Child Tax Credit, D.C Statehood vai, U.S Supreme Court vai (April 30)

US News Update Tuam Tuam: 2021 Child Tax credit, D.C Statehood vai, U.S Supreme court vai (April 30, 2021)

1) Child Tax Credit 2021 vai (Innkuan te Kha sim huhna sum ngah ding vai) – Nung deuh aa ki vaihawm khia 1.9 trillion Covid-19 Stimulus Relief Bill tawh kizawitawn in child tax credit pen kum 5 pan anuai siah Ta khat in $3,600 leh kum 6 pan kum 17 kikal ta khat in tax credit $3,000 ta ngah ding uh ahi hi. Abeisa 2020 tax return ah tax credit pen kum 17 nuai siah Ta khat $2,000 ki ngah aa, tua pan $ 3000 ah hong khang sak uh ahi hi.

Ahi zongin child tax credit 2021 ngah ding sungpan alang (half amount) pen kha sim in hong kikhak ding aa, July kha pan December kha sung i tax return sum hong kikhak bang lian in hong kikhak ding hi. Mai tax return bawl ciang alang (half amount) pen Tax return ah ki tuat sak thei (claim) ding ahi hi. Gentehna:

• – 2020 Tax return pen “Joint Married” tawh abawl NUPA khop khat in kumkhat $50,000 or $ 100,000 pan anuai siah ngah in:
• ~ kum 5 pan anuai siah Ta khat anei ten huhna sum $300 kha sim (July kha pan December kha sung) ngah ding uh aa, kum bei tax return tuat ciang $ 1800 ta claim thei ding uh hi.
• ~ Kum 5 pan anuai siah Ta khat leh kum 6 pan kum 17 kikal Ta 1 anei ten kha sim huhna sum $550 ta ngah ding uh aa, kum bei tax return ciang $ 3,300 ta claim thei ding hi.
• ~ Kum 5 pan anuai siah Ta khat leh kum 6 pan kum 17 kikal Ta 2 anei ten kha sim huhna sum $800 ta ngah ding uh aa, kum bei tax return ciang $ 4,800 ta claim thei ding uh hi.
• ~ Kum 6 pan kum 17 kikal Ta 3 anei ten kha sim huhna sum $750 ta ngah ding uh aa, kum bei tax return ciang $ 4,500 ta claim thei ding uh hi.

** Ei ma innkuan ciat in bangzah ngah ding cih i theih nop leh anuai aa weblink ah kien ding hi – 2021 Child Tax Credit Calculator: https://www.kiplinger.com

2) D.C Statehood vai

U.S Khuapi Washington, D.C huam District of Columbia pen State khat ah bawl dingin Democrats lam te hanciam keei uh aa, April 22 ni in House ah vote kila in Vote 216-208 tawh legislation pass uh hi. Senate ah debate leh vote kila lai dinguh ahi hi. Senate ah tulai tak Republican senators 50 leh Democrat senators 50 om in kikim lian uh aa, vote akikim leh Vice President nu ii vote tawh thu khensat dinguh ahih manin Democrat ten zawh sawm uh ahi hi. Abeisa ciang dong District of Columbia (D.C) pen federal district in akiciam teh ahi hi.

D.C ah Democrats 95% bang om uh ahih manin D.C in state khat in hong ding hi leh Senate ah Democrat senator khat hong kibehlap ding cih Democrats lam te geelna ahi hi. Republicans ten belh US gam aphut I pu i pa (Founding fathers) ten D.C pen state khat din ding geel ngeilo uh aa, Khuapi (capital) ding bek in geel ahih manin I pu I pa te ii deihna pelh ding I hih manin ka sang zo kei dinguh hi ci uh hi. Tua bek thamlo in U.S thukunpi tawh kituak lo aa, D.C statehood bill pen “unconstitutional” hi ci in nial uh in, Democrats te ii power deih man hi ci uh hi.

Rep. Guy Reschenthaler (R-Penn.) in U.S constitution “Article One, Section Eight, Clause 17″ sungah “the district will be a 10 square mile federal district” cih kingelh ahih manin Democrats te vaihawmna pen thukhunpi tawh kituak lo (unconstitutional) hi ci hi. U.S states 22 pan Attorney General te in zong District of Columbia (D.C) pen state khat aa din ding nial na bawl khin uh hi. Hih vai Congress in hong pass zen zen hi leh U.S ah state 51 hong pha ta ding ahi hi. Hi vai bang cih ciang hong tung ding hiam et toh toh lai ding ahi hi.

3) U.S Supreme Court vai

Democrats lam te in U.S Supreme court ah Justices 9 pan 13 ah khan toh dingin bill khat vaihawm uh aa, Supreme court ah Liberal (democrat) lam ten a uk zawh nang hanciam uh hi. Tulai tak U.S Supreme court ah Justices 9 om aa, tua lak ah 6 pen conservative (Republican) lam te hi uh aa, 3 pen liberal (democrat) lam te ahi uh hi. Abeisa hun in Former President Trump in conservative Justices 3 guang zo ahi hi. Pu Biden in Liberal Justices 4 guan beh sawm ahi hi.

4) U.S Southern border crisis

Pu Biden kumpi hong suah zawh aa kipan Mexico gamgi pan illegal immigrants te hong lut ziah ziah uh aa, Southern gami tawh akizom Arizona leh Taxes state ten thuak zo nawnlo uh ahih manin “state of emergency” tangkoh khiat dong buai na piang ahi hi. Pu Biden kumpi in gamgi – border pen hoih tak kembit lo bek thamlo in alut nuam teng lut sak mang ahih manin January 2021 pan tu dong ciang US-Mexico border pan guk lut (illegal) mi 1.1 million pha ta aa, kum bei ciang 2 million dong hong guk lut dingin kilamen ahi hi.

Hong lut te lak pan central America gam te ahi Honduras, Guatemala, leh El Salvador te pan tam pen uh aa, gam tuamtuam pan zong hong lut uh hi ci uh hi. Tua lak ah migilo (criminal) leh U.S susia dingaa ahanciam ISIS migilo te zong tampi hong lut ding cih um mawh uh ahih manin mailam U.S gam aading lahuai mah mah hi ci uh hi.

5) U.S Covid-19 vaccine update

Tu ciang ciang U.S gam sungah Covid-19 vaccine akisun khin mi 99.7 million bang pha ta aa, gammi ii 30.4% bang in vaccine sun khin ta uh hi. U.S ah tulai tak mi (population) 300 million kiim kiom aa, seh thum suah seh khat (1/3) in vaccine sun khin ta cih na ahi hi. Tu in US mun tuamtuam ah ol tak in vaccine kisun thei ta ahi hi. Abeisa hun te ah President te ahi Pu Trump, Pu Mike Pence, Pu Biden, Pi Harris te aa kipan gam makai teng in zong sun khin ta uh aa, ei mipi ten zong lungmuang tak aa I sut ding ahi hi. Covid-19 natna pen veng nailo leh tam tek tek lai ahih manin akua mapeuh in vaccine amanlang thei thei in I sut ciat ding thupi mahmah hi.

6) Maryland State in maituam (mask) vai pulaak khia

Maryland State sungah Covid-19 natna ngah thak kiamna tawh kizui in apualam (outdoor) ah maituam (mask) tuah hamtang ding cih thu khun pen ki lakhia ta hi ci in Gov. Larry Hogan in taangko khia hi. Tua hi aa, apua lam I pai khiat ciang maituam thuah kul nawnlo aa, ahi zongin Market (zii) I pai ciang indoor (asunglam) ah thuah kul lai ahi hi. Mipil doctors pawl khat in belh Covid-19 vaccine nih vei I sut zawh ciang maituam thuah kul nawnlo hi ci uh aa, ahi zongin CDC in bangmah genkhiatna nei nai lo ahih manin indoor ah maituam thuah kul lai ahi hi. Update bawl to to zel hi. Ref: IRS website, The Epoch Times, Fox news, Breitbart/ Thomas On Sian Mung (Thomas Mung Guite) Washington D.C April 30, 2021. MOMNO Media & Museum