August 24 khit Kawlgam khuahun ~ Pu Thangboi

August 24 khit Kawlgam khuahun ~ Pu Thangboi

Aciang aciang pan in D-Day bekbek akigen ngeingai laitak in tua ading akimuang pen ahi Beh galkap te’n August 24 ni in thu tangkona khat hong nei uh hi

Hamdai Pah Lian

Behte’ tangkona ah buainate avenna ding in thagum hatna tawh kido sang in kikamkupna tawh buaina vensak zawk ding in ngetna ahi hi. Misokte akihel in thautawi teng ki kamkup liailiai ding hi ci’n Col Naw Bu in gen hi. D Day vai kikupna bangmah om nai kei ci’n genlai hi.

En Zu Zi lampan in zong “Nisim D Day hi” cihbeh sawnsawn lai ahih man in tua a kipan D Day vai hamdai ta hi.

Kinung Theih

Hih Behte’ thu tangko hun laitak in Sen kumpi’ palai Sun Guoxiang kawlgam ong pai khinkhian ahih lam ki nungtheih hi.

Amah pen nipi Kal 1 sung taam dipdep in August 28 Ni aciah ahi hi. Aciah khit ciang in ong pailam alang nih un genkhia pan uh hi

Misok bupa tawh kimu ahih lam genkhia uh hi. Misokte’ lam pan hong paina ahang pen kawlgam ah kilemna a omna ding leh Covid gal dona ding vaite hi ci’n genkhia uh hi. Daw Su tawh zong kimu peelmawh ding in ki ummawh mah taleh tuavai pulak khialo uh hi.

NLD That Kei Un

Hih Sen palaipa’ hong pai laitak mah in Sen kumpi in misok te’n NLD aphiatmai ding uh pen Sen in phallo cih thu ngaihtak in hong ging hi.

Misokte’n NLD golum peelmawh ding in leitungbup in a lam-et kawlkal ah hih thu hong ging ahi hi. Hih thu hong gin khit ciang in NLD leh Sen communist party te’ kizopna laite zong hong kilangh khia hi.

La Lepkholhna

Sen palaipa hong paina pen la lepna (song practice) zong ahi hi. Leitungbup in a etcik mahmah ASEAN palaipa kawlgam hong paiding hita ahih man in Sen palaipa la lemkhol a hong pai ahi hi. April 24 ni a ASEAN thukimna nam 5 te sepkhiatna ding zong ahi hi

ASEAN Palai’ Maban

ASEAN Palai Erywan Yusof hong pai ciang in Daw Su te tawh zong kimuh akul ahi hi. Anasepna khempeuh November kha ASEAN khawmpi ciang in report apiak kul ding hi. Alawhcin kei zenzen leh ASEAN khawmpi khit ciang in kawlgam vai saizia ding lampi dang kizong ding hi

Amah bel ASEAN palai ahihma June kha kipat lam in zong Kawlgam hong paingei khin hi

Lutol Bupa

September Ni 1 Ni in misok nihna pa Russia pai hi. Tua lai ah kawl lutol minthang mahmah khat ahi Sitagu Sayadaw Dr Ashin Nyanitsara in zong vazui mawk hi.

Hih lutolpa pen aminthang mahmah aki zahtak mahmah khat ahih man in lamdang kisa mahmah hi. Lutolte’ zehtan hun laitak hi sawnsawn ahih man in kawlte heh phadiak uh hi. Uiko ngeuko in ko ziahziah ta uh hi.

Covid Paulap

Covid paulap in misok te’n zumte khak toto uh a tutadih September ni 10 dong khaksak lai uh hi.

Zumte kikhak ahih man in amimatte uh zong zum kah theilo hi. Adiak in Daw Su zum apai khakloh kha 2 bang phata hi. Zum paikha kei leh a sitnite tawh kimu khalo ahih man in apualam tawh thu kizalo hipah hi.

Hih zumte akikhak sung in Daw Su leh misokte’ kimuhna thu hong ging zeuhzeuh hi. ASEAN palaipa hong paiteh kihonate alem leh zumte zong kihongta khading hi

Pu Van Thio leh Pu No Than Kap

Kumpi nihna Pu Van Thio pen akumpi inn mah ah nuamtak in om hithiat lel hi. Falam kampau sung ah nainganzi vai ah aminthang mahmah Pu No Than Kap zong misokte’ meeting sapnate ah vakah zel lel hi

Pu Van Thio leh Pu No Than Kap te amipih te’n phunsan hetlo in “Dalan” peuh ci’n koko selo uh hi. “Ong lamkhialhpih kei lua un teh” cilel uh aidiam kitheilo hi. Sian aw lum bang Hong sung in. Lungdam, Mung Laan Thang (Tonzang, Zogam)