Aw leh: Yes: Hohkeh kammal kizatdan

Aw leh: Yes: Hohkeh kammal kizatdan

Khiatna kibangding’ ihsak kammalkhat munlehmual leh a zangmite tungtawn-in, kilamdang thei hi. Zodan, Mangdan, Kawldan, Vai (Kala)dan, tu’nbel Zomite tunna Malay, Singapore leh Thaidan cihbang hitoto lo dia?

Mangkang te’n “First Impression” a cihmah bang un, kampau-luheek tawh ki lungkimsak masaphot leh a dangte’n nungzuih ding baihtuam cihna a hihi.

Aw leh -Pu, na genpah ning ei; na paipah ning ei ; nasem pah ning ei.

Yes, Boss. Considered it done.

Hohkeh, Saya. Yahme-Pyiibabii (Manta!). (Cih zawzen, zong kipan nailo pii’ manthei maw?)

Naa khatpeuh a kisawlciang in, kam tangzang in ‘Awleh’ a cileklek khat kimaai-ngapzaw hamtang hi. Tuamah bang in, hamphatding khat a omleh kipianuamzaw pah hi.

Awleh cihphot himhim ding pen, Kawlgam leh Asia-gam pawlkhat pan a khangkhia te aa ding in, nisim seplehbawlna ah, a kizang- a lamdanglo kamzat khat zong a hihi. A beisa hunkhat lai-in Kawlgam sung ah, a zatloh theihloh a hihi.

Zodan:

Ih Zo paunak ah ‘Pute leh lamsak kineh ngeilo’ ih cih mah bang in, ih pianna nulehpa te Pate’, Pute ci-in ki zaahtaak in kilungkim sak hi. Tua siksan ih hitam maw, Kawlgam-Zomite diak-in, nasep silbawlna ah, ih tungsiah hong uk te’ Pu kici laizang hi. Thusim khat bang in, ‘Aw leh’ ci-in, septawh a thuah Pute a lungkim sakzo te’n maipha ngahzaw uh hi. Christian upna tawh gen leeng, vantungmi Arch-angel Gabriel in, Mary a hopih ciang, “Let it be me” ci-in na sangpah a hihman-in, nu-masa Eve ii thumanlohna gahte’ pan hong tankhia-Honpa hongpai nang’ lampi a kihongpah ahi hi.

A kisempah valval’ keizong, hong kiniallo cih pen lungdaai/tawldam tuam phamahmah hi. Pawlkhat te’n sem veve ding napii nial taaltaalphot nuam uh aa, a kinuam zah ding kinuam zolo thei hi.

Hihmun ah thuteldot leh thalnial kibang theilo hi. Phunlo paulo in zong a semtuanlo a ki-om theilai veve hi.

Zomi a kici khamtung mi, a diakdiak in Pasal te’ a kipasalsak zahkhat un, a hihtaktakloh dingpi-uh pannuam khollo uh-aa, a kipat vet uh lehlah ‘Ngal hapaaksa tumkik lo’ ci-in, gentel mahmah in ki minthang hi. A hilo khat zong “Aw leh/ He”, kicinuam pha hetlo hi. Tua hi aa, ‘Aw leh’ a cih khit uhlehlah phunphun ciakciak, thumthum lo-in, a matutdong a sem minam ci-in minnei aa, nasem ding, galkap ding cihbang cihtakna a kisam munte-ah ki deih in, kipaakta mahmah uhhi.

Seplehbawl ding a omleh a semciatciat minam kihi uh aa, mi mai-et/mi maivil zong ih siam phakei pah uh hi. Milak ah kihel pakpak lo in, thumantak tawh kalsuanna munte lobuang ah gualtung kituang vangvang lopah hi. Tuhun ciang in, kawlgam vaigam, micin mitang tawh kithuah in, a hi-ngeungau nawnlo, miluan bang in, a luangsiamthei (Yelaih ngalaih – leeng zualzual) tampimah ki-om ta hi. Innkuan-Sanggam ki-itna zungkha khalo te, nu’meel pa’meel theinawnlo – itding ngaihding theilo-sanggam meelma tampi ki omta hi.

Kawldan:

Kawlte taleuleu zong, sepding seplohding cilo-in naa khempeuh ‘Hohkeh, Saya- Yahme’ hi den keei pong mawk hi. Pawlkhatte bang umhetlo napi’ hang-in bangmah kicithei vetkhollo khat in omthei hi. Kinial lo-in sawlman/kithuman vai phamahmah pong hi. Tua dungzui-in, na sepding khat a dawldawl in, kisawl suksuk in, a nautaang penpen in semkhazeel a hih man-in, kial-laplo thei hi. Nasep zawhding sang-in, thulemtaang ding a hamciam zaw aitam-uh’ cih nophuai phial hi. Kamciam-piakding ki olngaihsut leh, ciampeelding zong a baihpah tawh kibang hi (A citak vanglak lah batpakloh ding’ zong om veve sam hi).

Hong lungkimsak masak pak aa, a thutun ding bel a tuam hi. 1947 Panglong conference bangzong kamciambek hilo laitui-laikung tawh kikui ngiat nangawn, tangtungzo naimahmah-lo zen hi. Khat leh khat kisuamzeel (July 19th- etc..), uitui buaksuahzeel, kigullukzeel cihbang peuh hiliang hi. A hizong Kawlgam sung a mualtung mite’n kulgailopi’ Kawlpau, Kawl-an gimnam khatmah a om kei-leh kicici lai leh kilawm hi.

Mangdan:

Yes, Boss pen bel Mangpau a hihsam hang’ taanglai in a kizangding a hiphialzong’ khangthak English tatak te’n zang lualo ding-in ka ngaihsun hi. A diakdiak nitumna gamlam te’n thutelmeello-in, “Yes” cinuam samlo uh hi. A kisawl khat, a kigen khat, thupi-theihuai a sak uhleh, a teldong uh kanleh a dongpah tilteel te a hi uh hi. Umpah, mangpah buaibuai lo-in ngaihsun-khinkhai hamtang uh hi. Pummuan pahlo kicithei kha ding hi. Tua Critical thinking kici ngaihsut zia pen mihing khantoh nading a hoih, neihloh phamawh a sak-uh khat a hihi. CT kizatsiam kei-leh a tello te-in, kisimmawhna, kineu-etna, kimuanlohna in la-kha thei uh hi. Lungsim picinding leh a munlehmual, thulehla dungzui hizeel hi. A hizong, English te’n milungsim a zawh napi-uh khatpen, kimuhphet in, “Bang hong huhthei ding kaa -Can/May I help you? Sorry leh Thank you” cih kammal te cilzat vetlo ahihna uh hikha ding in ka um hi.

Bangbang aizong, Kawlte’ “Hohkeh-Yahme” a hi’ Kawlkeen kia- in, ih Zopau nusia bek-hilo, Kawlpau theilo ih mipih-sanggamkhat nangawn hong neu-etsakzoliang in, hong deepzawh mahbang un, Mangkang te’n zong, “Can I help you? Sorry leh Thank you.” teng mahtawh leitung lumletzo vilvel tawh kibang in ka mu hi.

Koidan hizaw cihbel ei teeldantek hilo dia maw?

Nantal’suan
(Theihsakna: A ki-atsa laibu ki etkaaklo, khat leh khat kikawkna omlo, lai-atpa tuahkhakna leh ommuan ngaihsutthu hilel hi.)