Amah Tho Kik! ~ Rev. Zam Khat Kham

Amah Tho Kik! ~ Rev. Zam Khat Kham

Khatvei, lim kisuai hoih nono a kikoih/lahna art gallery khat ah puan hoih silh-a kizem mi khat ding hi. I Topa Zeisu singlamteh tung ah a kikhailupna lim kisuai khat mai ah sawtpi ding dedu-in en gega hi.

Tua laitakin pasalno khat hong pai-in a gei ah hong dinga,tua lim kisuai pen mah tawlkhat hong en hi. Tua pasalno bel a nik a puan hoih khol lo a, kizem lua khol lo, ci hi. Papipa in tua lim a khutme tawh kawkin,

“Hua singlamteh tunga kikhai pa na thei hia?” ci-in naupang dong hi. “Thei mah ing, leitung Honpa ahi ve!” ci-in dawng lian bilbel hi.

Tua banga a dawn kawmin naupang in papipa en a hehpihhuaisa mahmah hi. I Topa leh i Honpa Zeisu Khazih thei het kei mai leh kilawmsa ahih manin a lungnuam het lo-in hehpihhuaisa hi. Naupang ahih hangin tua pa hilh nuam pian ahih manin,

“Hua lai-ate pen galkapte, Zawma (Roman) galkapte ai ve, hua numei a kap pen Zeisu’ nu ai ve,” ci-in limtakin hilh hi.

Tua zawh tawlkhat sung pau nawn lo-in om dedu a, tua khitteh, “Amau that zen uh ai ve, that zen uh ai ve!” ci-in a awliing dalhdalh-in gen beh lai hi.

Tawlkhat sung tua banga lim kisuai kisuang pen a et khop khit uh teh papipa in naupanno’ lu-a sam a khut tawh zutsak-in tua mun pan paikhia-a mihon lakah mang pah ziau hi.

Tawlkhat a pai khit, a paina lampi pan veiilam ah kiheii-a mun khat lam zuan-a a pai laitakin, naupang khat nakpi-a kiko tuaituai aw khatza a, a et leh a den-a a lim etpih naupangpa mah na hi hi. Tua naupang in gal sap vangvang ahih manin a tunna mun ah khawl-in ngak hi. Naupang in tua papipa aphak ciangin nak man lo liangin,

“Amah tho kik hi ven! Amah tho kik! Kong gen ding mangngilhkha ing, Amah a kithah hang maw, Amah tho kik hi ve’n” ci-in husam liangin gen daidai hi.

Bangzah-in man ahia! Hih naupang’ thugen sanga thupi zaw leitung vantung ah bang thu om nawn mawk ding ahihiam?

“Amah tho kik!” “He rose again! “ cih thu eite’ adingin bangzah-in manpha! Tua naupang in a phawk kha-a a phawk kha kei zongin,leitunga thupuak (message) khempeuh lakah thuphapuak thupipen leh thuphapuak manpha pen a gen hi gige hi.

Eite’ tunga hong kipia Pasian’ thupuak lianpen bang ahi tam? A Tapa’ thu mah ahi hi. Eite’ mawhna hang/tangin si-a ni thum khit ciangin sihna zo-in tho kik zo hi, cih thu mah ahi hi. Galkapte in singlamteh tung ah khailum-in that mah uh a, ahih hangin sihna zo-in eite’ adingin tho kik khin zohi.

“Eite’ mawhna hangin Ama’n sihna thuaka, eite in diktansakna i ngah nadingin nungta kik hi,” (He was delivered to death for our sins and was raised to life for our justification) ci-in Laisiangtho sung ah i mu hi (Romans4:25).

Amah si-a a nuntak kik manin eite i mawhna mai thei-in nuntak tawntungna i ngah thei hi. Amah tho kik takpi hi! Rev. Zam Khat Kham