Angsungkhualna tawh kisai Sumhaupa le Lazarus

Angsungkhualna tawh kisai Sumhaupa le Lazarus

Angsung-khualna pen a lauhuai mahmah kha nuntakna a susia mawhna hi
Na ciapteh dingin kong deih thu in kha nuntakna a susia thei angsung-khualna bangzah in lauhuai ahiam cih thu hi! Hih mihaupa’ nuntakna a huampi in ih et ciangin a mawhna lian lua bangmah om lo hi. Mi that lo hi, guta lo hi, zuau khemin mi’ zi mi’ ta tawh mawh lo hi. Ahih hangin amah pen gimna thuakna mun tung hi. Eite in zong hih thu pan in ih kingaihsut ding thuhilhna tampi om hi.

1. Ei bek ading nuntakna kidop kul hi. “Ka nuntakna ah ka paubang kei a, maan takin ka nungta hi” ih cih tei hangin a kicing nai lo hi hang. Ahang pen, Khrih ading nungta maw, ahihkeileh nang ading bekin nungta na hiam? Cih thu hi. Na nuntakna bangin hong tawsawna bang tupna nei na hiam? Nang’ adingin nungta nawn loin nang’ tang dingin a si pa a’dingin na nungta hiam? (2 Corinthians 5: 15). Mihaupa bangin, nang ading bekin nuntakna tawh na kimansuah kha ding hi.

2. Ih sep dinga kilawm ih sep loh khak ding a lauhuaina theih huai hi. Mihaupa hell gam a tunna pen a sepkhialh mawhna hang hi lo zawin a sep loh mawhna hang hi zaw hi. A kongpi-a Lazarus pen koih cipin thudon lo hi. Tua mah bangin Thukhen Ni ciangin Khrih in mi tampitakte’ tungah: “Ka gilkial laitakin an nong pia kei uh a, ka dangtak laitakin tui nong pia kei uh hi; khualmi ka hih laitakin zin nong do kei uh hi…” ci ding hi (Matthew 25:42,43).

3. Hauhna in lauhuaina sungah hong lutpih pelmawh hi cih zong kidop huai hi. Mi tampitakin a nuntakna uh hauh zon nading bekin zang uh a, ahi zongin tua hauhna in kha adingin thu laihuai tun hi. Hauh nopna in ih lungsim suang lungtang guan a, upna ah a mit taw sakin Pasian hong mangngilh sak hi. Tua ahih manin Jesuh in, “Pasian’ Ukna sungah mihaute a lut ding uh bangzah takin haksa ahi hiam?” na ci hi (Mark 10:23).

Hih hun nunung ah zong eite in a diakin angsungkhualna thu ah kingaihsun pha a ih kidop mahmah ding kisam hi. “Nitawp ni ciangin a lauhuai hun hong tung ding hi: Mite in amau angsung ding bek ngaihsunin, sum bek a itte hi ding uh hi” na ci hi (2 Timothy 3: 1,2). Mihau tampitakte in a hauhna uh tawh kizui-in tawm cik bek pia uh a, a tamzawin piakkhiatna bangmah nei nuam vet lo lai uh hi. Ahi zongin Lai Siangtho in tua banga amau bek kikhualte le sum bek a itte nakpitakin na langpan hi. Jesuh in a hau mihai pa thugentehna a genna na sim lecin, “amau ading bekin a kholcipte pen Pasian’ muhna panin mihau hi lo uh hi,” a ci hi (Luke 12:16-21).

Sum na hau hiam? Na hauh leh “Hoihtakin kidawm unla, na huaiham loh nadingun kikem un” ong ci hi (Luke 12: 15). Mihau Abraham, Job le David te mah bangin mihau na hih zenzen hangin hong kihonkhia thei lua hi. Ahi zongin hauhna ii a lauhuaina kidawm in. Sum pen nasem hoih hi a, ahi zongin to hoih lo ahih lam phawk den in.

Sum tawmbek nei na hiam (ahkl) nei vet lo? Nang sangin a hauzawte haza kei in. Hehpih huai sa zaw inla, thu nget sakin, amaute mawhsak thukhenna nei pahpah sam kei in. Nang zong mihau khat sangin a pha zaw hi tuan lo thei hiteh. Siatna namkim ii a zungpi pen sum it luatna hang hi cih phawk tawntung inla, nang zong sum na neih loh hangin sum it lua kisa-in sum tawh a buai mahmah khat hi thei hiteh. Zawnna in hong gumkhia ding hi cih bangin ngaihsun kha kei in. Lazarus pen a zawn manin vantunggam a ngah hi lo a, Khrih a neih manin a ngah hi zaw hi.

Angsung natna damsak nading thu na thei nuam hiam? Bangmah dang hi peuhmah loin Khrih ong itna thu theih nop taktakna in dam sak ding hi. Nangma mawhna thu nang le nang na kitheih kul a, Khrih’ sisan vangliatna in hong damsak kulin, Khrih tungtawnin Pasian’ itna ciama na lungtang tawh Pasian na it kul hi. Khrih tungah lungdam ding bangzah leiba nei cih na kitheih ciangin, amah na piaklah dingin manpha lua na sak om nawn lo ding hi. Maipuakzia hoih kisakna, phat ding pahtawi ding ut luatna, a maan lo lampi tawn-a pumpi kinialna cihte khempeuh zong angsung khualna vive ahi hi. A taktakin Khrih na itna bek in hihte khempeuh hong laih sakin Khrih ading nuntakna le sepna ah hong makaih thei pan ding ahi hi.

Evan. Suang Dal