Asawtlo in Kawlgam buaiding ~ Thangboi

Asawtlo in Kawlgam buaiding ~ Thangboi

Tukum February 19 ni in Gambup Innpi (pyi htawng su hluttaw) in akipsak ahi 2008 Thukhun Puahpha Ding Committe te’n tu’n 2008 thukhun etphatna leh puahphatna nasep azolam hita uh hi. 2008 thukhun a om chapter 15 bup leh abehlap teng enkhin ta uh hi. July 17 ni in apuahphat pen uh Gambup Innpi puak ding uh hi.

Tua hun tawh kituak ding in Lutol minam it khengval (ultra nationalist) Wirathu matkhiat ding in May kha 29 ni in Yangon nitumna lam district thukhen zum in thu pia hi.

Tua ni a kipan nisim in amau leh amau “Minam It” ( nationalist) akicite’n Zangkong leh khuapi pawlkhat ah Wirathu’ ading in mipi thunget khopna neiden uh hi. Lutol pawlkhat in makaih hi.

Hih 2008 thukhun puahphat ding vai kawl galkap te’n apatpan a kipan in nial den mahta le uh vote tawh lel zeel uh ahih man in utlo pipi in mang uh hi. Committee sung ah mi 45 kihel a, kawl galkapte 8 tualak ah om hi. Gambup level ah MP akahzo party te bek kihel ding ci ahih man in Chin state pan in minam minpua party lak ah ZCD bek kihel kha hi.

Wirathu tuni dong palik te’n manlo uh hi. Abukna kithei zo nailo ci uh hi. Ama’ ading thungente zong kuamah kimanlo hi. Kuama’ lut khaklohna mun (Shwedagone tung ah) khawng ah lutkhuan ngah lel uh hi.

Kimawlna
Wirathu leh apawlte kawl galkap te’ khut zat ahihlam bel kilangh mahmah hi. NLD in zong atheilo dankhat in bangmah genkhia selo hi.

Deihna
NLD’ tupna kungmuipi ahi 2008 thukhun laihna ding thu ah kengsiah ding a kawl galkapte akithawi uh bel hi ngelngel ding hi. NLD in zong “Ih galte’n tha koi cia nei” cih atheihnop man vua akhahzan phot uh zong hithei ding a, cihna ding mel theilo zong hithei ding hi.

Final
2008 thukhun puahphatna thu gambup innpi hong tun taktak teh bel final hita hi. Final tunma akimawl tuak, akiging tuak lai uh ahi hi.

Buaina bel atawm atam hong om hamtang ding a, buaina hong liatluat loh ding thupi ding hi. Mipi in bel Daw Su it mahmah lai aih teh kawl galkap te’n bel mipi’ tha tawh zokei mawk uh teh. Lampi dang tawh hong kivat vua asuksiat luat ding bel lauhuai hi.

Mipite’ thuak kulselo in thudam tak in khuahun ong kiheina ding thu nget huai mahmah hi. Kiukhat Pan, Mung Laan Thang (Tonzang, Zogam)