Catholic Pawlpi in Laisiangtho behlap lo hi, akipsak hizaw hi ~ Rev. Fr. Damian Dal

Catholic Pawlpi in Laisiangtho behlap lo hi, akipsak hizaw hi ~ Rev. Fr. Damian Dal

1. AD 367 kum in St. Athanasius in Laisiangtho thak sunga om Mathew pan in Mangmuhna dongin Pasian thu nungta taktak hi cih thu na kipsak hi.

2. AD 393 kum in Hippo khua a om Siadawpipa St. Augustine in Laisiangtho thak sunga laibu 27 te leh Laisiangtho lui sunga laibu 46 teng pen Meeting sungah Pasian thu nungta taktak ahihna hong kipsak thuah leuleu hi.

3. AD 417 kumin Pope Innocent (Khatna) in Laisiangtho lui 46 +Laisiangtho thak 27 te pen Pasian thu taktak ahihna hong kipsak kik khit ciangin Christiante in Laisiangtho kician a nei pan ih hihi. Tuama in Laisiangtho minpua tampi tak om a, tua teng sung panin Catholic Pawlpi in nasia takin hanciamin Laisiangtho thak 27 + Laisiangtho lui 46 te hong khenkhia hi.

4. AD 419 kum ciangin Carthage khua ah Siadawpi teng in Meeting hong nei uh a, Laisiangtho lui 46 + Laisiangtho thak 27 te pen Pasian kammal a hihna athak in hong tangko leuleu uh hi.

5. 1214 – 1228 kum sungin Cardinal Stephen Longton in Laisiangtho alian, aneu (Chapter & Verses) in hong khen silsial sak hi. Cardinal Stephen Longton pen 1214 – 1228 kum in Siampi hi lai in, Cardinal suak nai lo hi.

6. 1440 kum ciangin John Gutenburg Press panin leitungah a masa pen Catholic Laisiangtho hong kithohkhia hi. Leitungah ah akithoh khia masa pen laibu in Laisiangtho ahihi. Tua hun laiin Christian sungah RC simloh pawlpi dang om nai lo hi.

7. 1528 ciangin Fr. Parguni (Dominican priest) leh Robert Stephenus (Press a nasempa) in Laisiangtho kikhenna alian aneu (Chapter & Verses) te hong puahpha to kik leuleu uh hi.

8. 1522 – 1534 kum sungin Martin Luther in Laisiangtho pen Hebrew kam pan in German kam tawh Laisiangtho hong letkhia hi. Martin Luther in Laisiangtho hong letkhiat ma in Catholic Pawlpi in Laisiangtho 626 vei na thoh khia khin hi.

9. AD 1551 ciangin Estein in Lungdamna Laisiangtho (Gospels 4 teng) pen aneu a lian (Chapter & Verses) in hong khensak hi. Atom in gen lehang AD 400 pan AD 1440 ciang dong pen Laisiangtho pen alui 46 leh athak 27 hi in, a vekpi gawm 73 hi. Tua pen tuni dong Catholic pawlpi in ih neih zah leh ih zat ahihi.

10. Martin Luther in a paihkhiat Laisiangtho te anuai a teng hi.

Laisiangtho thak pan in:

• a). James Laikhak (The Epistle of James),
• b). Jude (The Epistle of Jude),
• c). Peter Laikhak nihna (2nd Epistle of Peter),
• d). John laikhak Nihna leh Thumna (2nd and 3rd Epistles of John),
• e). Hebrew Laisiangtho (The Epistle to the Hebrews)

Laisiangtho lui panin:

a). Ecclesiasticus b). Job.

John Calvin in a paihkhiat Laisiangtho te:

a). Baruch, b). Wisdom of Solomon (Pilna Laisiangtho), c). Tobias, d). Judith, e). Ecclesiasticus (Sirach), f). Macchabees Khatna, g). Macchabees Nihna, h). Esther Laisiangtho.

Hih John Calvin paihkhiat teng pen tuni dong ciang pawldangte Laisiangthobu sungah om lo ahihman in pawldangte in RC te’n Laisiangtho behlap uh hi hong ci ahi uh hi. Tuhun ciangin thu thei, laa thei, Laisiangtho lam pilna sangpi aneite tuabang in mawk pau nawn lo uh hi. (Taken from a book ‘Upna leh Kammal’ written by Fr. Damian Dal)