Banghang gamsung kilemna maban awkcip hiam? ~ Bob Tuangpi

Banghang gamsung kilemna maban awkcip hiam? ~ Bob Tuangpi

Tulai gamsung gamvai khuahun luanziate ih et tak ciangin thalawpna ding omhetlo-in lungkiat thadahhuai simtham hi. Abeisa anunung pen July, 2018 gambup kilemna khawmpi ( 21st Century Panglong Conference) nangawn tutan kizomkik theinailo hi. Tua anunung pen khawmpi ah gambup thudotpi Aung San Suu Kyi in hih khawmpi pen 2018 beima khatvei, 2019 kum sung nihvei leh akisapzui-iin 2020 kum teh khatvei kibawlkik ding hi ci-in khawmpi thukongkhakna ah tangkona aneih tutan kimasuanzo nailo hi.

Gamsung mualmi thautawi kipawlna lompi (3) ahi NCA thukim pawl (10), NCA alutnailo athahat pen FPNCC (7) leh kumpi tawh kihona sungah alutnailo thautawi pawl tampite masuanna ah akician thuthuuk tutan munailo uhhi.

NCA thukimpawl sung nangawn ah kithukalhna tampi hong piangin tunitan kumpi/galkap tawh akician gentaak kamkupna leh masuanna omnailo hi. FPNCC kipawlna sung ah zongh kumpi tawh akician thukimna omzonailo-in tua kawmkal ah FPNCC pawl ah kihel Northern Alliance pawl (3) teng tawh nasiatakin tunitan kikapna vengnailo hi.

Tualo gambup kumpi lam pan ahanciam uh 2008 thukhunpi puah nang tanusemte ( 45 Members 2008 Constitution Amending Committee) te’ nasepsa teng gambup Innpi/Union Parliament ah apuak uh gambup Innpi in pompih khin aa maban omlaite asepzia dingzui (Procedures) damdamin hong manawtto ding uh cih ciang ahihi. 2008 thukhunpi kipuah/kilaih zo ding maw cih bel gambup ah gamvai ah tuamdang thuneihna 2008 thukhunpi in apiak galkap makaite’dinmun leh mailam thukhualna tungah akingak ban ah NLD makai leh mualmi makaite’ gamvai kimawlsiamna tawh zongh thutampi kisaikha ding hi.

Ahizongin kuakua in bangbang gen tase mah leh tulai gamsung ah daihna omlo tetek, thukhun kizelhna thanem tetek, gamsung nuntak khuasakna hamsa tetek, nasepthak kumpi vaihawmzolo, gammite khat leh khat kimuanna omlo tetek, gamsung ah bitna leh khamuanna cihte tawm tetek zawsop hi.

Hih bilbialte’ nungah gamvai leh sumlei sumzuakna lam alen akimawlpite (Key actors) kisaikakna leh kitalsikna tampi tawh kisaikha ding hi. Gamthu ah gamliante in gamsungthu ah hong kimawlna (Power politics) uh leh gamliante’ gamthu aangsung meetna /kituhna/zonna ( National Interest/Geo-politics) hang ziak tampi kihel hi.

Adiakin tulaitak gamsung gam makai asem ( Letimate power) anei kumpi leh tua kumpi tawh liangko kikimin ataithei tuamdang thuneihna anei galkapte leh sumbawl mihau amimuante uh (Capitalists/Cronies) kikal ah thuneihna kitawitehna huzap hang zongh ahihi. Gamsung aa leitang hauhna, gamdang tawh sumbawl kizopna, nisim vaihawmna khempeuh atamzaw hih galkap leh apawlte’ thuneihna nuai ah om uh ahihi.

Hih teng kawmkal ah Zomite in zong ih khuadaksiam kawm muhsiam ( Wait and see) in ih kipeeksiam ding akisap mahmah hun thupi ahihi. Gamsung kilemna maban ahih leh maikum 2020 teh lawhcing/matunnai hetlo ding ahih teh 2020 -2025 hun imasuan/kigalginna kawmin kilamh totoh ding hun hoih ahihi. 2020 -2025 ading siksan kician/platform tubang ih laaklaak hun ding/ih tatna ding khuamkua ih khuathun ding ahihi.

Tua ahih manin, mailam Myanmar gam ahoihzaw lam ah hong kikhel ding pen hih gamsung gamvai leh sumlei sumzuakna abul abaalin alencip thunei tuamtuamte (Interest groups) in gammi mipi mllion 54 valte’ mailam ding hongkhualin, ih gam’tung pan laakkhiat ding/meetna zong bek hilo ih gam’ ading piakkhat hong mitsuanin aangsung khualna sangin mailam saupi gam’ading lungsim picingtakin thukhualna hong neih masiah uh gamsung khuasakzia nuntakna midang gamte’ nung ah ki om tawntung ding hi. Bob Tuangpi