Amsterdam khuasung ah mawtaw khatin mipi omna nawkgawp in mi 8 liam

Amsterdam khuasung ah mawtaw khatin mipi omna nawkgawp in mi 8 liam

Netherlands, Amsterdam khuapi sungah Saturday nitaklam in mawtaw khatin mipi omna phulpheigawp ahih manin mi 8 liam cih AFP pan kiza hi. Aliam lakah mi 2 pen limliam phadiak uh ahih manin gimmahmah uhhi ci’n Dutch Police te’n genkhia uhhi.

Amsterdam Police te’n agenkhiatna ah hihpen ngimna tawh gamtatna hilo in, Accident ngiat hiding ci uhhi. Mawtaw hawlpa zong thudotna kinei in, migilo Terrorist tetawh kizopna omloding in ki ummawh a, ahi zongin Amsterdam Police te’n limtak kancian laiding uh cih kiza hi.

Tua mawtaw pen khuasung mipilak anawkgawp khitciangin hawkguam sungkhat ah kiasuk in tuaciangin khawltheipan cihi.

Nungdiak mahmah in London khuasung ahzong mawtaw khatin khuasung mipilak nawkgawp in, mi 8 takin sihlawh uh a, adangzong 48 bang liam uhhi. Tuazawh kalkhat kihaldeuh in Amsterdam khuasung ah hihbang buaina tawh kizomto ahih manin, khuasung mipi te’n Terrorist te gamtatna ahihding patau mahmah uhhi.

Dutch Media te genkhiatna ah hih Amsterdam khuasung buaina pen Black Peugeot mawtaw khatpan akipan cihi. Tua Peugeot mawtaw pen Parking ah hoihtak kikoihlo ahih manin, Police te’n asitding in anehphei ciangin hatsak mahmah in taisak zeza cihi.

Mawtaw hathawllua mahmah ahih manin mipi omna ah mi 8 taihkha a, hih buaina phual ah zato mawtaw Ambulance leh Police tampi in umcihpah uhhi.

Aliam ngawh phadiak mi 2 tepen zato kipuaksuak a, adang te ahihleh aphual ah zatui kibawlpah hi.

More: Japan Company khatin Mandalay Beer Company leisawm

Tusungteng Manchester khuasung Suicide Bomb apuakkhap banah London khuasung ahzong nihveibang buaina piangkhin ahih manin Europe sung aom gamtuamtuam tezong Security akhauhsak mahmah laitak uh ahihi. Sawltak #zomidaily