Bus sungah aommawh naupangno khat ki bawlsiagawp

Bus sungah aommawh naupangno khat ki bawlsiagawp

Khuasung kikawmna Public Bus sungah aommawh naupangkhat aki bawlsiat laitak Video Clip ki khahkhia hi. Southwest China sungah thupiang kici a, Bus sungah akithuah Security Camera panin Video Record akibawlkha ahihi.

Video sungah naupangno khatin pasal atukhat akhetawh 3 vei khawng tuanphei sese hi. Thumvei atuatkhit ciangin tua pasalpa zong ahehsuakvat in tua naupangno ii apuanngawng panin manphei a, sual satsuk namawk hi.

Tuatawh lungkimlo in, naupangno ii alu pen akhe tawh 3 vei khawngmah tuatbehsuk sawnsawn hi.

Hih thupiang tawh kisai in Toutiao News te’n agenkhiatna ah abeisa Friday nikhat in thupiang ci uhhi. Sichuan Province, Suining City sungah sangnaupangpa pen sanginn atuahciang in amahguak Public Bus tuangin aciahlam ahihi. Tua naupangno pen kum 7 aphapan ahihi.

Hihbangin aki bawlsiatlaitak Bus sungah atuangkha Passenger adang pawlkhat inzong mukha uh a, numei khatin tuapa khawlsak in, sual ah alum naupangno pen phongto cihi.

Passenger pawlkhat te’nzong Bus Driver zasak in, tuaciangin numei khatin Police te sampah hi. Video Clip sungah tua naupangno abawlsiapa pen kisiktuak hetlo in omhithiat cihi.

Tuabangin naupangno abawlsiapa pen kum 21 aphakhin khat hi a, aminpen Guo cihciang bektawh Surname bek ki pulakkhia hi. Police te’n manpah uh a, ni 15 sung kemcipding, thusit thudotna neiding uh cihi.

Naupang abawlsia Gua kicipa in agenkhiatna ah tuani anasepna ah lungsim gimmahmah in aciah cihi. Tua naupangno pen Bus sungah ommawh mahmah in, tu in ci’n asawl hangin tu hithiat nuamlo in kimawlmawl cihi. Tuaciangin tua naupangno in akhe tawh thumvei khawng tuanphei masa sese ahih manin, aheh suakvat in agawl panin manphei in leilak asatsukna cihi.

Tuabangin ka gamtatkhak manin khial kakisa mahmah hi ci’nzong genkhia hi. Tua naupangno pen liamgawpna bangmah omsamlo in, ahi zongin Hospital khatah kipuak cihi.

Naupangno ii apa in agenkhiatna ah katapa pen aommawh theizelkhat hi a, ahi zongin midangte aheh sakgawpthei hisamlo hi ci’n genkhia hi. Anu leh apa te anih un nasem uh ahih manin, tua naupangno pen amahguak Public Bus tuangin sang akahkhat ahihi.

Hihvai tawh kisai in Video Clip aki khahkhiat ciangin Social Media tungah Comment tuamtuam kipia ngeingai hi. Pawlkhat in naupangno mawhsakzaw uh a, anu apa te’n hilhlo ahih manin, mipi “Society” te’n thu ahilhsak hi acihsan hithiatzong omlel uhhi.

More: China Kindergarten naupang sanginn geikhat ah apuakkham omin mi 7 si, 66 liam

Ahi zongin atamzaw inbel naupangno pen hehpihhuai kisaciat a, abawlsiapa pen kimawhsakzaw veve hi. Naupangno pen nawngkai khathei mahding hi, ahi zongin satnopleh satziauding hi a, hizahliang in bawlsiatding hilo hi acizong pawlkhat omvevesam hi. ZD Sawltak #zomidaily