Bermuda Triangle a na lamdang piangte ~ Pau Tun Thang

Bermuda Triangle a na lamdang piangte ~ Pau Tun Thang

Bermuda Triangle in American khua taw lam Atlantic tuipi gei, Miami, Florida pan Bermuda tuikulh, tua pan San Juan leh Puerto Rico kikal dong huam hi. Hih huam sung tengah na lamdang piang nuam mah mah se hi. Khual zin mite nawk mun mah mah na mun khat hi. Khrismas kuan ciang mimang om nuam diak hi. Hih geia tuipi te pen tai sagih kiim khawnga thuk pian vive ahi hi. Tui tung lam leh nuai lamah tuihual a tuamin om ngiat hi.

Thakhat thu in huih nung vat in , tawp kik vat cih khawngin om nuam hi. Atlantic tuipi laizang ‘Sargasso Sea’ ah a lamdang mah mah ngasa tampi om hi. Hih tuipi pen van lam pan en leeng vakn heuhau hi. Van lam pana leitung khuavak sawt a kimuh theihna pen ahi hi. Nidanglai gam nuam Atlantis zong hih tuipi nuaia om dingin ki um mawh hi.

Hih tuipi a lamdan zia a mukhia masa pen American a mu khia pa Columbus ahi hi. Hih tuipi (Sargasso) pen nitum khit nai nih sung bang tang lai kici hi. West Indies muh khiat ahih pek akipan in hi lai mun pen mun lauhuai khat hi khin hi. Spanish tembaw hih muna pai masa ten na lamdang tampi tuak kha uh hi. Columbus a zin khiat masak pen tungin Bahamas tuikulh ah tui tang zeza mu hi. Tua khit deuh ciang tua a tang pen lengin a tembaw puanzak kan hi. Tua pan tuipi sungah lenglut kik hi. Hih hang in tembaw Compass zong buai lawh hi.

Kum 1497 September kha in Hispaoiola tuikulh geiah ganhing lamdang sea monster ki mu hi. Kum 1497 June kha in huih leh tuihual om lo pi in tembaw kilawk gawp in tuisungah tum hi. Kum 1502 May khga in Spain tembaw hawn 30 lak 26 te huih pi nun hangin tui sungah tum hi. Tuah siatna pana a suakta khat ii’ gen dan in tua huih pen thauvui gim nam ci zen hi. Tua khit kha guk khit ciang tua mun mah ah tembaw 17 val thakhat thu in mang hi. Tua tembaw man dan pen huai lam pana ki hup tawh kibang hi.

August 1800 in USS Insurgent tembaw a mi tuang 340 tawh mang khawm hi. Tua kha mah in USS Pickering zong a sunga tuang mi 90 mah tawh mang hi. May 1968 in zong tuisung tembaw Scorpion nasem mi 99 tawh mang hi. USS Wasp, mi 140 tuanna, HMS Atalanta, British tembaw lian mi 290 tuanna te khawng zong mang hi.

Kum 1967 Krismas zan masa ni in Miami pan a Km 1 na pawlah tembaw meitang zong ki mu thei na pi Witchcraft mang ving veng hi. Coast Guard ten zongin a sulnung bangmah mu lo uh hi. Japanese tembaw van pua tembaw Raifuku Maru zong 1924 phalbi lai in mang hi.

Tuipi sung bek ah hi lo in a tung vansang lamah zong na lamdang piang hi. December 5, 1945 in vanleeng hat Navo Grumman TMB-3 Avenger panga, Flight 19 mang ving veng hi. Hih a mangte zong dingin Martin Mariner, mi 13 tuanna ki sawl khia pah hi. A lamdang tak in hih vanleeng zong mang ving veng hi. Amau zong ni 170 sung vilvel vanleeng 240 banah tembaw ten zong hi. Ahizongin bangmah ki mu zo vetlo hi. US Army C-54 vanleeng, British vanleeng Star Tiger te, Star Ariel kici te khawng zong hih muna mang mah hi.

Bermuda Triangle huam sungah a lamdang thupiang tampi om lai hi.Hih mun pen mun lamdang a kiciamteh den ding khat hi mawk hi. Pau Tun Thang