Australia Senator khatin Chin State gambel te vaitawh kisai UNHCR zumpi Geneva ah laikhaksak

Australia Senator khatin Chin State gambel te vaitawh kisai UNHCR zumpi Geneva ah laikhaksak

Australia gamsung aom Senator Dean Smith in Chin State leh Chin State sung aom gambel mite vaitawh kisai in Chin State sungah tudong suahtakna Freedom taktak omnailo cihthu UNHCR zumpi Geneva ah laikhaksak cih Chinland Post pan kiza hi.

Tua laikhak vaitawh kisai in Renny Ceu Lian Mang in agenna ah “UNHCR in Chin State sung aom gambel mite pen agam ah ciahtheita hi cih agenna hangtawh kisai in Senator Dean Smith in lai akhaksak ahihi” ci’n genkhia hi.

Nungdiak in UNHCR in Chin State sung aom gambel te agamah ciahtheita acihna hangin Senator Dean Smith in alung kimlohna, adeihlohna leh athumsakna in Geneva ah lai akhaksak ahihi.

Dean Smith in tua alaikhakna sungah “Chin State katungkha a, keimah tektek in kamit tawh kamuh ahihi. Khuaneu dongahzong kapha hi. Chin State bup ah mihingkhat ii suahtakna, biakna tawh kisai suahtakna omvetlo hi cihpen kamittawh kamuh ahihi. Maikum 2019 January cianginzong keibek hilo in, Australia gamsung aom MP, Senator pawlkhat tawh Chin State ah paikikding geelna kanei uhhi” ci’n UNHCR zumpi Geneva ah alaikhakna ah gelhkhia hi.

Tuaban ah UNHCR in Chin State gambel mite adingin lampi ahonsak laiding kisamlai uhhi. Agam ah aciahkikding uhpen lauhuailai hi. Amah tektek Chin State ah vahawh in amitmuh thuteng leh Chin State sungah suahtakna Freedom taktak omnailo cihteng agelhkhia ahihi.

Tuaban ah Senator Dean Smith in Chin State sungah ni 10 sung ahawhsung in amuhkhiat teng khempeuh kiciantak in tua laisung ah gelhkhia hi.

Hihbangin Senator Dean Smith pen 2018 January khasung in Chin State sung ahawhtheih nadingin avaihawmsak pen Chin Human Rights Organization (CHRO) leh Chin Chairty te ii makaihna leh vaihawmsakna tawh ahawhthei ahihi. Chin State ahawhsung in khuanu khuapa, biakna makai, Media cihte tawh kimuhkhopna neithei uh a, tuaban ah kumpi lampan in Chief Minister leh Hluttaw Speaker tetawhzong kimuhkhopna neithei uhhi.

Senator Dean Smith pen Chin State gamtai te avei mahmah leh adeihsak mahmahkhat hi a, Australia Citizenship ngetna vai, Malaysia leh India gamsung aom Chin State galtai te vai, innkuan saptheihna 202 Visa vai cihte Australia kumpi ulian tetungah kong gensakding a, ka hihtheihbang in kong hanciampih dinghi ci’n agenkhia khatzong ahihi.

Australia gamsung ah Senator (MP) 76 aom lakah Dean Smith pen Senator (Hluttaw makai) khat ahihi. Tuaban ah Senator Dean Smith pen Australia gamsung aom Senator asemngei teng lakpan Chin State ahawh masa penpenzong ahihi.

Dean Smith pen Myanmar gamsung ah akigawm in 4 veibang hawhngeikhin a, anunung ahawhpen 2018 January khasung ahihi. Tua anunung Myanmar ahawh hunsung mahin Chin State dongah ahawhsuak ahihi.

2018 January khasung Chin State ahawh hunlai in Chin State ii khuapi ahi Hakha bekthamlo, Vice-President Henry Van Thio ii akhualui ahi Thangtlang Myone huamsung aom Tikir khua dongahzong vahawhsuak hi.

Chin State ahawh laitak in apaipih pen Australia gam aom Pu Renny Ceu Lian Mang tawh ahawhkhawm uh ahihi.

More: Thai gamsung aom Myanmar Refugee mi 93 te ki ciahsak

Pu Renny Ceu Lian Mang pen Chin Charity Inc ah Chairman khat hi a, Australia Chin Federation Inc ahzong Vice Chairman asep laitak ahihi. Chin Charity Inc pen Western Australia ii khuapi ahi Perth City ah aom ahihi. Australia Chin Federation cihpen Australia gambup aom Chin khempeuh ki pawlkhawm in nasepkhopna khat ahihi. Lailet: Sawltak #zomidaily