China ah Bus tuahsia in mi 36 in sihlawh, adangzong mi 13 liamgawp
China gamsung ah mi adim in atuang phitphet Bus golpi khatin leisung kuahawm Tunnel Wall phukha ahih manin, tuasiagawp cih AFP pan kiza hi. Hih tuahsiatna hangin mi 36 in sihlawh a, adangzong mi 13 liamgawp uhhi.
China, Shaanxi Province sung aom Qinling Tunnel sungah Thursday nitaklam in thupiang cih Xinhua News Agency te’nzong genkhia uhhi.
Hih Express Bus pen Southeast Sichuan Province, Chengdu panin Luoyang City zuanin apai laitak atuahsia ahihi.
Sina News te genkhiatna ah hih Bus sungah Passenger akigawm in mi 49 atuang ci a, tualak ah naupang 2 kihel cihi.
Sichuan Province sung ahzong tulaitak atuahsiat mahmah laitak uh ahihi. Nungdiak mahmah Tuesday ni in zin nasiatak in linggawp ahih manin mi 20 bangin sihlawh uh a, adangzong mi 100 valin liamlawh uhhi.
China gamsung ah Road Accident pen piangthei zelzel a, kumpi thunei Police te’n hoihtak in thukham zuihding hanciamsaklo, mawtaw ahawlte’nzong thukham palsak pahpah uh ahih manin, tuahsiatna atamphadiak in ki ciamteh hi.
2015 kumkhatsung bekbek inzong China gamsung ah tuahsiatna Traffic Accident 180,000 vei piang ci a, tuasung panin mi 58,000 takin sihlawh uh cih thunei te’n nungdiak in pulakkhia uhhi.
Video: At least 36 killed in China bus crash
Nungkhasung inzong mi 19 apua Bus khat leh Lorry mawtawpi khat Hebei Province sung aom National Highway tungah kiphukha uh ahih manin, tua Bus tungah atuang mi 11 takin sihlawh uhhi.
March khasung inzong Yunna Province sungah Bus khatleh Cement Truck khat kiphukha in, mi 38 takin sihlawh uhhi.
Nungkum December khasung inzong Wuhan City sungah Minibus khat bualtuisung lengsuk in mi 18 in sihlawh uhhi.
Related: China Eastern Airlines te vanlengkhat vanlengtual ah tutheipaklo in kilokgawp in mi 26 liam
Nungkum November khasung inzong Shanxi Province sung aom Expressway lamzikpi tungah mawtaw tampitak kiphukhagawp ahih manin, mawtaw bekbek 56 takin siatlawhgawp a, mi zong 17 takin sihlawh uhhi.
Nungkumsung July khasung inzong Tianjing City sungah Bus khat tuahsia in mi 26 takin sihlawh uhhi. China gampen mawtaw tuahsiatna atam mahmah gamkhatin aki ciamteh ahihi. Sawtlak #zomidaily
Comment piaknop aomleh...