Biakinn sungah naupang te kepzia ding ~ Go Lian Kap

Biakinn sungah naupang te kepzia ding ~ Go Lian Kap

Adiak in, USA gamsung ah Zomi te’n midang te biak inn kawm in ei pau leh ham tawh Pasian phat nuam i sa mahmah hi; zong a hi takpi hi. A hizongin, Zomi te biak inn kikhopna khempeuh ah inn teek biak inn neite’n sauveipi ong ngai het lo uh hi. Tua a hihman in, Zomi te’n biak inn ki khel themthum hi. Zong mi namdangte’n i omzia ong tel taktak uh teh Pasian biak khop pih ding na ngawn in ong deih nawnlo mawk uh hi.

Bang hang hi dinghiam?

Ei Zomi te pen ta tampi i deih hangin, tate hoihtak ki pantah thei lo, ki makaih theilo a hihi. Mi namdang Mang kang te lak ah kikhawm leng a mau tate biak in sung ah suk tai, totai, kap ziazua cih te omlo uh hi. Ei Zomi te i hih leh biak inn sung ah naupang te gamlum lua in thugen ki ngai theilo liang in nop mawh uh hi.

Bang hang in Mang kang te’ tate biak inn sung ah omdan siam in, Zomi te tate gamlum ziazua tuam se uh hiam? cih ei leh ei ki sit-tel kul mahmah hi.

Kei zong tulaitak ka kikhop na uh minam kim tawh Pasian ka phatkhop pen kum 7 bang ong cing ta hi. US ka tuncil hih biak inn ka kikhop cil lai un ka tatepen mangkang te naupang tawh kibanglo in phia diak uh a, etlawm hetlo uh hi.

Pawlpi mi pawlkhat te’n ong hopih nuam uh a, pawlkhat te’n bel naupang te hangin ong en gual gual uh hi. Keizong, nopsa hetlo ka hihmanin hih thu kandingin ka ki pan hi.

Ka pawlpi mite uh ka maingap mangkang leh namdang te kiang ah bang hangin ko naupang te biak inn sung ah phia zia-zua phadiak in, no naupang te omdan siam diak se uh hiam? ci’n ka mai ngap mahmah mangkang papi khat kiang ah kadong hi.

Tua mangkang pa’n ong gen na ah:

Kikhawmding, inn pan ka pusuah ma un naupang te kiang ah hoihtakin baik inn sung ah omdanding ka gen khol a, a thu manglo penpen inn tun kikteh daan piading ci-in ka gen khol hi. Tuakhit ciang in, thu kangen uh a, Topa tung mahmah ah zong ka ki ap masa uh hi.

Inn pan mawtaw tawh pai khia in biak inn ka tun kuan uh minute 2 khawng a kisap ciangin biak inn sung omdan ding ka thuhilhsa teng mah mawtaw sung ah khat ve ka genkik leuleu hi.

Naupang cihtak in i gensate mang ngilh theizel uh a, a hizongin ” Kong gensa theilo maw?” ciziau in ka mit tolsak in ka hopih ciang kigensate phawk kik uh a, a gamtat uh khawl hi.

Hihbangdantawh nipi sim in ka ki control den uh hi.

Nau pang te a makaih sia mah nu khat kiang ahzong ka dong leuleu hi. A mahpen sang siamah zong a hihi. Tua siamahnu in ong gen na ah:

Biak inn sung ah naupangte a phe ziazua a, a omloh nading in leh hunpi sung ah a daih nading in laidal pawlkhat leh color suaih theiding te pua unla, tua te zutzut sak un.

Naupang te pen, ei kumcingsa te bang in thu ngaihsun thei nailo uh a hihciangun hunpi sung taktak ah a gamlum loh nading uh thupi hi. Ei nu leh pa te a ding in sun hunpi pen i Kha an nek hun hi a, naupang te Kha an nek hun pen a mau bible classes hun a hihi. Tua a hih ciangin, ei nu leh pa te hun ah eidan lian in omsak theih hun hi nailo hi.

Biak na pawlpi a picing mahmah pawlkhat te’n bel, nipi bup sung a dingin Children bible classes ah naupang te a mau kum tawh kituak in nei uh a, siamahte’n a nibup in a mau class ah kem in activities tuamtuam bawlsak in Pasian thu hilh uh hi. Tua a hihman in nu leh pa te’n biakkiakna ah nuamtak in Pasian phat uh hi. Zong biak inn sung ah naupang tai sesu om nawnlo hi.

Ki khop man ciangin nu leh pa te’n a tate uh a mau bible classes tek uh ah lakik uh hi.

Thu khupna:

Kei zong US katincil lai in ka naupangte pen biak inn kikhopna ah phia ziazua uh hi. A hizongin, pawlpi mi mang kang te leh namdang te dong in naupang te kepzia ding a mau tungpan in pilna ka ngah hi. Keizong a mau hilhdan leh pat-tah dan in ka zang pah hi. Ka zatcil lam inbel hilhhak mahmah uh hi; a hangin Ken kum tampi sung mah na hilh lo kha ka hihmanin a mau pen zongsangsuak uh a hihi. A hizongin, a sau vei teh ong hoih toto in Topa tung ka ap takteh ka tate 6 teng mangkang naupangte omdan ong zil thei in mite mai leh Pasian mai ah maipha ngah in minamkim in ka tate paakta uh hi.

Zomi te’n zong mite muh theih, et-theih a i om nadingzong i kanzek, i dawpzek kisam mahmah hi. Hih USA gamsung Mang kang leh mi namdang te tung pan inzong naupangte pat-tah zia pilna i laak ding thupi mahmah hi. Mang kang khempeuh a sia hi peumah lo hi. Mang kang nu leh pa tampitak in a tate uh nak pat-tah lua kisa in eite banzawh ding hilo hi.

Lungdam,
PA. Go Lian Kap
Seattle, Washington State
U.S.A