Bangtan na nuntak sawm a?

Bangtan na nuntak sawm a?

Leitung ah bangtan nungta ding cih genloh mihing a i pian’ ding zong ei’ sawm, ei’ teel, ei’ hanciamna cihbang hi zenzen lo hi.

Mihing a i pian’ khit ciang, a ki-nileh zong om a, kum zalom bang a nungta zong om zel hi. Nuntak tan ding ei’ geel theih ahi diam? Sihna a piangsak natna nam, sim zawhloh ding in om a, liamma hang a si ( gtn accident.. ), lungno mit a muhzawhloh hang a si cihbek hilo in, liamma lah hilo, lungno lah hilo, pumpi kisia ngiat a si ( gtn cancer, heart attack, kidney failure… ) a tuamtuam om hi. I sihdan ding zong ei’ teeldan hi hetlo zel lailai hi.

Bangbang ahi zong in a khanto mahmahte zong nikhat ni ciang si veve hi. Midikte leh mi siangthote zong si a, mi gilote zong si veve hi. Mihaute zong sihna pelzo tuanlo a, mizawngte zong si veve hi. Zato hoihpen a kibawlte a vek in a cidamsa in innlam zuan tuanlo uh hi.

Siavuan siampente zong ahun a tun ciang si veve a, bangmah theilo mihaite zong hun khat ciang si veve hi. Mihing nungta paisuak cihbang omlo bek thamlo sawtpi tak ki nungta khollo lai hi.

Late 90:10 – Kote’ nuntak sung kum 70 bang hi a, cidam le ung kum 80 bang hithei hi.

Kei ka pian kum 50 valta a, LST gendan ahih leh kum 20-30 kim bang bek a neilai kahi hi. Ka nungta phial zong in tuzawh kum 30 ciang bel kamvak leh khoikhoi dondon ding lobuang, ka kimanna ding om nawn hetlo ding hi.

A sau hetlo i nuntak hun sung in a nuam hetlo ding in banghang nuntak sawm mawk ihi hiam? Banghang in midangte’ ading in hehsuah huai leh mitdon’ huai ding peuh in nungta mawk ihi hiam? Banghang in sawt kimang hetlo ding angsung lunggulhna bek tawh duhhop huaiham mawk ihi hiam? Hih hun tomno lel kimang ding in banghang ei le ei ki thupisak gawp nuam leltak ihi hiam? Banghang in simmawh pampaih deidan mah nei luailuai se ihi hiam?

Khangkik na tu na tate na khualna in na duhhop huaihamna om kha maithei ding hi. Ahi zong in bangzah taktak vaankhol, khualkhol zo ding in na ki lam-en hiam? Na tu na tate na khualna hang a na duhhop na huaihamna ong thei na kim napam in na sihkhit ciang nang a bangci mi in ong phawk, ong ciamteh uh diam? Na tu na tate’n ee, nang khualna vang a na noptuampih uh diam?

More: Lai sim a manphatna (Puteek khatin a tupa tungah gentehna a gen khat)

Nang vang in midangte’ et theihloh, tuambawl pampaih peuh ana tuak zawzek uh diam? Tu a kipan mailam “Bang tan” leitung ah na nuntak sawm lai a? Tua hun sung bang teng taktak na sepsawm lai a le? Pau Khat Suan