Biakna taktak (True Worship) ~ JK Kam

Biakna taktak (True Worship) ~ JK Kam

Biakpiakna ih cih pen biakna pawlpite leh amaute ngeina leh dante a gennuam hilo a, ih mimal in Pasian tawh ih kizopna pen agen hizaw hi. Biakna ih cih pen biakna pawlpi tuamtuamte hilo hi. (Worship is not religion or church denominations)

• Biakna ih cih pen nipi sim biakinn a hunbawl SERVICE hio hi. (Worship is not Service)
• Worship Service pen ngeina khat in kituat a, Pasian sangin ih ngeina in zo zaw zel hi.
• Biakna ih cih pen ih lungsimtawng tawh Pasian zom a Ama maipha zonna ahi hi.

Leitungah Pawlpi “Church” hong thahat semsem ciangin, Pawl tuamtuam kiphuan a, Pawl lui tawh a kilamdang dingin updan thak tawh pawl thak hong kalsuan ta ahih manin, Pawlpi ngeina ih uang zat luat ciang Pasian biakna taktak om nawnlo in, Pasian kimulo thei hi.

Bang pawlpi ah na om zongin PASIAN NA BIAK NOP TAKTAK ALEH..!!!

1) Pasian lungngai … Pasian hun pia … Pasian zakta …

“A lungsim tawng tawh Pasian a zakta ka sila Job na mu hiam?” ci hi.

• Job bang biakna bang pawlpi kitheilo a Pasian a up lam bek kigen hi.
• Biakna leh pawlpi tawh buailo in Pasian tawh mimal kizop ding thupi hi.

2) Pasian hoihna lungngai leng lungdam kohna kammal pawlkhat hong suak, Tua kammal pen Pasian a bia lungtang pan hong gingkhia ahih manin Pasian in tua lungtang sang a lungkim in angtang mahmah hi.

3) Ih san thupate “Ei sepzawh man cilo a Pasian hong hehpihna hi” ih cihna tawh ih piakkhiat khempeuh lungdamkoh biakpiakna suaka,
ei neihsa Pasian a pia a ih tuat leh biakpiakna suak nawnlo hi.

• Cain in ama khawhsa sung pan mehgah pawlkhat Pasian pia a, Able in Pasian piaksa thupha tuuno tawh lungdamkoh biakna pia hi.
• Pasian na piak pen tavuan hikei henla, na lungdam lahna takpi hi hen.
• Pasian in na van a deih hilo in na lungdamkoh biakna a deih bek ahi hi.

4) Laisiangtho bek na sim leh nanga hi theilo in Lstho kammal bek hi den dinga, tua Lstho sunga om Pasian’ kammal bangin na nuntakna ah a piang thu na genkhiat pen nanga dingin Pasian a hoihna TETTI a gen na hi hi.

• Tua TETTI pen nang leh Pasian hong kizom sak Kizopna KHAU ahi hi.
• Nang sep hilo Pasian sep gen ding nahih manin pilna siamna neih sese kul masa loin Ama hoihna na tuakkhak teng na gen ding hilel hi.

5) Phatna la nasak ciangin timing na OUT in na aw a FLAT phial zong, na lungsim Pasian kiang pan a OUT kei nakleh na biakpiakna Pasian in sang ding hi.

• Music le la siamin bangmah na OUT kei zong na lungsim Pasian kiang pan na OUT a leh Pasian bia na hi kei hi.
• Pasian phat hilo in mite pahtak ding utna tawh phatna lasa ki tamzaw hi.
• Pasian tung lungdamna tawh a pia sangin min deihna tawh a pia kitam zaw hi.

6) Samaria numei hoihlo nu in Zeisu thu a gen leh a khuapihten Zeisu um hi. “Amah hilo, Zeisu ki um hi” Mipil-mihai, mihoih-misia na hi zongin na neih Zeisu thu na pulak pen in mite lawngkha ding hi.

7) Biakpiakna cih pen ei hihna hilo, Amah Pasian ahihna a bia ih hih manin, eite hihna kimangngilh in Pasian bek phawk leng ih biakna lawhcing thei pan ding hi. Ih biakna lawhcing leh Pasian vangliatna kilang dinga, Pasian vang kilang leh Leitungah Pasian gam zai ding hi. (JK Kam)