Apicing lutang makaihoih khat suahtheihna ~ Mang Suan

Apicing lutang makaihoih khat suahtheihna ~ Mang Suan

Lu tang / makaai i cih kam mal in mihing te bil ah a zaak nop mah mah leh a khum mah mah kam mal khat ahi hi. Gam makaai, mi nam makaai , pawl pi makaai, Khua makaai, na sep lian pi makaai cih bang in om a, mikhem peuh in a lung gulh mah mah din mun khat ahi hi.Ma kaai hih na tung tawn in thu neih theih na , sep theih na , zah tak na , nop tuam na cih te hong piang khia hi. Lam khat in gen leng makaai in cih te in khan toh na leh gual zawh na nam khat a ngah mi te ahi hi.

Nung zui mi om lo in makaai / lu tang ki suak thei lo a , a kua ma ciat makaai hoih i suah thei na ding in nung zui mi hoih ki sam mah mah hi. Nung zui mi te i hat na pil na te gawm khawm in i zat theih tak ciang , khat bek ii sep zawh loh na sep lian pi te ki sem zo hi. Nung zui mi te pum khat suah sak theih na ding in a hoih mah mah in pah tawi na kam mal zat theih na hi. Nung zui mi pawl pi mi te sung ah akua in bang lam siam, bang lam ki va cih kan a theih ciang in mi te mai ah pah tawi a siam , gen a siam makaai te in aman pha mah mah van khat a nei mi ahi hi.

Makaai hoih i cih te in na sep khat gual zawh na a ngah tak uh ciang in , “kei” ci in ki sial ngei lo uh a , hih thu tung tawn in hong huh hong pan pih a ma nung zui mi te man tak leh ki cian tak in pah tawi siam uh hi. Tua bang teng tawh nung zui mi te ama ma kaih na sung ah a tawn tung in ki pawl nop na lung tang khauh sak sem sem hi.Mai lam na sep lian pi te sep zawh na ding in tha tam pi ngah sak sem sem hi. Mi pawl khat te in gen siat na leh mawh tut na kam mal te zang thei uh a, mawh siat na kam mal pan in a hoih khan toh na, phat tuam na hong piang khia ngei lo hi.

Makaai pi cing khat suah theih na ding leh makaai sep na ah hun sau pi kip theih na in hang san tak a khen tat ngam na leh, khen tat na tung tawn in hang san tak a sep ngam na hi. Mi tam pi tak te en leng a piang thu tung tawn in khen tat na a neih ngam loh uh man in makaai cih din mun tawh a ki pelh zel uh hi.

Makaai hoih te ii gam tat zia khat in ama khut nuai mi te tung ah na sep pam mun piak siam na hi. Amau tawh a ki lawm a ki tuak sep theih na leh khen tat theih na piak kul hi. A mau te sep na leh gual zawh na te tung tawn in a thu pi mahmah nop tuam na , hamphat na te zong piak theih kul hi. Tua tak ciang nung zui mi te ki pum khat in, aman lang mah leh a ki cian mah mah set (engine) gol pi te bang in sep ding bawl ding khem peuh gual zo tak in hong sem ding uh hi.

Hih mun ah a thu pi khat in i nung zui mi te ii thu tel tak a theih na hi. I nung zui mi te ii pil na,siam na, hat na te leh amau te i lung gulh, lung sim puak zia te tel tak in theih a tua tung tawn in na sep pan mun piak thei na ding in ngaih sut huai mah mah hi.

Makaai khat in a mah leh a mah ki muan na lung tang a vom thei na ding in pil na, theih na,muh na tang zaai na te ki sam mah mah hi. Lung duai a thu khual mah mah mi khat hih kul hi. Lei tung ah theih na nam nih om a,khat in i khuak sung a om thei na leh a pua lam pan a i zon , i muh, theih na te hi.Ahi zong in pil na,theih na,muh na, a tang zaai mi khem peuh zong makaai pi cing suak zo tuan lo uh hi. Na sep na tung tawn in lung gulh na leh na sep pai zia theih na te, gawm khawm in ngim na, tup na anei mi te in makaai dinmun ngah thei uh hi.

Makaai khat in nung zui mi te tung ah ei ma deih dan kam tawh gen ding, sawl ding bek hi khin lo hi. A hun zui in a mau te ii et teh tak ding in sep kul bawl kul hi. Tua hi leh nung zui mi te zong tha ngah sem sem a makaai pi pa mah bang in han ciam a gual zawh na tam pi hong piang khia ding hi. Makaai pi cing khat a ding in gel siam na leh vai hawm siam na zong ki sam mah mah hi. Gel siam na a nei lo te vai (nasep ) no cik khat tawh zong hak sat na tuak thei uh hi. Vaai hawm a siam, gel a siam te, khut nuai mi te pan mun piak asiam te ahi leh na sep lian pi te, khua pi gam pi khat uk zawh na ding dong ciang in makaai pi cing suak zo uh hi.

A kua ma ciat in i neih sa pil na, sian na, theih na te puah pha, zuun pha to to in i neih nai loh pil na, thih na , siam na te, zong in, kan in, sin le hang ni khat ni tak ciang a gual zo mah mah makaai pi cing khat i suak ding hi. Agelh: Mang Suan (Ngen in | ngaih sun in | sem in | lungdam ko in