China ah suangmeihol khuk nasem mi 33 te awkcip in si

China ah suangmeihol khuk nasem mi 33 te awkcip in si

China, Chongqing khua aom suangmeiholkhuk ah nungdiak in Gas puakkham a, mi 33 leisung ah awkcip hi. Tua a awkcip Coal Miners mi 33 te avek in asisa in ki muta hi ci’n Chinese State Media in pulakkhia uhhi.

Hih meiholkhuk pen mimal Private in akito khat hi a, Jinshangou Mine kici hi. Tuamun ah Monday ni sunhun pawlin Gas puakkham a, tualaitak in mi 2 bek suakta hi. Adang leisung ah nasem mi 33 te hotkhiattheih nading in tawlngalo in Rescue Team te’n azon kipanpah uh himahleh anungta in kuamah honkhia zolo uh cihi.

Asi te ii aluang khempeuh ki mukhiakhin a, ahi zongin ahonkhiading in akithawi Rescue Team te ahihleh lukunsa, maimialsa in om uhhi.

Meiholkhuk tawhna leisung ah Gas kehtheizel a, tuapan in meikuang khatpeuh ahih keileh Electric Wire khatpeuhpan meikuang khatpeuhtawh kibikha leh puakkhamgawp theihi.

Tuabang apianloh nadingin huih alut apusuakna Ventilation Systems ahoih mahmahding kisam hi. Hih tuahsiatna vaitawh kisai in State Administration of Work Safety kici kumpi thunei te’n sitcianna, etcianna neiding uh a, hihvai ah mawkpuak neite dann lianpi thuakding uh cihi.

Chongqing khua aom adang meiholkhuk te zong ki khakcipsak phot hi.

Sengamsung aom Mining Industry pen leitung ah alauhuai leh mi tam asipen inzong akigen khat ahihi.

Sengam pen leitung ah suangmeihol Coal atamzat penpengam ahihi. Tuamah bangin leitung ah suangmeihol tam apiang khiatna penpenna gamzong ahihi. Ahi zongin tamki thohkhia lualiang ahih manin kumpi thunei te’n meiholkhuk akumlui 1000 val khakcipding in tangko khia uhhi. ZD Sawltak #zomidaily