Chin Common Language ding etpakna ~ Dr. Dongno

Chin Common Language ding etpakna ~ Dr. Dongno

June 29, 2019 ni-in ALL Chin Association-te-in Zomi (Chin)’ Taang Pau, Common Language khat neih ding vai kikupna nei uh hi. Dr C. Thang Za Tuan Tedim/Tonzang tang dingin athu genna i za khin ciat ding hi.

Ama thu sunna:
1. Tua kikupna ah ama thu sunte anuai aa bangin kei muhna kong kum nuam hi. Taang Pau, common language, ‘bong saga’ bawl ding ciangin zuih ding, ngaihsut ding thu nam nga ong sung khia hi .

• (a) Mi phazah, population, tawh kizui-in teel ding maw?
• (b) I Zogam’ capital-te pau khat zang ding maw?
• (c) I Khamtung minte min bulpi, Zomi, zang ding maw?
• (d) Kuate pau bulphuh ding?
• (e) Awsuah daan, intonation, ahoihpeen teel ding maw?, ci-in teel ding ong sung khia hi.

Kei muhna:
a. Mi tampente pau zang ding maw?

Zopau pen pau nam khat bek ahi hi. Awkaih/awsuah tawm kilamdang bek ahi hi. Tua ahih ciangin, Teizang, Saizang, Losau/Lamzang, Sihzang, Khuano, Thado, Zo, Dim,Paite, cihbangte pau nam tuam hi lo Zopau awsuah/awkaih, accent, kilamdang bek ahi hi.

Mun khat pepeuh ah pau nam khat teel ding hi lehang, mi atam peenpeenin azat pau pen a common peenpeen hipah hi. Hih pen u-sa-pay, ( first priority ) hi pah hi. Tua pau atampeen azangte mi gina mah maw, mi muanhuai maw cih et lai ding bek ahi hi.

Zopau azang pen : Tedim + Tonzang + Cikha mi ph azah : 96,000 + 32,000 +12,000 = 140,000 hi. (2014 census). .(Dong No, Na Thei Na? 27.6.2019) Falam gam sung ah Ngawnte zong Zopau azangte ahi hi.

Chin State sung BEKBEK ah Zopau azang mimal : 140,000 + Ngawnte phazah. (Ngawnte bangzah cih thei keng. (Mi phazah amal, atel baih dingin, tul tungsiah bek i la ding hi. Gtn 96,836 pen 96,000 in i gen ding hi)

Kalay-Kabaw teng ah Zomi Chin State sang tamzaw om hi. = > 140,000

Tua ahih ciangin,

• i. Chin State : 140,000 + Ngawnte
• ii. Kalay-Kabaw + Yangon(7,000) : >140,000 i + ii = 300,000 val
• Iii India gam, Manipur ah Zopau awsuah azang : 400,000 val ( 2011)
• iii. KAWL gam leh MANIPUR State ah Zopau azang : 700,000 val
• (MIZO State sung ah Teizang khua 10 val leh Thangkhal khuate kihel nai lo.)

Mimal 700,000 valin Zopau zang aa, Zomi (Chin kici mualtung mi) atampeente zat kampau ahi hi.

b. Myodaw-te Pau Zang Ding Maw?

Koimah ah Myodaw, State Capital aa kizang pau common language ding cih thu anei gam leitung ah om lo hi. Ngaihsut in zong neih ding, gen khiat ding zong hi lo hi. Medeaval hun lai aa ngaihsutna hi aa, tu hun tawh ki tuak lo hi.

c. Ih Khamtung Minbulpi, Zomi Zang Ding Maw?

Zomi cih pen i minam min hi aa tu aa i kikup pen Zopau hi. Thu tuam tuak hi.

d. Kuate Pau Bulphuh Ding?

Tua thu aki kum ihi hi. A atampeente zat ahoihpeenpeen kuate pau ahi hiam cih akikum ihi hi. Pau nam khat ‘Common language in bawl ding’ ci-aa, thatang, aana tawh ki gum sawl hun hi nawn lo hi.

e. Awsuah-daan, ‘intonation’ Zui aa Teel Ding Maw?

Ei pau ciat ‘intonation’ hoih sa tek kha thei ding hi hang. Ki thukim nading baih lo ding hi. Hun bei-in sawtpi kinial kul kha thei ding hi. Ki itna susia ding hi.

June 27 ni aa, ‘Na Thei Na? Chin State ah Zopau azang mi tampeen’, cih ka article ah hih thu tawh kisai, subdivisions teng aa kizang pau dangte tawh mipha zah tawh siangtakin etkaakna kilak khin zo hi. Tua lai ah,

1. Falam gam ah Mimal Phazah : 52,000 ahi hi. Falam gam ah, nam khat leh nam khat awsuah , accent, kilamdang bek hi lo-in akithei lo pau tampi om hi. Tapung pau Zangiatte’n thei lo, Zangiatte’n Khualsimte pau thei lo, Laizote’n Tlaisunte pau thei lo cih bang hi aa, Laizo pau azang mi, kigawm atam peen 50,000 hi. Kalay-Kabaw ah tua zah pawl bek om hi. India gam ah om lo uh kici thei hi.

2. Haka gam/Thantlang gam : Mimal phazah, 117,000 hi. A kithei lo pau tuamtuam om uh aa, Hakate’n, Mara pau thei lo, Zotung pau zong tawh kiho thei lo, pop. 30% kiim, 40,000 Haka pau in pau uh hi. Kalay-Kabaw kuam ah 20,000 kiim a om uh hangin Haka pau azang lo tampi om uh hi. Gangaw ah zong a om uh hangin, pau kithei lo vive hi aa, Kawlpau tawh kiho uh hi. India gam ah Lakher, Marate om uh aa Haka pau tawh kibang lo hi.

3. Matupi : Mimal 56,000 pha hi. Pau kibang lo, kithei lo tampi mah om hi. Matu(Batu) pau azang 30,000 kiim om hi.

4. Mindat/Kanpetlet : mi phazah : 77,000 hi aa khua khat leh khua khat pau kilamdang vive ahi uh hi. Mun kici pau azang tam uh aa,46,000 bang hi ding hi. Saw, Zaw, Kalay-Kabaw ah om lo, India ah om lo uh hi.

5. Paletwa : Minam tuamtuam om uh aa,pau kibang tawm mahmah uh hi. Khumi pau azang 40,000 kiim khawng ahi hi. India/Bangladesh ah om lo uh hi.

Zopau tha hatna leh tha neemna

A tung ah i gensa mah bangin, Zopau azang mimal 700,000 sangin atamzaw hi aa a nampi mahmah pau ahi hi. I awkaih/awsuah mun khat leh mun khat tawm kilamdang in atuamtuam ahih manin, a-etlawm, colourful, mahmah pau ahi hi. Zopau asinte adingin pau dangte sangin theih baihzaw-in, “kammal lawh hak om lo hi” ci uh hi; tawmvei sungin thei pah uh hi. Aw-gin neemin ngaih nuam aa ‘yin-kyi’ in aw tol lo hi.

Zopau azang mite sung ah pilna, lai siam, tampi om hi. Kumpi sung ah zong za lian leitung bup kipawlna (UN) ciang dongah makai in a omte ahihi. Sumzon zong ahatpeente mah hi aa, Mandalay khuapi, Yangon khuapite ah hotel lian pipi khawng nei ngiimngiamin, Pasian thupha sangte ahi hi.

Thukhualin hamphat nang, ngah nading om leh lion share, ‘nebum’ nuam ngei lo, midangte ading ngaihsut sakin upa lungsim neizaw hamtang hi.

Zopau pen kicing, rich, mahmah hi. Adiak in adjectives “em-aam” ci leng, i mitkha ah, agol, a thau, mel khat kimu thei pah hi. “Guau guau” ci leng, amit-in na ensim kawikawi-in muanhuai lo, na gu nuam cih ong lak hi. ‘Belbal’ ci leng, a tom, gawng lo, alu zong ama adingin gol pian cihna hi aa, “bilbel” ci leng tom napi ithuai-in pahtakna hi leuleu hi.

Mal khat asia leh apha-in ki khel ziau thei hi. Gtn. Adverbs, ‘ngiu ngeu’, pen itna kammal lungduai, thumang cihna lim hi aa, ‘ngeu ngau’ pen a tun sang, kun kawmin taang lo-in lungkim pha lo-in ngaklah cihna lim hi. ‘Likliak’ pen siangtho lo, puan zong gina nei lo-in, gawng in lungkiat huai, hehpihhuai sakna leh itna lakin, ‘liakluak’ hi leh, siangtho lo, kihhuai sakna, muhdahna, selphona ahi hi; tampi, tampi om lai hi. Midangte pau ah hih bang pau om lo hi.

Tha neemna lam panin, Zomite-in midang limlim leh apau thupi ngaigsut zaw kha thei hi. Zopau tawh mi hopih leh atheih loh ding maizum lak kha zenzen zawsop uh hi. Midang khat Zopau tawh a hopih ciangin, ‘pau dang thei lo- Zopau bek athei’ akisak ding thupi laak lua kha uh hi. Kisaktheih pih ngam lo hi. Zopau, Zo tawh kisai na khat pepeuh aniam, atul – a khanglui vai-in ngaihsun kha uh hi.

Kisaktheihpih inla Zopau aangtangtakin pau in. Zopau icih ciangin, Teizang, Saizang, Lamzang/Losau, Khuano, sihzang, Dim, Vangteh, Zo, Thado, Paite, Gangte, Simte, Kawmte, etc.,etc. te awsuah/ awkaih tawh kipau khempeuh Zopau ahi hi. English pen, England, America, South Africa, Australia gam mite awkaih tuamtuam accent, tawh apau bangin ei zong awkaih/awsuah ‘accent’ tuam ciat tawh Zopau apau ihi hi.

Mi pawlkhatte-in, Zopau ah “ ‘R’ leh ‘F’ om lo ahih ciangin picing lo hi” aci nuam om hi. English ah “R” a om hangin, ‘r’ aw zang luakluak khol lo uh hi. “Upper” pen ‘ apparrr‘ ci lo-in, appa’ ci lel uh hi. ‘r’ aw koi ah om hiam? “rrr” akilang sak pen kalate ahi hi. English mahmah ah, “F” tangin ‘Ph’ kizang thei kawikawi lua hi. Bangmah thupi lo hi. Tua-in Zopau baih sak hizawin sin nop zaw lai hi.

Zopau azang Kawlgam leh India ah mi 700,000 val om hi. [“Na thei na? “ (27.6. 2019), sung ah 600,000 ka ci hi. 2011 kum India Census ka et kik ciangin Zopau azang vekpi 400,000 val pha aa, tua nangawn Mizo State aa Zopau azang mi pha zah kihel lo lai hi.] India pen Chin State adingin gamdang tawh kizoppih sumbawl partner lianpeen ahi hi. India gam ah Zopau azang , 400,000val om hi. Zopau Zopau mi 700,000 val in (Kawlgam leh Indiagam ah) azat pau nampi, pau thupi ahi hi.

Tua ahih manin Chin State ah Common Language bawl ding i hih leh Zopau lo siah adang om lo hi. Dr. James Dongno