Bombi sungtenkawm ah vankham apua numei 4 Yangon Airport ah kiman

Bombi sungtenkawm ah vankham apua numei 4 Yangon vanlengtual sungah kiman

Bombi sungtenkawm ah vankham selsim in Kawlgam pan azinkhiatsawm numei 4 Yangon International Airport sungah kiman cih 7Day News pan kiza hi. Tua numei 4 tepen zanni in Yangon vanlengtual sungah akiman uh hi a, vankham pen bengh ihcih Heroin vankham ahihi.

Tua numei 4 tepen koipan hongki pankhia cih aki sitcian ciangin Shan State sungpan vive kici hi. Numei 2 tepen Kutkai pan hi uh a, adang numei 2 tepen Mong Kung pan ahihi.

Tua numei 4 tepen zanni zingsanglam in Yangon panin China Airlines tawh Taipei zuanin alengkhiading in akithawi uh ahihi. Yangon Airport sungah alenkhiatding ciangin Security Check nawkphei uh a, thunei te’n abanban in sit uhhi.

Tua ciangin numei 4 te lakah numei 2 te ii bombi sungten kawmah vankham apuaksimlam uh Airport Security te’n mukhia uhhi.

Bombi sungten kawmpan amuhkhiat vankham tepen kum 53 aphakhin Yan Saik Chin kici ii kalkawm pan Heroin 100 grams, kum 40 aphakhin Lee Hway Li kici ii kalkawm pan Heroin 95 grams leh 65 grams cihbang in mukhia uhhi.

Tua vankham Heroin tepen Plastic Bag tawh hoihtak tuncip bikbek in, Tape tawh matdenmasa uhhi. Tuakhit ciangin akalkawm ah hento in, bombi sungteng tennelhsuk uhhi ci’n Airport Police Officer khatin genkhia hi.

Tua akiman numei 4 teng hoihtak thu akisit ciangin tualak ah adang numei kum 51 aphakhin La Yee kicinu inzong vankham Heroin apuak hi a, ahi zongin vanlengtualsung aom dailenbuk ninbung sungah kapaaikhiakhin ci’n genkhia hi.

Airport Police te’n tua acihna dailenbuk azon uhciang in ninbung sungah Heroin 365 grams tak aphakhat mukhia takpi uhhi.

Hih numei 4 tengpen avek un kimansuak uh a, palik te’n thudotna neisuaksuak laiding uh cihi.

Related: Myanmar leh Thai gamsung ah vankham tampi ki haltum

Yangon Anti-narcotics Police Officer khatin agenkhiatna ah hih numei 4 tepen thusitna kineihbeh dinga, koipan in hih vankham te angahkhiat uhhiam, kuatung ah apuakding, apiakding uh ahiam, kipawlpih kuateng nei uhhiam cih limtak in kikankhia laiding hi ci’n genkhia hi. Sawltak #zomidaily