ASEAN Summit hongkah leitung kumpi tampi leh Obama aciah khitphet Kawlgam thupiang

Tu laitak Kawlgam khua hun Politics lam thu ngaihsut in neih leng’ lungman huai cih ding simlo adang omlo dan mah hongsuak ahi hi. Obama ciah khit phet thu hoihlo tampi hong piang zaw tawh kibang in ih Kawlgam hoih kik theih nading Pasian khat bek in bawlzo pan in um ingh. Tu sung teng zong Kachin ih behte uh leh mualtung mi thautawi teng tawh ki-lem nading hizahtak akibawl hun sung laitak Laiza khuapi kiang nai aa om KIA te Kachin Military Academy sang omna phual thaupi tang nih tawh sun ahon opkhop (Training) laitak sese (Target) in neih in Kawl kumpi galkap te’n sual uh ahih manin, bo asem ding sitset 23 si pah in, 20 tak nasia liam mahmah cih ciang’ aza kha peuh aa dingin lamdang sak huai lua mahmah thu ahih mah bangin, lamdang asalo kuatu kuata om ding ahiam? Cih lipkhat huai mahmah thu hong piang ahi hi.

Kawlgam bup kumpi ding kiteelna 2015 (General Election) pi sungah Daw ASSK kiteel theihlo nading ngimna tawh akibawl Constitution sung Poh-mah 59 (Sah) cite leh atuamtuam Daw Suu leh NLD te makaihna tawh Kawlgam mi million5 val in thukim suaikaihna tawh akipuah phat sawm Poh-mah 436 cihte khempeuh mah Hluattaw President Thura Shwe Maan in Obama ciah khit hun mah in, 2015 kiteel hun ma in (Constitution) puahphat nading tawh kisai bangmah kibawl loding cih thu leh kiteelna man khit ciang’, akahthak Kumpi thak te’n apuah phat nop leh tua hun ciang kipuah pha pan ding cikheziau kik leuleu ahih manin, leitung level thamlo UN General Secretary dong asem theih luading khat pen angah theilo nading leh kiteelna sung akihel theihlo theihtheih nading Poh-mah (by law) te kipuah pha ngamlo cih thu, kawl zaanglo lai aa saipi pai mahmah tawh kibangin kitalangh mahmah zong ahi hi.

America Kumpi Obama in Daw ASSK inn aa kibawl Press Conference ah agenna khat ah, Zi leh ta neih navai peuh tawh’ agammi khat Kumpi kiteelna ah kihel theihlo ding cih pen lamdang sak huai thu khat leh akiza ngeilo thu khat ahih nathu, lim gen mahmah zong ahi hi. Kawl kumpi’n bel abeisa hun lai galkap kumpi kipatna U Ne Win hun (Mah-Sah-Lah) aa kipan 1988 Aa-naa thein Galkap kumpi (Nah-Wah-Tah), (Nah-Ah-Phah) hun thamlo, Galkap Uniform suah Democracy lam manawh Kumpi U Thein Sein hun dong azak thadah mahmah thu khat uh leh akiktak mahmah thukhat uh zong ahi, (Panglong Agreement) aa Fereral Union deihna hang’ leh vai dang tuamtuam hang’ June 20, 2011, pawl pan kipan 2013 kum nung lam dong kum 2 val sung ih beh Kachin te cimang ding zah dong in kapcip mang uh cih thu leh sen gamgi lam ah tuni ciang dong innlum/ lolum azuan zonailo galtai (Refugees) tampitak gam sung khawng ah bucip lai cih thu ei aunau pih uh ahi, Zomi te’n aphawh kha lai tam mahmah in zong um ingh.

21artist2

Tua thu om napi’n tu kum August kha sung thu lamdang akisa khia mahmah thu ahi Mualtung mi (Ethnic group) te kipawlna United Nationalities Fereral Council (UNFC) teng deihna bulpi pen Fereral Union tawh kiuk nading Kawl kumpi te’n thukimpih leh olnotak khat in, kong pia ding uh hi cih thu Kawlgam News teng Journal teng Newspapers tengah kisuahsak ngeingai zong ahi hi. leitung leh America te mahmah in zong Kawl kumpi in Democracy lampi manawh in apaina pan akhawlcip cih gen thamlo nung tolhkik kici ngeingai in akigensa thu kikupnasa mualmi thautawi teng kipawlna leh kilemna bawl Kawl kumpi (Representatives) Minister U Aung Min leh apawlte thukhensa thukimna (Agreements) teng asawt naivetlo hun tomno khat in akpi leisai kigen mahmah bangin, atuhna, ageina kitheihlo zel dan in om theih pahpah hi.

Thu khup na ah thu piang, thu lamdang teng kaikhawm in gelh sawm leng laibupi khat cing ding aa, kisim taak zolo ding ahih manin, atung aa thu’om khinte tawh kizawi tawn ahi ih Beh Kachin te tawh zong kilemna bawlna teng ah Kawl kumpite (Representatives) teng tawh an anekkhop, tui adawnkhop na uh akhut te uh zong keuman nailo hinapi’n bang thu/ bangla thusim ihtelzawhlo thu om aa, Kawlgam (Political Condition) ahoih to hun manawh aa apai laitak hun hoih hun gal leh sa aa kingaihsutlo hun laitak in, ih beh Kachin Bo suak ding sitset tangval melpiang mi 20 valte thaupi tang tawh kaplum sak leh 16 te silo nungta liam pha mahmah sak theih ziau uh cih thu theih huai leh ngaihsut huai mahmah Kawl Galkap Kumpi te’n America Kumpi Obama leh leitung gamuk Kumpi 20valte ih gam pan aciah khit zawh phet aa asep khiat uh thute ngaihsutna pia kawm leh lamdang sak huai sa kawm in kong hawm sawn uh hi.

Kham Khan Suan (Artist Kyaw Kyaw Oo)