Australia gamsung ah “Cyclone Debbie” kici huihpi guahpi in nawkgawp

Australia gamsung ah “Cyclone Debbie” kici huihpi guahpi in nawkgawp

Northeast Australia tuipinawl tengah Tuesday zingsanglam akipan “Cyclone Debbie” kici huihpi leh guahpi in nawkgawp ahih manin kumpi thunei te’n mi 30,000 bang aomna panin ki hemkhiasak cih Reuters pan kiza hi. Leitung ah Tourist Destination in aminthang mahmah ahi “Great Barrier Reef” kici Queensland Coral Reef aom Resort tengzong nawkgawp cihi.

Cyclone huihpi pen huihhatna tawh kizui in Category 1 pan 5 in akikhen, aki ciamteh ahihi. Cyclone Debbie pen huihhatlua mahmah in, Cagetory Four dongah tungto khinta hi. Kumpi thunei te’n mipi tungah zaksakna nei uh a, hih Cyclone Debbie pen alauhuai penpen dinmun Category Five dongah nitaklam 2pm hunpawl in tungthei khading hi ci’n zaksakna nei uhhi.

Whitsunday Islands aom khualzin mite omna Resorts te ah huihnung pen naikhat in 220 km per hour (135 mph) tawh nungziahziah in, tua tuikulhtung aom Tourists tezong kuamah apusuak ngam omlo in, Hotel Rooms sungah ngakcip uhhi.

Queensland Police Deputy Commissioner Steve Gollschewski in Australian Broadcasting Corporation Television te tungah agenkhiatna ah innpawlkhat pen atungkhuh teng lengkhiata cih hongki zasak omkhinta cihi. Whitsundays ah ko omna mahmahzong hong limnawk mahmahta cihi.

Australian Authorities tezong huhna puakding in nektheih taktheih leh meitui te kigingsa in om uh a, Australian Army tezong huihnung akhawlciang huhna apuak lianding in Standby sa in omkhin uhhi.

Ahi zongin tulehtu inzong Electrice Power kisiatcipna hangin mi 23,000 bang cimawh in omkhin cih kiza ahih manin Emergency Response Crews te’n huihpi guahpi lakmah ah huhna puakdingin kithawita uhhi.

Australia, Darwin City sungah 1974 kum inzong “Cyclone Tracy” kici huihpi leh guahpi in nawkgawp a, tuapen Australia tangthu sungah ahuaisia penpen Cyclone in aki ciamteh ahihi.

Tuahunlai in huihhatzia naikhat in 205 kmh or 125 mph (1-minute sustained) tawh anawk hi a, mi 71 takin sihlawh uhhi. Tuabek thamlo Darwin City sung aom innkhempeuh ii 70% bang siazancip hi.

More: Australia ah sangnaupang numei khat ii aphei tungpan Phone puakkham

Tua Cyclone Tracy khitzawh tutung anawkkik ahi Cyclone Debbie pen ahuaisiapen hiding kici hi. Monday ni in kumpi thunei te’n 300 kph (185 mph) thahatna tawh huihpi in hongnawkding hi, naki hemkhia un ci’n zaksak kholhna nei uhhi. Australia gamsung aom Zomi te kuamah atuahsia omloding in lamen hang. ZD Sawltak #zomidaily