Malaysia gamsung aom Chin State bup gambel kipawlna ICC makai te leh UNHCR makaipi ki muhkhopna

Malaysia gamsung aom Chin State bup gambel kipawlna ICC makai te leh UNHCR makaipi ki muhkhopna

Malaysia UNHCR in Chin State sungpanin galtai Refugee te 2019 kumbeidongbek UN Card tawisakding, 2019 kum khitzawh Chin State galtai tepen UNHCR tawh kisaina omnawnloding ci’n abeisa June 13 ni in tangkona neikhia uhhi.

Tuabangin UNHCR in atangkokhiat uhhangin Chin State sungah suahtakna Freedom taktak omnailo a, lungmuang taktakin ciahtheih omnailo hi. Tua ahih manin Malaysia gamsung aom Chin State pan Refugee Community buppi in Friday (June 29) ni in gamdaitak in lungphona neikhawmthei uhhi.

Mipi in gamdaitak in lungphona aki neihkhit ciangin Malaysia UNHCR ah Representative alianpen ahi Richard Towle tawhzong ICC makaipi te kimuhkhopna kineisuak thei a, Statement zong ama khutsung ah kipiathei hi.

Hih lungphona neihtheih nadingin avaihawm pen Chin State galtai kipawlna makaipi te ahi Independent Chin State (ICC) mintawh aki vaihawm ahihi. ICC sungah Chin State sungpanin galtai mipi kipawlna Community ahi Alliance of Chin Refugees (ACR), Chin Refugee Committee (CRC), Dai Community in Malaysia (DAI), Falam Refugees Organization (FRO), Zomi Association of Malaysia (ZAM) cihte akihel ahihi.

Malaysia UNHCR Representative Richard Towle tawh kimuhkhopna panin:

Tuni (29 June 2018) ni in UNHCR zumpimai ah Chin State Refugee te’n gamdaitak leh makaite thu mangdiamdiam in lungphona naneih uhpen kong theihpih uhhi. Naungek akipan, sangnaupang leh uhamkhin nupi papi honkhat kamuhkhak manun kalung uh nuamhetlo hi. Tulaitak in Chin State Refugee te’n bangci bangin thuakhak sading cihpen kong theihpih uhhi. Hihpen abaihding hilo a, keibek thamlo, UNHCR zumpi sungah nasem khempeuh inzong notawh akibangin kong thuakpih uhhi. Na mailamding uh khentatna bawlding, teelna bawlding pen hamsa mahmahding hi cihpen kong theihpih uhhi.

UNHCR zumpi panin hongki pulakkhia ahi “Chin State Refugee te’n ateelding leh akhentatding” cih tangkona tawh kisai in UNHCR Malaysia khatbek ii vaihawmna hilo hi. Refugee honglaksak ahi gamthumna gamte lakpan adiakdiak in USA leh Australia, gamsung gampua aom NGO tuamtuam te ii muhkhiatna leh UNHCR Malaysia te kikumkhawm in Chin State Refugee tevai khentatna akinei ahihi. Tungsiah Geneva zumpi panin khentatna aneihkhit uhciangin UNHCR Malaysia in akikal panin thusia hong tangkokhia kahi uh a, kozong kalung uh nuamhetlo hi.

Video: Hundreds of Chin refugees demonstrated at The United Nations High Commissioner for Refugees (UNHCR) office on Friday (June 29) after being told that they would have to go back home by 2020.

Tuni in Chin State Refugee makai te ii Statement pen ka ngahkhin a, na ngetna te uhzong akilawm akituak ngetna ahihi. Statement sunga thu pawlkhat tepen keimahmah Malaysia katunzawh akipan tunidongmah Chin State Refugee te adingin lawptak in kasepsep te uh ahihi. UNCRH Malaysia nasem te’n Chin State Refugee te tungah deihsakdiak in hoihtak in kong vaihawmsak uhpen kum 13 sungbang alut hita hi.

Chin State Refugee bekbekzong akigawm in 80,000 valbang gamthumna ah kipuak khinta hi. Chin State Refugee te tungah 100% dekphial in ahoihthei penpen in hongki vaihawmsak hi. Hihbang konggen ciangin ka nasep uh hongki sialnuam kahikei hi. Tua nasep tepen kasepding mahuh ahihi. Chin State Refugee Community tezong kahihtheihtawp un kong panpih uhhi. Tua hi in, tuni lungphona naneihna uh ngimna leh ngetna tepen ka zanuam hi.

Ngetna (1)
Chin State Refugee te innlam zuatding kithawi nadingin ahun kha (18) sungbek nongpiak uhpen tomlua mahmah hi. Tuaban ah Myanmar gamsungzong gamvai lungmuanhuai omlo, daihna taktak omnailo ahih manin, ahihtheihleh 2020 Myanmar Election amansiangdong hong sottosak theile uhcin cih konggen uhhi.

Dawnkikna (1)
Hih nongngetna uhpen akician athupi mahmah hi. Ka tangkokhiat uhpen etphatna akibawltheih nadingin Chin State Refugee makai te’n Information kiciantak in Statement nong phahkikding uh kisam hi. Tua tungtawn in kolampan in kikumkhawm in ki vaihawmthei dinghi. Hihvai tawh kisai in bangmah kamciam kongpia ngamkei a, ahi zongin piangthei khading hi. Amanlang in lai hong phahkikpah un.

Adang kong genbehnop khatah Malaysia kumpi ngiat inzong UNHCR panin Refugee tampi Card pianawn kei un, panpih nawnkei un ci’n honggen uhhi. Tuabek thamlo, UNHCR zumpi nangawn kong khakcipsakding uhhi ci’n 2014 kumpek panin thu hongpiakhin uh ahihi. Malaysia gamsung ah Refugee atamsemsem pen diksalo uh a, khamciptheih nading azongzong uh ahihi. Tuahangin Chin State Refugee tetawh hongki zomto ahihi. Amau genna ah Myanmar Refugee tepen panpih nawnlohding leh amaupen Refugee taktak hilo hi ci’n tamveipi honggen uhhi.

Chin State Refugee te’n Malaysia gampen tampitak panpihthei hi cihpen ko UNHCR te’nzong kathei uhhi. Tuahangin Malaysia kumpi pen hanciamtak in akikal panin kakuppih zelzel uhhi. Mailam ahzong nakupihpih laiding hi ung. Tua ahih manin UNHCR leh Chin State Refugee makaite khasim in Meeting bawlkhawm in kikupkhopna neihtheihding zong ki vaihawmding hi.

Ngetna (2)
Chin State Refugee sungpan gamthumna paitheih nadingin aki vaihawmkhinsa te pelhlo in gamthumna nongpuaksak teitei nadingun kongngen uhhi.

Dawnna (2)
Chin State Refugee tepen hamphat leh masakdiak in hongki panpihpen kei katuncil pekpan ahihi. 2013 Mobile Registration akibawlding inzong Malaysia kumpi in hong khaktan saksawm hi. Tuazahzah mihonpi UN Card piakei un ci’n tamveipi hong khaktansawm himahleh UN Card akihawm veve ahihi. Tuazawh tudong kum 5 sungbang Chin State Refugee te hamphatna hongkipia hi ci’n konggennuam hi. Registration akibawllai in Chin State Refugee bekbek akigawm in mi 23,000 bang Register kibawlsak hi.

Gamthumna puaksakvai tawh kisai in 2014 kumpanin Fraud Case vai hong om a, mi 6000 bang Fraud Case ahihlam kimukhia hi. Tuahangin gamthumna ahi USA kumpi in UNHCR te gamthumna apuakzia pen hongmuang nawnvetlo uhhi. Australia kumpi te’nzong UNHCR ii Registration bawlzia, Card piakzia pen akhial tamlua mahmah hi ci’n hong mawhsak uhhi. Tuateng hangin Refugee lakdingzong pen kihtakbawl uhhi. Tuahunlai in Community makaite leh UNHCR ii thanemna hangin leitung ah ki maimialtuam mahmah hi.

Tu’nzong USA kumpi in Refugee bangzah honglaksakding cihpen amau khentatding himawk ahih manin genkhiat hamsa mahmah hi. Azenzen in USA kumpi in Chin State Refugee mi 5000 hongpuak un aci hileh kolampan in apuakding in akigingsa in aomden kahi uhhi. Tua ahih manin nozong gamthumna ah atungsa na mipihte tungah huhna ngenkawikawi unla, kumpi thunei te tungah thuumna hongneihsak uh hileh kikhelna khatpeuhzong omthei khading hi. Gamthumna puakding in aki vaihawmkhinsa tezong atuntheih nadingun ka hanciamding uhhi.

Ngetna (3)
Chin State Refugee vaitawh kisai in na tangkona uhpen koigam, koi kumpi teng ki zasakkhin hiam?

Dawnna (3)
Refugee ala gamkhempeuh ahi USA, Australia, Canada, Japan cihte tungah ki zasakkhin hi. Ahi zongin Australia leh USA te’n mihing khatlekhat ki hehpihna Humanitarian Ground tawh Embassy panin ngetna kibawlsak theilaiding uhhi. Tuatezong amau ii Refugee gambel ahihna agenkhiatzia tungtawnbek in thu khentatna kibawlsak dinghi.

Ngetna (4)
Refugee in aki ciamtehsa te sungpanin amauthu tawh innlam aciahnuam aomleh UNHCR panin panpihna aomlaidiam?

Dawnna (4)
Tuavai pen Durable Solution kici UN huangsung aom Department te ii vaihawmna ahihi. Durable Solution Department makaipinu ahi Richael ngiatzong tulaitak Geneva ah tuavai tawh kisai in Meeting akahlaitak ahihi. Amah hong tunkik ciangin tuavaipen kikumkikleng hoihzawding hi. Kei kiangpan ahihleh piangtheiding hi ci’n kongdawnnuam hi. Sawltak #zomidaily