Breaking & News update: Russia – Ukraine vai

Breaking & News update: Russia – Ukraine vai (March 02, 2022)

1. Tuni New York ah akibawl UN General Assembly emergency session ah Russia in Ukraine abuluhna nial ding leh deihlohna pulak khiat ding “resolution” vai vote khai na kinei aa, tualai ah Gam 141 in thukimna vote pia uh aa, gam 5 bek in thukimlohna vote pia uh ahih manin Russia te ngongtatna UN ah nasia takin nialna kinei thei ding dinmun ahi hi.

Tua resolution sungah Russia in a galkap khempeuh Ukraine pan amanlang takin apaikhiat dinguh ngetna zong kihel hi. Hih vote akhiat khit zawh lian ciang UN Secretary-General António Guterres in vote khia UN members te tung phatna leh lungdamkohna nei hi ci uh hi. Hih resolution aading vote akhiat ma un Ukrainian Ambassador Sergiy Kyslytsya zong kiding sak in khut kibeng ziah ziah in thapia uh hi ci hi.

2. Russia leh Ukraine palai te anih veina kikupna nei dingin Belarus gam ah tungta uh hi ci in Russia 24 news in taangko khia hi. Tua kimuhna ah akhat veina aa akihel Palai teng mah kihel kik ding hi ci uh hi. Bang teng thukimna nei dinguh cih ngak phot ding ahi hi.

3. Zanni Geneva ah akibawl UN Human Rights Council kikhona pi ah Russian Foreign Minister Sergey Lavrov in Zoom tung pan thu agen lai takin meeting hong kah U.N Palai (Diplomats) 40 val te Khan sung pan paikhia diam diam in “boycott” na nei uh ci uh hi. Tutna ah China, Venezuela leh Syria cih te ii palai te bek cian hi ci uh hi.

4. Ukraine in tuni akibawl UN General Assembly emergency session ah Russia te in international law leh UN thukhunte pelh in gamta in Ukraine gam buluh ahih manun U.N Security council permanent member pan paikhiat sak in ding ngetna Ukraine Foreign Minister Dmytro Kuleba in nei hi.

Tulai tak UN Security council ah US, UK, France, China leh Russia te pen veto power nei permanent members te hi uh aa, UN Security council ah thu khat peuh peuh leh Resolution khat peuh peuh akivaihawm ciang amau veto power tawh nial thei, block thei ahi hi. Tua hangin I Kawlgam vai zong China leh Russia ten veto power zangin hong nial zel uh ahih manin UN ah I misok MAL te bangmah kicih thei lo ahi hi.

5. US Ambassador to UN Mrs. Linda Thomas-Greenfield in Russia te in Ukraine buluhna ah tulai tak UN leh leitungah akikham bomb leh thau vui thautang te zat sawmuh hi ci in tuni akibawl UN General Assembly emergency special session on Ukraine ah genkhia hi.

More: Russia – Ukraine vai nai 24 sung thu piang tuamtuamte

Abeisa hun in Russia President Putin in Nuclear bomb leh thautang te kiging – ready ding thupikna nei ahih manin kilinglawng mahmah hi. Ref: CNN breaking news, Twitter, Yahoo News *** News Update zong LIVE tawh kikhah ding ahih manin kimu tek ni…. Thomas On Sian Mung (Thomas Mung Guite) Washington D.C March 02, 2022