Malaysia biakpiakna, thungetna munte ah a ngongtatsawm mi 7 kiman

Malaysia biakpiakna, thungetna munte ah a ngongtatsawm mi 7 kiman

Malaysia gamsung aom kikhopna, biakpiakna muntuamtuam ah a ngongtatsawm, Terrorist Attack abawlsawm mi 7 kiman cih theStar pan kiza hi. Tua migilo tepen Sabah leh Johor State sungpanin akimankhia uh ahihi.

Abeisa February 27 paniin March 15 sungteng Bukit Aman Special Branch Counter Terrorism Division te makaihna tawh Operation tuamtuam kibawl zelzel a, tuabangin Operation akibawlna panin migilo 7 te akimankhia uh ahihi.

Tua akimante lakah mi 6 tepen Johor sungpanin akimankhia hi uh a, Islamic State (IS) Cell tetawh akipawlkhawm uh ahihi. Hih migilo te’n Muslim biakna ahilo, adangdang biakna te ii kikaihkhopna munte ah ngongtatna bawlding in akithawithawi uh ahihi. Tuaban ah Police Personnel tezong mancip in thahlupding geelna neikhin uhhi.

Inspector-General of Police Tan Sri Mohamad Fuzi Harun in agenkhiatna ah hih akimankhia te lakah aki mankhia masapen mi 3 cihi.

Tuate lakah amakai Mastermind pen kum 37 aphakhinkhat ahihi. Tuapa pen setvanbawl asiam mahmah Technician khat hi a, Johor Baru sung aom biakpiakna munte ah bangci ngongtatding cih ageel avaihawm cihi. Tuaban ah migilo tetawh akipawlkhawm dingin mithak akaikhawm, Recruit abawlbawl khatzong ahihi.

Tuaban ah kum 49 aphakhin khatpa pen Security Guard asem hi a, migilo ngongtatte gamtatzia ding ahilh Adviser khat ahihi. Tuapa pen migilo te lakah amakai khatmah hi a, athusim apualam ah agenkhia khatpeuh aomleh thatlumding ci’n aseppihte alauthawngsak mahmahkhat ahihi.

Adang akiman khatpa pen kum 30 gualpawl hi a, tuapa zong Security Guard asem khatmah ahihi. Hihpa pen Malaysia gamveng te kiangahpan thauvui thautang ngahtheih nadingin avaihawm kici hi.

Hihte ii ngimna ahihleh Malaysia gamsung ah ngongtatna bawlmasading uh a, tuakhit ciangin gampualam aom migilo kipawlna te omna ah taikhiading cih ahihi.

Tua mi 3 teng akimatkhit ciangin Operation kibawlkik leuleu a, adang mi 3 mah Johor sungpan in kimatbeh leuleu hi. Tuate lakah kum 25 aphakhin khatpa pen Waiter asem hi a, amakaite’n Police Personnel te thatding, mancipding in asawlkhiat kici hi.

Tualo adang mi 2 tepen kum 22 khatleh kum 23 khat cihbang hipan uh a, anih un Singapore gamsungah nasem uh ahihi. Tua tegel pen thau leitheih nadingin sum thalawh in avaihawm uh ahihi.

More: Malaysia, Kota Baru aom Methodist Christian biakinn leh Hindu Temple ah Petrol Bomb kilot

Tua mi 6 teng Johor sungah akimatkhit ciangin, Sabah ahzong khatmah kimatbeh leuleu hi. Tuapa pen kum 31 aphakhin, Abu Sayyaf kici migilo kipawlna ah akihel Member khat hi a, Bomb bawlzong asiam mahmahkhat kici hi. Abeisa January khasung inzong Malaysia gamsung aom Methodist Chiristian biakinn leh Hindu Temple ah Bomb kilot ngeikhin hi. Sawltak #zomidaily