Australia gamsung ah phalna neilo agukom lakah Malaysia gammi tampenpen (mi 62,000)

Australia gamsung ah phalna neilo agukom lakah Malaysia gammi tampenpen (mi 62,000)

Australia gamsung ah omtheih nading phalna aneilo, Visa abeikhin, Permit atawilo Malaysia gammi bekbek 62,000 bang om uhhi. Australia gamsungah gamdangmi tuabangin illegal in aomte lakah Malaysia gammi pen atampenpen cih SBS News pan kiza hi.

Australian Department of Home Affairs te genkhiatna ah 2016 panin 2017 kikalsung bekbek inzong Malaysia gammi visa abeikhit ciangin aomsuak Overstay 10,000 valbang om cihi. Kumkhatsung bekbek inzong Overstay atampenpen Malaysian gammi temah hipah a, tuazom ah China leh US ahihi. China pen mi 6500 hi a, US gammi pen 5000 ahihi.

2016 panin 2017 kikal Department of Home Affairs te’n gamdangmi phalna neilo in Overstay aomsuak mi 15,885 te pawlkhat hawlkhia in, pawlkhat Detention thongsung ah koih uhhi.

Overstay in aomte pen agamah Deportation kipuakkik thei a, tuaban ah Detention thongsung ah kikoihthei hi. Tuabek thamlo, tuabangin Overstay aomkha, amau gamah aciahkhia tezong atawmpen kum 3 sung Australia ah alutkik theiloding in Visa ki khakcip, Visa Ban in kikoih hi.

Australian Immigration Authorities te genkhiatna ah tuabangin illegal in aomte sungpanin sehthumsuah sehnih pen Legal Visa tawh Australia gamsung alut masa uh cihi. Tuabangin Legal Visa tawh alutkhit uhciangin omsuaksuak uh a, Visa beikhin himahleh kum 2 sungbang omsuaksuak uh cihi.

Tuabangin illegal in aomte sungpanin mi 20,000 bangin nasep guksep uh kici hi. Legal Visa tawh alutte pen Visa namtuamtuam tawh alut uh hi a, tualak ah 70% pen Visitor Visa, 15% pen Student Visa, 3% pen Working Holiday Visa cihbang tawh alut uh ahihi.

Australia gamsung ah Overstay in aompen khangsemsem a, abeisa kum 5 hunlaitawh aki tehkak ciangin Overstay in aomsuak pen 6% bang khangtogawp hi.

Australian news portal khat ahi SBS News tetawh Interview abawl Malaysian gammi khatin agenkhiatna ah Visa neilo, illegal in gukom pen kilauden, ki patauden hi. Adiakdiak in Police tetawh kituahkhak ciangin ki lauthawng mahmah hi. Nasep kuankhiat lohbuang innsung ah ka omcip denzaw hi ci’n genkhia hi.

Amahpen Australia gamsung ah kha 3 Tourist Visa tawh nungkum in alut ahihi. Alawm te khatin Australia gamsung natunkhit ciangin naseptheih nadingin Working Visa hong ngahsakning ci’n AUD2,000 (RM6,077) tawh kamciam hi.

More: Australia ah asidek numei khat alunggulh aombangin tuipinawl ah ki paipih

Ahi zongin aphual atun taktak ciangin ageelna bangin lemtheilo a, Tourist Visa zong beita hi. Extend bawlding ahanciam hangin ngahlo sawnsawn a, anunung ah Malaysia ciahkikding sangin, Australia gamsung ah illegal tawh omsuakding khentat hi.

New Zealand gamsung ahzong abeisa February khasung in Malaysian gammi phalna neilo illegal in aom mi 200 kimankhia in, agam ah kipuakkik uh cih kiza hi. Malaysian gammi tezong migam ah cimawh dongtuak tampi omkawikawi veve uhhi. Sawltak #zomidaily