Charleston khua a biakinn a mivomte kaplumpa sihdan kipiata

Charleston khua a biakinn a mivomte kaplumpa sihdan kipiata

Jan. 12, 2017: South Carolina state sunga om Charleston khua-a om Emmanuel AME Church kici biakinn ah Bible study a neite June 17, 2015 in mivomte mi 9 a kalumpa Dylann Roof Tuesday (US standard time) in sih dan (death penalty) kipia ta hi. Dylan Roof pen US gam adingin minam huatna hangin a gamta “federal hate crime convictions” kicite lak panin sih dan tuak masa pen hi lai hi.

Dylan Roof thukhenna a kineih lai-in Dylan in a gamtatna hangin kisik kina them khat zong nei lo a, thukhen ten (jury) ama mawhsakna dingin thukhenna naikal thum sung genna nei uh a, Dylan in a kisik kikna kammal khat bek pulak lo ahih manin lungsim natna nei hi ci-in thukhen ten sih dan piak dingin thukhenna na nei uh hi.

Thukhente lakah khat bekin sih dan piak ding a thukim lohna gen hi. Dylan in bel, “Ka nuntak sung thonginn ah hong khum un.. tua lo kei adingin a hoihzaw om lo hi,” ci hi. Thukhen ten sih dan piakna ding thugenna a neih lai un Dylan in poisakna bangmah nei vet lo hi.

Dylan in South Carolina state sungah sila neihna deihna lim lahna dingin a kikhai lan Confederate flag kici kum 50 sung Statehouse ah a kihai pen a kilak khiatna dingin South Carolina governor Nicky Haley in thukimna a piakna hangin kila khia a, tua in minam kihuatna leh kipumkhatna piangsak ahih manin mivomte tungah gal a om theihna dingin a gamtang hi ing ci-in Dylan gen hi. Dylan in AME biakinn ah mivomte a kaplup ma-in Confederate lan tawh maan kizaih in social media ah khah khia a, mivomte leh mikangte kikal ah gal a om om theihna ding a deihna thu tuangsak hi.

Dylan in Emanuel AME Church ah bilble study neite a kaplum ma-in bible study neina a om mi 12te lakah minue 45 sung va tu a, mi 9 that in, a thah lai-in mivomte huatna thu a gennate leh tua thupiang khempeuh teci pang dingin mi thum that loin hing khawi hi.

More: Biakinn sungah mivomte 9 a kaplumpa thukhenna kipanta

Dylan Roof in thukhente kiangah a gamtatna hang a gennop loh hangin, “Mi huatna lungsim nei ten a mi huatna hangin a gamtatna panun a lahkhiat ding uh kilawm hi,” ci hi. US federal in hih bangin ngongtatte thah dingin a kimawhpaihte pen 2015 in Boston Marathon kici gamlapi tai kidemna ah bomb a puaksak Dzhokhar Tsarnaev sih dan a piak khit nungin Dylan Roof tungah sih dan a piak kikna hi pan hi.
Source : The Hindu/Thang Khan Lian