Atoul, Akhaat, Nukuul, Pakuul pansuah takna

Atoul, Akhaat, Nukuul, Pakuul pansuah takna

Thu masa
Upna tawh kizui in ih biakna muntek ah ki pumpiak khia ngiat a, Biakna nasem ihih vet kei leh Zii neilo, Pasal neilo, Neihsawm vetlo cih pen mihing nuntakna lakah khanggui kizom saklo mawhna khialna namkhat hi gige hi. Tua man in Kumcing khin hi napi’n a etlawm innkuan nuam lamkhia, neikhia kipankhia lo cih pen kimawh sak thei hi. Nukuul Pakuul, Zii leh Pasal nei lo, Nei ngamtaktaklo lam pan in gen leuleu ni cileng’ Nupa kitawng tawng , Tate tawh kitawng kihua, Pilna hauhna abucing in kioh kipantah kitou delhsak zolo te hang in Zii leh Pasal kanei ngam kei hi’ cihthei ding uh ahihi. Ataktak in innkuan makaih ngap lo lua mahmah na hizaw hi. Tua ahih man in innkuan makaih siam zawh sawn in Zii neih Pasal neih ahunlai mah in anei thei te Atoul teen, Akhaat tat, Nukuul Pa kuul pan suakta ahihi.

(A) Bangtaktak hiam akisam
Nisim nuntakna sung ah Sum zongding Pilna zongding, cih ahihi. Tua tezon kawmkawm hunmah in lungsim omzia kikhel kihei den ahih man in Nopsak hunciang in utbangtek in khuasa mihing ihihi. Lungsim siangtho sak nuam leng kihi sitset thei pah hi na pin’ Azulh tat nuam apaalang nuam te ading in zii leh Pasal neih kul lo in nop sakna tam pi om hi cih lungsim nei uhhi. Tua mun ah eite nopsak na pen ei bek in kilawh taak ( We enjoy our consciousness) cih ding ahihi.

Tua hun lian laitak in lawmngaih theihna itna kician aneilo te Nukuul Pakuul khanghampi suak hi. Akum tam ahih man in kineh nawnlo uhhi. Lawmho zia siam lo in pau bakbak uhhi. Aheh sa bang in om thei den uhhi. Tua ahih man in akisam pen in kum tawm lai hun mah in hong ki-it hong kingaih hunlai mah in itna kip alen cip a, Zii leh Pasal nei giap innkuan nu, Innkuan pa ding zonkhiat na in khuak leh sisan pai na ngaihsut hoih diktak in mihing te hong khuasa hongkhansuah zaw sak hi.

(B) Hauh teh Zii nei ding leh Dr ngah khit teh Pasal nei sawm

Tangval pawl khat kumtam sim pianpian in amel theih te in zii neih sawm lo maw? ci-in kidong leh Sum nei nailo ci thei mawkmawk hi. Tu laitak ihpa te’n asumneih teh zi nei hi leh kipiang nailo ding hi. Ih pa in sum nei hi leh khangthak ah sum zong in gamdang paikull lo ding ahihi. Hauh teh zii neih sawm leh Dr ngah khit teh Pasal neih sawm cihpen anei hi nailo asawm hi pan ahih man in kisiik (guilt) na amahmah mawh kisa sim giugiau uhhi. Milak ah lawmngaih thu genkhia ngamlo in maizum thei uhhi. Gam leh Nam ading in nalian pi asem khin ahi zong in alungsim sung ah self -respect kikhuangkhoh na liimci taktak nei lo in om khikhe den ahihi. Tua in ahun lai in Lawmhoih amuh lohna sang in Ahauh khit apil khit teh Zii leh Pasal aneih sawm na pan in amah khialh na kimu kik gige hi.

(C) Ahun saupi ading in belh leh muan suahna

Mikhat peuhpeuh khangmoi khangham nungak tangval, tawh kiho siamte amah le amah ki muang ateitang te atam zaw ahihi. Ki hopih khat peuhpeuh adinmun tawh kituak auukdan tawh kituak in Biakna upna, Gam leh Nam thu, Sumzon sumbawl na thu, Gankhawi siam singno ciin’ lokho uk te thu ahun amun tawh kituak in genpih thei, kuppih thei’ ngaihsutna pia thei ihcih mite Nukuul Pakuul in aom te kitam hel lo zawsop hi. Zii leh Pasal nei ngam ding te leh anei khin sate ngaihsutna siangtho te sung pan om zaw hi. Nuntak gualzawh nopsak na cih pen Hau mahmah, Pil mahmah bek tawh kicing khin lo hi. Ei mau mahmah ihpasal ading mimuan huai, leh ihzii ading mimuan huai, tate ading mimuan huai hih na pan in mailam hunsau pi ading apicing kihi pan suakhi.

(D) Teek hunciang in ahaksa ding thu.

Nupa pawlkhat pen innkuan khat in dingkhia ahih hang ta kineilo zong ki omthei hi. Tua te athu tuam in ngaihsun phot in Zii neilo Pasal neilo taktak in omsuak mawk pen Pasian nasem tumteng ihih kei leh teek hun tak ciang in hongkem hongkhoi ahong don ding isangngam tektek te na leng hamsa hong kisa ding ahihi. Ihnu Ihpa te Ih innkuanpih te gawtna apiapia Nukuul Pakuul ki hikha thei hi. Tua hun teh Ahau pen Apil pen ahizong in mihingkhat i khuasak zia avangkim Pasian piak picingsak zolo khat suak hi. Mihing khat in ki khuangkhoh muanhuai na akicin kei leh agualzo nuntakna kicing anei kici thei lo hi. Tua man in teek hunciang ading ngaihsut kisam aa, atang tattat, Atoul tenten, Akhaat tattat, dinmun pan in ngaihsut na athak kikhel kihei in Nu kuul Pa kuul suah na ding pan kipelh huai ding thu ngaihsun kolh den kisam hi.

Thukhupna

Lawm ngaithei khollo te vaal thei hi na pi’n Lawm tampi angai te zong vaal thei hi. Na dinmun tawh kituak nasak khakloh om thei ding a, kituak lua sii e kei hong cihna hi veh aw cih na zong om thei hi. Atatak in eimau kikhuangkoh na akip ( Treat yourself with ever increasing respect ) ihbawl loh ih neihloh na pan in lawm kitan thei, kinei ngamlo thei hi. Nei ding hileng zong beh leh phung tawh zawl hel zawl len bang akul liang te hamsiatna nam khat kiphul kha hi zo hi. Tua leng kingah lo thei lai sawnsawn hi. Hong ki-it hunlai, Hong kingaih hunlai mikhempeuh in ITNA hun kinei tek ahih man in tua hunhoih laitak in ageel siam te Nu dinmun Pa dinmun ah panlazo ahih man in Nute ni leh Pate ni hun ciang akiphawk tawntung ding te ahihi. Lungdam!

Hau Thang