Atamzaw thukimna ~ Lian Tuang

Atamzaw thukimna ~ Lian Tuang

1 Inn 120 kim a pha mualdawn ah Munnuam a kici khua khat om hi. Mualdawn ahih hangin singkum namkim po in khuahun nuam mahmah hi.

Khuahun nuam in khua mun zong hoih mahmah a, ahih hangin tui hamsa citciat hi. Khuataw lam falong nihna pawl ah lui khat om a tua luitui ne uhi.

2 Khuamite in tui hamsa sa lua in kikumkum uh a, khuakhal sunga I tuinek dingbeek a kicing ding tuibem khat khuakungah lam ni, tuksungin tuikhol ni. Puansawpna le kisilna bel khuataw lui mah zuan lai ni ci in kithukim uh a tua kum mah in tuibem lam in zo pah uhi.

Tuibem panin nek le dawn ding tui tawi uhi. Khuataw lui tuitawi hun tawh kilangdangin nuamtuam sa mahmah uh hi. Thukimna om sa mah bangin gamta uh ahih manin tua kum khuakhal sung khempeuh nektui ding tui olno takin a ngah uhi.

3 Ahi zongin a kum kik lam ciangin mi pawlkhat in khat vei sunsun bangci zo sam dia ci in tuibem ah na kisilsim thei zel uhi. Upa makai pawlkhatte zong kisil bek hi loin a zi a tate in puan zong sawp thei lai uhi.

4 Tua hangin khua sungah tui a zangsim mipite le tui a zangsim upa makaite langkhatah khuakhal hun tui hamsat ding a lung himawh mi pawl khatte kam kinialna ong om zelzel hi. Hih thu pen ong lian semsem a khuazangbup kilawh ta ahih manin meeting lianpi khat nei leuleu uh hi.

5 Meeting sungah thugenna nei ciat uh hi. Papi khat ong dingto a, tuibem a dang khat I bawl zawh masiah kisilna le puansawpna pen a kuama ciat in khuataw lui ah pai tangtang zaw ni, tua hi keileh khuakhal ciangin I nektui ding lui ah I suk tawi kul ding hi ci hi.

Adang khat ding to leuleu a, hih tuibem pen I vekpi a I lamsa hi a tangpi neihsa ahi hi. Aneituam om lo hi. Mi khempeuh in zat theih bangin zat ding hi lel hi. Tui abei leh zong lampi dang khat tawh vaihawm kik ding hi lel hi. Hih bangin mipi tuizat ding nangawn a hazate pen mi kheltatte, khua le tui itna neilote hi lel hi ci in thugen zuahzuah hi. Mipi in khut beng ziahziah hi.

6 Tua ni in mipi atamzaw thukimna tawh thukhentatna khat nei leuleu uh hi. Tuibem sunga tui pen mi khempeuh in deih bangin kizang thei ding hi cih ahi hi.

7 Thukhentatna om bangin mi khempeuh in tuibem tui kizang ziahziah pah a, tua kum tukguah a bei khit a sawt loin tuibem sunga tui zong ong beipah hiau hi.

Tuibem tui a bei ciangin mi khempeuh tuitawi in khuataw lam ah ni dang hunlai mah bangin kizui datdat kik leuleu uhi.

(Hih thu a kikum ding hi leng nang na bangci ngaihsut a) Lian Tuang