Awkaih pen Minam maw?

Awkaih pen Minam maw?

Pau awkaih khawng minam sa a Zo, Thado, Sizang, Saizang, Losau, Dim, Khuano… etc a akhen thapaite…… thu khat ong dong ning.

Kei pen kabeh Zobeh hi a, kapa losau khua ah piang in, kei Tedim ah khangkhia ing. Ka beh Zo beh ahih hang, ka sanggam ka beh ka phung tampi Sizang, Khuano, Teizang, Saizang, Losau, Zo…. mun khempeuh ah om kawikawi hi.

No cihdan in Zo, Thado, Sizang, Tedim, … etc cihbang a kikhen ding hileh Kei kua minam kahi diam? “Zo Losau Tedim” nam cihbang om ding maw leh? Sizang lak a om ka behpa e? Zo Sizang or Sizang Zo? Bangci dan hi bialbual a le?

Hih pau awkaih tuamtuam teng a a-om kasi kasa pih ka beh teng tawh unau sanggam kahihna, ka tanau, ka innkuan ong khenkhap sawm dan nahi uh hiam? Tuabang nahih uh leh mi gilo taktak nahi ding uh hi.

Tua hilo a, na ngaihsut loh man uh, na telloh man uh a ong khenkhen kha ( a taktak in no zong a tuaci vive hilel sam uhteh ) nahih uh leh thu ngaihsun lo, thu theilo, mihai nahi ding uh hi.

Koi hizaw? Tua a tung a i gen tegel, a gilo leh a hai, nahih kei uh leh na ngaihsutna uh na khel un. Beh khat phung khat, u le nau sanggam khat khenkhen sawm nawn kei un. Pau awkaih khawng minam asa vaivai lai tamlua lai hihang.

Bang paak deih a, bang gah duh?

Zomite, Phuitong paak i deih leh phuitong kung suan ding hi a, apple i duh leh a bul ciangkhut kung ahiphial zong in apple tawh peh ding kisam hi.

Apaak leh agah i muh ciang khuanung pil kha zel hihang. A kung enkik ni, a bul velpha ni. I singno suan bang himawk a, banghang a hihbang pak pak-a, hihbang gah gah mawk hiam?

Zanpak pen zan khuamial lak bek ah paak in, apaak zong neu mahmah ciuciau napi namtui vauvau mahmah hi. Zoheisa san silsialte etlawm mahmah a taamlak singkung lianpi tung bek ah tuang hi. Leidi paak singpi nuai pan galmuh zawhloh phial ding zah in a kung, a paak neu mahmah ciuciau a, ahi zong in a tuanna taamtak singkungpi bup namtui sak zo mawk hi.

Phalbi vuksan in singno a mekcip ma, khuakhal nisa in singno a kaatlup theih hun ma, tuuk dai nom in singno a khansuah theih hun lai, hunhoih khahsuah kha kei ni.

Bang sing suan a, bangpaak banggah lam-en ihi hiam? I ciangkhut kungnote apple tawh peh huai loding hiam? Pau Khat Suan