Arizona State University ah Post-doctoral Study bawl dingin Dr. Pum Khan Pau hong tung
India gam Visvabharati University, History Department-a Assistant Professor a sem Dr. Pum Khan Pau pen Post-doctoral Study bawl dingin Arizona State University ah a beisa October 8 ni-in cidam taking hong tung khin hi. Amah pen Zomite lakah mipil masa( English-Tedim Dictionary a bawl masa )pu Nok Swan Lian’ tapa ahi hi.
Dr. Pau in North Eastern Hill University, Shillong, panin 2007 kumin PhD hong ngah a, tua PhD a ngah nadingin, “The Zomi(Chins) and the British(1835-1935),” cih dissertation gelh hi. Tu tung Post-doctoral Study pen kum khat sung research bawl ngekngek ding hi a, a thulu in, 
“Trans-border Community: History and Future Possibility of Dialogue beyond Border,” cih hi-in, lunglut huai mahmah hi.
Hih bangin US ah research a bawl theihna pen India kumpi vaihawmsak hi a, candidate tampi lak panin a kiteel ahi hi. Tua manin sum le pai bei khempeuh zong India kumpi mahin tavuan la pah hi.
Dr. Pau pen Lanva veng, Lamka, Manipur a teng hi a, Kawlgam Mualnuam khuasuak ahi hi. Pasian in thupha pia-in a it a zi Nu Niang Van Ngai tawh tapa 2 nei uh hi. Tua hi a, Dr. Pau in kum khat tawn tung cidam takin research hong bawl theih nading le hong zawh theih nading thu ngetpih ciat ni.
Tham lo-in mi tam het lo a kiteelna sungah amah Zomi khat hong kihelkhak pen minam bup tangin angtanghuai pha mahmah hi. Hun awng a neih sungin Zomite omna pawlpite hong pha-in tha hong pia leh zong lunggulh huai mahmah hi. Amah kanin Zomite’ tangthu thei ding zong tam ki-om lua nai khollo kha ding ahih manin hong pha kawikawi thei leh i dotnop le I theinop Zomite’ tangthu tampi hong hawmsawn thei kha ding hi.
A lungdampih,
Sia Thang Ngaih Lian le sia Suang Khen Pau
Dallas Theological Seminary, Dallas, TX
Comment piaknop aomleh...