh leuleu hi.

China gampen Road Accident atam mahmahna gamkhat in akiciamteh hi a, Traffic Police te’n limtak in Traffic Regulations akici lampi tah kisai zuihding thukhamte hoihtak akizuih nadingin hanciamlo uh ahihman kici hi.

2015 kumsung bekbek inzong Traffic Accidents akigawm in 180,000 bang piang cizen hi. Tua Accident hangin mi 58,000 in sihlawh uhhi ci’n thunei te’n nungkum December khasung in genkhia ngei uhhi.

Video: At least 10 killed, 38 injured in traffic accident in SW China’s Yunnan

Adiakdiak in khual gamlapi azin Long-distance Bus tepen mi aval in puapahpah uh ahih manin tuahsiatna omleh mi tampipi sihlawh hi.

Nungkum December khasung inzong Whuhan City sung aom bualgei khatah Minibus khat lengsuk a, mi 18 in sihlawh hi.

More: China ah vanzuak khatleh vanlei khat pekkhat hangtawh kitawng in a ngawng kitansak

Nungkum November khasung inzong Shanxi Province sung aom Expressway ah mawtaw kiphul khagawp ahih manin, mi 17 in sihlawh in, mawtaw bekbek 56 in siatlawh hi. ZD Sawltak #zomidaily