Apple cidam nangin hoih

Apple cidam nangin hoih

Apple pen singgah minthang mah mah khat ahi hi. Nam tuam tuam tampi tak om hi. Cidamna dingin hoih mah mah ahihmanin gam khangto teah a man tawm sak uh hi. Mangkangte bangin paunak khatah “An apple a day keeps the doctor away” ci liang uh hi. Apple ah vitamin A om a tua in mit thahat sak hi. Sodium(a al) om lo ahihmanin sisan sang(sikhang) ding dal thei hi. Apple pum khatah tui haineu khat dim bang om ahihmanin tua in dangtaak saklo hi. Oxford University a Scientist ten a sinna ah singgah nam a tam neekte lakah 24% in lungtang khawla si tawm hi. Za ah 32(32%) in pumzaw tawm hi. Za ah 21(21%) in natna tuam tuam hanga si tawm zaw ci hi. Hih thu British Medical Journal ah October, 1996 in kisuaksak ngei hi.

Apple ah enzyme nam khat “pectin” kici om hi. Hih pen gilpi ann-gawi a thahat sak ahi hi. Apple i neek ciangin pectin in gilsungah lom(bulk) piangsak hi. Tua in ek khal leh sungpai khawng damsak thei hi. I ann neekte aki gawizan pah loh ciangin natna dang piang thei mawk hi. Misiamte’ gendan in ann neekte gilsungah gawizan loh in a saw tom ciangin gilpi cancer piang thei hi. Apple ah fiber tampi om in tua in cholesterol, sisan luanna bing ding dal thei hi. Lungna leh lungtang khawla sihna hang a tamzaw pen cholesterol san man hi. Cholesterol a niam ciangin BP zong niamin BP san mana pumzaw(stroke) om ding pan kipelhsak thei hi.

I pumpi ah thau(fat) a tam luat ciangin cancer piang thei hi. Fiber in ann neek cianga thau hoihlo cancer a piangsak thei te hup ahihmanin cancer piang ding pan kipelhsak thei hi. Laboratories tuam tuam a etkhiatna pan in apple a compound om ten cancer cells khang lian ding dal thei ci hi. Italian researcher ten nisim a apple pum nih ne zel te’ lakah gilpi leh nawi cancer 9-42% in tawm cih mukhia uh hi. Cornell University ten zong Apple gah hoihna Zusa tung pan in sinna nei uh hi.

Zusa nisim a apple pumkhat a ne den te’ nawi cancer 17% in niamzaw hi. Nisim a pum thum a ne te nawi cancer 39% in niam zaw ci lai hi. Nisim a pum guk nete bang 44% in a nawi cancer ding uh kem thei ci mawk hi. Sinna dang khatah Zusa te apple hawng pia uh hi. Tua bang a piakte uh 43% in gilpi cancer risk niamzaw hi. Tua banah apple –a pectin om in gilpi cancer risk niamsak tuam mah mah cih zong mukhia uh hi. Tua banah digestion dingin apple hoih mah mah hi.

French researcher ten apple a flavanoid namkhat phlorizin in numei si hul khin guh lam natna neite damsak thei cih mukhia uh hi. Apple ah mineral nam khat boron om in tua in calcium neek te guh leh ha adingin a phattuam theih nangin thapia hi. Apple a pectin om in mihing pumpi in insulin aki tangsap niamsak thei hi. A lim lim in mihing te Pasian in singgah ne dinga hong bawl ahi hi.

N.Pautunthang