Chin leh Zomi dotnate dawnkikna ~ Dr. Dongno

Chin leh Zomi dotnate dawnkikna ~ Dr. Dongno

Khamtungmite minam khat i hih hangin i pau leh i tatzia mun khat leh mun khat kibat lohna hangin, midangpi i kisa kha thei hi. Mi nam khat i hihna dingin, i pau leh ham a kibang lian kei zongin, ei-leh-ei i kilawhna i minam min ki bang leh haksatna om lo-in mikhat sakhat ihihna i sang thei ciat ding hi.

“Hill tribes kici Kuki/Lushai/Chin-te avekpi un Zo ahi uh hi” ci-in pre-colonial, colonial leh post-colonial hunin, Sen mipil, Mangkang mipil zalian, Professor, missionary, Italian RC father, missionary, administrators leh Kawl mipil tampite-in na ciamteh uh hi. Hih pen, ZOMI ah I kigawm theih nading lampi kip/kho khat ahi hi.

Tua ciaptehnate kaikhawmin ‘’ Rethinking Our Identity ’’ ci-in Khamtungmi khempeuh, i minam min taktak, Zo (Zomi) ahihna net sung ah kong khah khia aa ZOLUS Magazine 2016-2017 hawm sung ah zong suak khin zo hi.

Hih ka lai at siksanin, 69 veina Zomi Nam Ni KL Malaysia ah Feb 20, 2017 ni-in Zomi tul li mai ah ka gen ciangin, lungdamna thu mi tampi-in ong gen uh aa ka lungkim hi.

Ahih hangin atel zo lo alehlam aa ngaihsutna agen khat om ahih manin kicianin kong dawng kik ding hi. Dotnate laitui dup, blue ink tawh kong at hi.

Kumpi lian minam thupi te in min khel themthum lo zaw cih ih thei ciat hi. Ih Kawlngam ah Burma pan Myanmar in hong kikhel, Lampi min zong kikhel, bangmah khantohna om tuanlo hi.

Ei mualmite, kumpi liante tawh kigenteh ding ihi zo kei hi. Minam min kheek nading khalna zong koimah ah om lo hi. Kul asate’n kheekin, kul asa lote-in kheek lo uh hi.

Kul asa, SIAM mite-in, Thailand-in kheek uh hi. Thailand gam minthang khat ong suak hi. CEYLON zong Sri Lanka in kikheek hi. Bangladesh zong EAST PAKISTAN panin kikheek hi. Kawlgam zong BURMA panin Myanmar-in ki kheek hi. I khuapi lianpen zong Rangoon pan, Yangon in ki khek aa Calcutta leh Bombay zong Kolkata leh Mumbai in kikheek hi. Min kheek pen thupi/thupi-lo, lian/neu tehna pidan ruler, hi lo hi.

‘’Minam min kheek hangin khantohna om tuan lo’’ cih pen thuk muh zo lo, picing zotak lo ngaihsutna ahi hi. I minam min amaan i neih manin, minam suahngalna confidence, aangtanna, pride leh minam picinna, mature national spirit ong nei sak hi. Hihte-in nampi lungsim ong guan aa picing khantohna bulpi khat ahi hi. Avanin kimu thei, kilawng thei nate bek khantohna icih leh acingtaak nai lo ngaihsutna ahi hi.

Tanglai-in Kawlgam laizang ah Zo Kumpi, Zo Minam, Zogam nei ngeite i ihi hi. Chin min tawh gam i nei ngei kei hi. Khuata, khua neute ah tuni dong Chin kithei lo hi. ‘Chin’-tawh, kisaktheih pih ding bangmah om lo hi.. Mi dangte ong kona ki thuak kha thei zawsop hi. Inter-State leh Division bawhlung suih ciangin, bawm tawh ong ki ko thei zeel hi. 2015 Nov. kha sungin, Pu H. Vantio, Vice President ong suah ciangin, Facebook sung ah ‘Bawmpi’ khat tawh i mi bup leitung muh dingin ong ki selpho hi. Midangte-in ong etneu theih nading min khat ahi ciitciat hi.

Tua ban ah, Chinlung suang kuahawm pan mi piangin ‘Chin’ kici ahi hi. ( In Search of Chin Identity p5) Hih min pen Pasian um mite zat ding min hi lo hi. Pasian bawlsa mihingte suanhawm pan piang cihna min ‘Chin’ zangh leng, na tapa-in midang khat ‘’ Kapianna ka pa hi’’ ci-in tuapa min azat tawh kibang hi. Na lungkim ngap hiam?

Ahih hangin, hih thu ka gen hangin, tu-in Chin pan Zo aa khel pah ding ka gen kei hi. ZO, leh Chin kilamdang aa, ZO pen Khamtungmi khempeuhte (khempeuh) ii minam min ahihna, tangthu bu sung aa om bangin i theih ciat ding agen ka hi bek hi.

Nidangin Zomi, Laimi, Chomi etc ih zat hangin kikhen na ding, ki el na dingin ki zang lo hi. Ei hun ciangin kitot na,ki -elna in ih zat leh kisum mahmah ding aa kiamlam manawh ding hi hang.

Khamtung mite i Minam Min ding ki thukim lohna pen Rangoon Arts and Science University,( RASU), ah university sangnaupangte sungpanin 1950s pawl in ong piang khia thu ahi hi. Kei RASU ka tun kumin tua thu na sa-vitvit lai hi. Student Union Hall sung aa kinial nate ka lap aa anunglam ciangin, kei mahmah zong tua vai debate-te ah ka kihel kha zeel hi.

Tua hunin, kikawk, kinialna om mah hi. A hang na thei na? I tangthu kuamahin i theih loh hang bekbek ahi hi. Tangthu reference tawh alak thei kuamah om lo-in ei aa ciat deihkaih thu tawh kam tungnung kituh kinialna vive ahi hi. Kei teekteekin ka theih khak thu ahi hi. Tua ahih manin, khotak, muibuntakin kuamah’n a kisaangthei dingin agen thei om lo-in ki-akgual-khen zeel hi. Tua bang teng tawh hun bei toto hi.

Tu-in upmawh-deihkaihna, nialzawh thu tawh thugen hun hi nawn lo hi. Sen mipil, Mangkang mipil, Kawl mipilte-in laibu sung ah ana ciaptehnate uh siang singsengin i lak thei ta hi. Tua ciaptehnate sung ah, ei Mualmi khempeuh ahi, ‘’ Kuki/Lushai/Chin a kici mite avekpi-un Zomi (Tua alai at hun un, Zomi ci-in officially-in ki at nai lo aa, Jo, Yo, Dzo, Sho, Zho, cihbangin ki at hi) ahi uh hi’’ ci-in na ciamteh ciat uh hi. (Rethinking Our Identity—JSZD, ZOLUS 2016-17, p186-202 sim in)

Silence means consent ! Tua ahih ciangin KL Malaysia aa ka thugen, ka siksan, hih atung aa ka article pen Chinland Media sung ah kikhah thei lo ahih manin, Khanglam sanggamte’ makaipite tung ah personal email tawh ka khak kawikawi khin zo hi. I Zogam uk makaite zong kipia khin hi. I gam uk lutangpi ninna leh i Pi-in zong sim khin uh hi. Tangthu vive kisiksan ka hih manin kuamah’n ong nial nading om lo hi.

Nidang, 1950s lai aa RASU Union Hall aa ka kinial dan uh tawh van-leh-lei-in ong kikhai hi. Tua hun lai hi leh, ong kinial ziazuau pah ding aa ka computer ah zong tazo nawn lo ding hi. A hang na thei na? I tangthu laigil tawh thu kigen ahih man ahi hi. Tun dai khipkhep !.

Hih bangin ong dawng uh hi “ Dr JSZ Dong, Thank you very much for your article on Our Identity. I appreciate you very much. Keep on going to enlighten all of us. May God bless you. Warmest regard, ………… …… ong ci uh hi.

Tua ahih ciangin sanggamte aw, nidang thu peuh gengenin lau ding, patauh ding hun hi nawn lo hi. Thumaan gen ihih manin bangmah meidawi pih ding om lo hi. Lau kei un. Hih thu pen awmpho-in UN dong paak iuiau-in thu i gen ngam hi. Thumaan genin lau lailai leng bang cih ding? –‘’Zomi’’ sihpih ngam kei si ni!

Limtak na sim uh aa na tel pahlian uh hi. Ei lehkaihkaih, laulau bang lo-in: “ Keep on going to enlighten all of us. “ ci-in ong hanthawn ta uh hi. “May God bless you”. ci-in thupha ong pia lai uh hi. Mipil tampi om uh hi.

Ei bel i theih loh mah, itel zawh loh mah lau pihpih, asialam bekbek ah kaikai in “ Kitotna, ki-elna piang ding, kisum ding – kiamlam manawh ni“ cih teitei pen meidawivai hi aa pasalvai lo hi. Lau-in, ei-leh-ei i kikhoh zawsop bang lo-in : “ONG HANCIAM INLA MI KHEMPEUH ONG TEL SAK IN” ci-in ong thukimpih uh hi. Nidang bang aa atoi / ki-elna bangmah om lo-in tu-in ong thukim pih ta uh hi. Lau niloh leng mailam kinawt zo lo ding hi, sanggam aw.

Naupang kimawlna bangin minam thu kizangkhai zat lua hi. Kipawlna azai huam thei ding mah hoihzaw maw? a toi theithei kikhen ding mah hoihzaw maw? kikup phat ngaihsut phat ding kisam hi.

Minamthu ki zangkhai hi deksuai lo hi. ‘’ Hill tribes, Kuki/Chin i cihte Zomi ahi uh hi”. Thumaan gente, ‘’zaangkhai kici lo hi. ‘’ I vekpi-in Zomi ihi hi’’ cih khit nungsang ‘toi’—‘kikhen nading’ ngaihsutna hi lo meek hi. Tangthu siksan ihi hi. ‘’ I vekpi-in.’’ ka cih nungsang azaizaw kammal ka thei nawn kei hi.

Mipil tua zahin ‘’ I vekpi-in i Minam Min ‘’Zo hi’’ ong cih uh “naupang kimawlna bang” acih san teitei tawh, ‘’Penglam’’ ci aa ako tawh, ‘’toi’’ aci zawsop’’ tawh i om ciangin Zomi mainawtna tha kiam sak hi. Zomi-in ei ‘’kamphen kul loteng bek huam hi” cih pen atoi, kuaciik ngaihsutna hi bek aa tu-in tua ngaihsutna si khinzo hi. Tu-in, ‘’Khamtungmi khempeuh i vekpi-in Zomi ihi khin hi’’i kici ta hi.

Nampi lungsim, nampi ngaihsutna nei-in, i mipil neihte i pahtawi i laptoh theih ding leh agen thute uh i saan theih ding hun ta hi

Hih in kipumkhat nading ngiimna hi aa, ‘’Zo pen Tedim, Falam, Haka, Matupi, Mindat, Kanpetlet, Paletwa, leh Zaaang Zomi, Asho, i vekpi-in mikhat-sakhat, unau-sanggam ihi hi’’ aci ihi hi.

*** Na phawk kha hiam? :– Mangkang thukan mipilte-in, Zo hi ana cihte uh ei Tedim lam zong hibeek lo-in Haka, leh akhanglam aa mite agen uh na hizaw gige hi. Hih thu ong tel le uh ei sangin Zomi ong deihzaw thei lai ding uh hi. Tua ahih manin, amau sung pan lai atat thei khatpa-in,” Tedimte’n Zomi no aa bek bangin la kei un” ci ngei hi. Hihin khiatna nei hi. Haka-te avekpi dektak taanglai pek pan Zo Miphun kici uh hi. Dr. Dongno