Bang namte hiam i zuihzuih

Mi khangto dingte leh mi khangsuk dingte in ki demna nam khat neih ciat uhhi. Ki demna lo tawh khangto ding baihlo aa, khangsuk ding zong baih tuanlo hi. Ki dem cihteh mikhat tawh ki ciam khol in ki demna om aa, lungsim tawng ah mikhat thuhoih/thusia tawh demna cihte om hi.

Alexander the Great in a khan sungin gal lel ngeilo hi. India atun ciangin “galsim nading om nawnlo maw” ci-in kap liang hi. Khat vei a galkap mangte tawh zudawn peuh kidem in nuamsa mahmah hi. Tua zudawn kidemna na ah alawm it pen khat in zu thawl 18 adawn khit phet in si pah lian hi. Tua zawh asawtlo in, aman zong zu thawl 9 bang adawn leh cisanat ngah in si hi. Asih in kum 33 pha pan hi. Gal lel ngeilo in leitung lumlet hi. Leitung a-uk pa amah leh amah ki-uk zolo hi.

Mi tawh i kidem pihpih bang namte ahialeh, thu gina lo peuh tawh lai ki thukthuk ihihleh i thu theihna kiamsuklam a ki manawh semsem ding hizaw hi. Bek thamloh in ki lempih ki neilo ding hilai hi. Siatna hoihlohna lampi zuihding baih mahmah mawk hi. Nang bek hi keiteh mi khempeuh hi. Mihing lungtang ahoih khat beek omlo hi. A ki dekzo, a ki kemzo vilvel te thuhoih ah a paizo hi bek hi.

Huatna elna cihte ki dem khavak lakleng beihun nei ngeilo ding hi. Zuih ding pen baih sawnsawn hi. Ih zuih khakleh kuama theihloh in lunggim ki guang ki hilel mawk hi. Ih sung i lai-ah gilo khat a kemkem ki hi sawnsawn hi. Tua-in phat tuamna pia cih thadah nuntaakna namsia sak lailai hi.

Amah leh amah a ki ukzo mite khangtoh lam manawh semsem aa, a ki uk zolo te khansukna lam ah nawhpai mahmah hi. Thuhoih tawh mi adem mikhat khangto hanhan in, thusia tawh mi adem mikhat khangsuk semsem hi. Na ut ut na lampi zui-in kongpi ki honsa in om den hi. Ki puahphatna a neih mikhat khangto semsem cih mu ing. Bang namte in lungsim hong sukha aa, bang namte zui ka hiam cih ni simin ki en pha zel ni. Lungdam.