Aki patcil in Khai Kam College, tuciang in Kalay University

Aki patcil in Khai Kam College, tuciang in Kalay University

THU MASA :: Tuciangin KALAY UNIVERSITY ahih hangin, aki patcilin KHAI KAM COLLEGE ahi hi. KHAI KAM COLLEGE aki pattuung lam, kei sangin a theizaw omlo ding hi, ka cingam hi. Banghang hiam cih leh, sa bawl bang hileng, a gil kheii aa a eekteng bua in a sawp siangpa; lamdang khatin gen lehang, lothak zuan bang hileng, lovaat, lohal, mangg tomh(seph), lolaii pa bang ka hi hi. Aki patcil limhlimh aa a hamsapi teng a sempa ka hihman ahi hi, Sakhi tuineekin pan lehang

KHALKHA KA PAI NA DAN

Ka khankum, 48- bang ka phakkhit hangin, Khalkha khua gengenloh, Taiingeen pamsiah, Suahliim aki cihna nangawn ka kalkha ngei naikei hi. Ahi zongin, 1989- kum September kha ni 3- ciangin Khalkha khua ka pailoh aa apha mawh thu ahong om ciangin a paipan ka hi hi. Tuabang thu phamawhin;

(a). U Ko Lay, Budget Director, Directorate of Health, Ministry of Health and Physical Education in phone tawh hong samin, a kumkum a khakha aa aki hanciam, Laaitui Station Hospital Central Government panin ki sanctioned zo ngawngaw a hihna; tua Order bel, Administrator, Ministry of Health ah ka va laakna dingin hong sawl hi.

NB:- U Ko Lay in, Administration lam sinin, a line uh aki batkei hangin, Dr. Song Tual tawh UK aa sang a kahkhawmuh ahi hi. Khalkha ah ka pai ciangin, Kawlpi aa om, Dr. Song Tual a lai khak zong keimah mahin pua in ka pia hi. Siavuanpipa zong, tua laikhak angah ciangin, lungdam in ahong ki paak peetmah hi. Banghanghiam cihleh, aki khenzawhuh kum 30- valbang phazo ahih manahi hi.

U Ko Lay in, Directorate of Health ah, Budget Director hi’n, Minister, DG cihte zong kollawhlo, S I in a pai na peuhah ki zuisak(a bawmta)in, azat mahmah ahi hi.

(b). Administrator, U Myint Shwe , Ministry of Health kiang ka tun leh, tua kum Kawlgam bupah, Station Hospital 13- ki sanctioned ahihna; tuate lakah Chin State panin, Rezua, Laaitui leh Hangkeente zong kihel a hihna; Station Hospital khat ciangin initial sanction K 25- lakhs ahihna; tua tengaa ding Order 3- ahong pia hi.

(c ). U Ko Lay kiangah tua Order teng ka piak leh, Director of Health, Chin State, Dr. Fook Hlui zong, long leave tawhin Phawhkaan, Insein a innuh ah om laitak ahihna; ama kiangah ka va ki hil na dingin ahong sawl hi.

(d). Kei zong Dr. Fook Hlui innah va hawhin, Chin State aa ding Station Hospital 3- aki ngahna vai ka va koh leh, a lung hong damlua mahmah hi. Ahi zong zongin, tuate lamh na ding tawh ki sai ama tavuan ahih manin, ama field ahih loh si tawh, bangci sep ding cih theilo ahihna, a lungkhamna ahong gen hi.

(e ). Ke’n a vekpi in tavuan ka laakna dingin ahong thuum ciangin, ke’n, Laaitui khua aa ding simloh sem zolo ding ka hihna ka gen leh, a dangte zong ka sepsak zawhkei ding leh Laaitui khua bek hong tuampiak lo ding ahihna, ciamnuih leh cihtak buangin ka ki nial uh hi.

(f). Tua Station Hospital vai tawh kisai a vaan dingin a zingciangin Directorate of Health ah ka paikhawmuh hi. Suntha paai aki samh ding teng ka vaanuh ka man zawhloh tenguh a zingciangin hihzom lai dingin ka ki ciamkik uh hi.

(g). A zingsang ciang 7:00 AM pawlin a innuh ah ka va dawn leh, a tapa in apa 4:00 AM pawlin emergency tawhin RGH ki puak a hihna hong gen hi. Kei zong Zatopi ah ka va delhpah vinghvengh leh, khuana na phawk nawnlo in, aki hopih thei nawnkei hi. Tuabang teng tawh sun thapai ka ngak leh, 4:00 PM pawl dingin alaai hong ki tatin hon beithong hi. Kei zong tuabang thupiang teng U Ko Lay kiangah phone tawh ka zaaksak leh, a manlang theithei in a zumah ka paina dingin hong gen hi.

(h). Azum ka tunphet in, bangmah ka lung ahih mawhloh na ding; keimah Khalkha ah ka pai na ding leh Acting State Health Director dingin Dr. Hawi Saang order suaksakzo uh ahihna; ka airticket ding zong nana book zo a hihna hong gen hi. Tua baanah, Station Hospital 3- aa ding Order 3- leh K 25 lakh, cheque 3- zong hong thohsak hi. Ke’n bel, bangmah dang ka genthei tuan nawn kei hi.

(i). Kei zong a zingciang, September 3- ni in, vanleeng tawh Kawlpi ka ziingtun hi. Ka vaikhaksa mahbangin, ka naute apa Khai leh apa Kamte in Khalkha paisuak na dingin Buanlii khua, Pa Gin Thang’ Hylux nana bupsaap sak hi.

NB:- Tua Hylux in Zogam aa tuabang namte a masa belbel ahi hi.

(j). Kei guak Khalkha a pai ding kisa in ka tha anem banglo in, zotzot, zonzon, kankan kul peuhmahlo, passenger a dimlet liang tawhin ka paito pahuh hi.

NB: Tualai in Kawlpi leh Khalkha, nipi kaalkhatin RTC Hinos, khatta bek apai ahi hi. Tua tungtaangin, tua RTC nangawn pongmaanin na pailo ahih manin, mawtaw zuinuam ki thuaktheilo in a tam hi. Tuabang kawmkal ah sum ki lalo, a mawkna aa ahong zui uh ahi sawnsawnuh hi. Mawtaw hawlpa kiang ah, “ Sum ki la leh, hihzah in ahong zui takpi mah tamh maw,” ka cihleh, amah zong a nuibek sap hi.

(k). Kawlpi panin 1:00 PM pawl dingin ka dingkhia uhaa, Phalaam ka tun un ah, ni mualah akia ta hi. Tua ahih manin, Phalaam leh Ramthlo kikal Laaiba khenzawh deuh ciangin, lamtung panin gamsa khatin lam hong kaansuk hi. Ke’n ka mawtaw uh in a taihlumh liann hi ka cihleh, driver pa in tuakin a va et leh, ih lawmpa a sinuam ahih leh a laulua in mawtaw nuai ah ana ciip ahi hi. Tua gamsa in bangmah dang hilo, sahang innsunh kituahte mel linnliann( deep black and red colour) hi’n, zawhngeu cia ding bek apha hi. Passenger te lakah Kawlte khat na omin, tua pa in, Kya-minn hi, ci hi. Tua hingmat in ka pua uh hi. Khalkha ka zantun uh hi. Kei bel, apa Khual Khan Thangte innmah ka tundeen pah hi.

NB:- Mawtaw hawlpa in, atheihna sa a omngeina tawh ki zuiin, ” Ih maa naak vanh ding hiven,” hong ci hi.

KHALKHA AH VAI KI PAN

Ka tunni uh, a zingsang ciangin, Dr, Hawi Saang innah pai in, ki paaktak in ka vaiteng report ka va pia hi. Ka lai puakteng a etzawh ciangin, a mai hong khinggin muallaa, bangcih ding, bangcih ding hong ci samsam hi. A thu ka dottel leh, 15, August ni’n ah, Pahwahtah Ohkathah makaihna tawh meeting aki bawlna ah, Chin State aa Station Hospital dingin, ……… khua khentatna ki neizo ahihna; tua ahih manin, hih thu Ohkathah tungah report ngamlo ding ahihna hong gen hi. Ke’n zong, aman report ngamlo ding ahih leh, ke’n ka report ding ka hihna ka gen leh, tua lah ahong sangzo kei hi.

Tuaciangin Dr. Hawi Saang zong, dip humhsa in ava pai taakleh, tawl khat zawhciangin, kahmai sa tawh a mai mua liangin hong ki lehkikaa, kei zong bangci ahihna ka dot samsam leh aman, aw linggkall kall sa in, Ohkathah pa in Order leh Cheque te a simzawh ciangin,” Dii-keihsah betu lohda le…, Ngadoh sit a suu-zah be…, ngadoh then talu lohloh zahde..,” ci’n, a saibuai tuumin, ahan vuavua gawpzawh ciangin” di keihsah, Bahoo ku sa zee laih, Laaitui ku phiat pii………. ku theh laih,” ci hi, ci’n hong gen hi.

NB:- Hih thu ah, thu paizia a theilote ahih leh, a lunguh himawhkha mah dinguh ahih hangin, a taktakin a hihleh, alung himawh huai kilkello thu ahi hi. Banghang hiam cihleh, Chin Pyenee Pahwahtah Ohkathah in a thauh-khaan ding pa bek hiaa, apia dingte in Bahoo( Cabinet) ahi hi. Tu in ah, Bahoo te piaksa aman a phelkik zawhna ding a olkei ding hi.

Ahi zongin, Pahwahtah Ohkathah pa in aki ci in, neu bawlthei hetlo ding thu ahi zel hi. Banghang hiam cihleh, amah in ih Zogam kumpipa ahihmanin, amah tawh aki penggthei ngeilo ding ih hihman ahi hi.

STRATEGY THAK KHAT TAWH

Hihbang thu in, ze-etna hang hilel ding ahihna; tua ahih manin thungen in ami mahmahin, Ohkathah pa tawh ka ki muhlimh limhna dinguh, ka lungsim ah ahong suak hi.

Tua ciangin, ninih an tangin thu ka ngen hi. Ka manzawh ciangin inn teeknu (Nu Zam) kiangah, Ohkathah pa tawh bangci ki muhtheih ding cih ka dot leh, lampi lii bang om ahihna; tuate lakah ka meltheih ngeisa, uu hampu(TKKham) phone setin, amau innah pai in ka vaiteng ka va gen hi. Aman zong Ohkathah pa phone hong setsak pahin,” Ka uulay in nang kiangah hong pai nuam ven! ahi thei na diam,” ci’n a dot leh,” hithei mahin teh, tunitak 6:00PM in hong pai hen,” ci’n a dawngkik hi.

Tua nitaak ciangin a tanute nihin Ohkathah pa innah hong paipih hi. Kei zong ka maiguan ding ci’n, Zakhine lungzee nu/pa kopkhat leh moh bungkhat ka vomh hi. Amah bel innkuanpihte tawh hilo, amah bek ahi hi. Ka tunphetun Ohkathah pa in ka lawmte gel kiangah,“ Na pa in ka uulay cinapi ama sangin nauzaw pek hilo ahiam?,” acih leh, lawmte’n zong, Zongeina a telgen uh hi.

Ka lawmte gelin ki meltheihsak na tawm ahong patzawh ciangin kei leh kei ka ki genna ah;

Kei zong War Office, Ministry of Defence ah kum 24 ka sepzawh ciangin, keima thu tawh tawpin pending leave tawh om laitak ka hihna; ka khua uh Laaitui ah ka ciah leh, ka khua uhin Station Hospital ngah ahih manin, ka khua zaangun, piteek puteek, numei naupang dong takin lung damin ki paakmah mah uh a hihna; ka khuazaangun ki khawmin ah, ka khua un tuabang aa zato a ngahna in, Ohkathah pa mahmah hong deihsakna hang hi ding a hihna; khuazaang bupin paitheih omlo ding ahih manin ci’n, keimah lungdam ko dingin a pai ka hihna ka kigen hi.

Tuabangaa ka genciangin, Chin Pyenee Station Hospitals aa dingaa ka puak order 3- leh cheque 3- te vai ka genkhak ding ka ki dawm hi. Ke’n, tuabang aa ka hih zahkhat in, aman zong, Pahwahtah Ohkathah meeting aa, Station
Hospital piak dingaa a khensatna vai zong genin ahong nei kilkel kei hi.

Holim in, nuam kisa lua

Tuabangin ki meiksetna tawlkhat ka neih zawh ciangin, khat leh khat ki maingaap gawpin, nuam kisa in thucin, thutangh( sii-haung hnaung phit) ka genzau uh hi. Tua baanah, ke’n Rural Development uuk mahmah ka hihna; Senoir Licensed Engineer, Senoir Lisensed Master Plumber, 1st: Class Licensed Contractor ngah ka hihna tawh kizui in, ka hun awng sungteng in Northern Star Enterprises Co. Ltd. tawh Real Estate, Redevelopment sem ka hihna zong ka genbeh lai hi. Amah zong galkap mi mah ahih ciangin ci’n, ama pahtaak theihtheih ding ka ngaihsun pah hi.

Tua tawh ki zomin, 1958-59 kum, tan 7- exam: outstanding tawh zo ka hih manin, Pu Suum Mang, Inspector of School, Chin Special Division in, PAHTAWINA LAIPI khat ahong piakna sungah, tua laitak aa DSA Principal, Col. Khun Nawng sign tawh, DSA sangnaupangte nisim nuntakna color photos a dimteek, Album golpi bukhat baanah, Maymyo Boy Brigade aa Admission Form leh forwarding letter te hong khak ahih hangin, adan tello ka hihman leh dottheih ding omlo ahih manin, bangmah dawnkikna ka neih tuanloh na khawng ka gen baanah;

NB:- Tualai in Maymyo ah Boy Brigade kahthei hi leng, tan 10- ka zawh ciangin DSA ah a kahsuak theipah ding ka hi hi.

1961, November kha in DSA entrance exam: Rangoon University, Convocation Hall ah mi tulli valin ka phi na uh; Result hong ki out pahlo in, ke’n ka ciahsan na; a kumkik, 1962, March kha in ki out aa, kei tua in khua tungzo ka hihna; Address 39th: St. No 321, Pu Hau Za Lian’ Import & Export Co. Ltd; address ka piak ahihna; Written Interview ka zawhna leh, 25th: April in Officer Testing Team, Prome Road ah ka report na ding lai, a tungaa add: ah na tung ahihna;

Hih thu, Sia Khai Dal in siikhau hong satin hong zasak pah hi napi, a siikkhau lai in leilam tawn hiding hiam, April kha bei in ngahpan ka hihna; bangci bangci aa ka hanciaam hangin lapzo nawnlo ding ka hihna tawh ka pai nawnlohna ka gen hi. Ama Alma Mater in DSA a hihna hangin ka thu gente a lungluut peuhmah hi. Tualai in DSA na kahthei hileng, ama sangin senior zaw pekpek ding ka hihna khawng hong genlai hi.

Station Hospital vai bel, bangmah hong gen nawnlo ahih manin, tua tawh kisai bangmah lung himawh na ding a omnawnlo in ka ngaihsun pah hi. . Tua nitak bel, holim lua ka hih manun, bangmah lo kalin 9:00PM na hi’n, ka ki khenbawl uh hi.

NB:- Universal Educational Institute aa Khambawi leh Mangbawite tawh ka sangkahpih ngeite uh ahi, tua interview ka phipih te;

(i). Khin Maung Aye in, Burma Navy lutin, 1970- kumin amah Ta-neen-taazi Naval Base ah posting hong kia in, Major Khin Maung Aye tawh, Moulmein ah ka ki mukik uh hi. 1985- kum ciangin, Lt. Col. Khin Maung Aye tawh, War Office ah ka ki mukik leuleu uh hi.

(ii). Kyi Win in, Burma Army ah lutin, 1975- kumin, Magwe 1st: Kayah Rifles ah Company Commander, Major Kyi Win tawh ka ki tuakkik uh hi. Hih ka lawmte gelte tawh ka ki mukik nawnkei uhaa, amau bang ciangdongh taktak tung cih ka thei nawnkei hi.

Phone hong ki set photphot

A zingciangin ka zin ah ka omlel laitakin, ka zato vai Ohkathah pa’ kam teek tawh alungkimna( consent) la laileng ahawih tammaw ci’n ka ngaihsut sut laitak, 10:00AM pawl dingin uu Khampu in phone hong set laizang hi. Aman,
“ Pu Mung, Ohkathah pa in tu nitak na uulay tawh ka innah an nong nethei ta um,” cih hong donghsak veh aw, bang ih citaam! ?,” hong ci laizangh hi. Ke’n zong, ,” Tua, Ohkathah pa bang lellel in an ne dingaa ahong sapna ah ki paizo ngawi’ngawi’ ke’n teh,” ci’n a uutlo bangin ka ciamnuih gen hi. A taktakin, a nuamlua leh a uutlua ki sa, ka excite luatmanaa tuabangaa a dawngkha ka hi gige hi. “ Ka uulay in, Ohkathah pa deihna bang hi tahen,” na cive maw, ci’n kadawngkik hi.

KHAI KAM COLLEGE AKI PATNA

Ko zong, tua nitak uu Khampu tawh, Ohkathah pa’ innah dinner ka va ne uh hi. Aman bel zunam tuamtuam tawh non na ging ahih hangin, ko ka neekloh uh ciangin amanzong aneek teii hangin, a khamh luatlohna ding aki dop lamtak bel ka thei uh hi.

Tuabangaa holim aa ka om laitakun, Ohkathah pa in, tua laitakin bang vai thupi nei ka hihna hong dongh hi. Ke’n bel, bangmah vai thupi ka neih kei hangin, Northen Star Enterprises Co. Ltd. min tawhin Rural Development a om bangbang sem ding ka hihna tawh ka dawngkik hi.

Aman hong zomto leuleu in, “ Tuabang ahih leh, tavuan lian mahmah khat hong pia leng, nong sangzo ding hiam?,” ci’n ahong dot ciangin ke’n zong, bang tavuan cih theician nailo pi’n,” Ohkathah pa in nong muanaa tavuan nong piak leh, ka hihtheih bangin ka hanciam nuam mah hi,” ci’n ka dawngkik pah hi.

NB:- Zogam aa dingin College khat ki hong ding cihbang ciangbek ka zaak hangin, KHAI KAM COLLEGE ding cih leh Kalaymyo ah hih ding cih zong ka za ngei naikei hi. Ohkathah pa’n tavuan lianpi acih zong KHAI KAM COLLEGE ding peuhmahin ka hemtheih naibeek keilai hi.

Tavuan ahong piak dingin;

Construction of KHAI KAM COLLEGE PROJECT ahi hi. Tua Project in, Tedim Township sung hi dingaa, Kalaymyo Towship tawh ki gamgi, 9- miles hiding ahihna; tua COLLEGE in, Naga Hills, Upper Chindwin, Tamu Valley, Kabaw Valley, Kalay Valley, Tonzaang, Tedim, Phalaam, Hakha, Thanlang Townshipte leh, Gangaw Region tengaa khangnote khempeuh ahuam ding ngimna ahihna; Central Government in Direct in len dingaa, Higher Education Department te’ owner hiding ahihna; Project Executive Committee in,

Chairman………… Chin State LORC, Chairman,

NB:- Chairman, tua laitak aa, Chin SLORC, Chairman and Tactical Commander, NWC, Col. Hla Myint Kyaw ahi hi.
Colnel pa bel, nasep lah uuk, hanciam lah management siam mahmah baanah, alungsim zong picing mahmah hi.
Secretary, Dr. Lwin Aung in, SLORC a kahtuungin, mipite tungah ahihzawh na leh a hihtheihna uh a lahna(Presentation) dingin, mipite in a muantheih theihna dinguh ngimna tawh mipite lungluut na ding leh a lungsim uh a lathei belbel ding ahi, Zangkung khualai zangaa Sule Pagoda Renovation Project leh Theihzeegyi A-zone a thak a lamna ah a Makaipi dingin a teeluh ahi hi. Tuabangaa a mapan nate ah lawhcing mahmah sa uh ahih manin, muangpah ahihna tawh ki zui aa KHAI KAM COLLEGE PROJECT ah, Secretary dingaa aseh leuleu uh ahi hi.

Dr. Lwin Aung bel, Russia Doctor hi’n, pilmahmah kasa hi. Na sep hanciam mahmahin citak, phinhcill, kuhkall in, ngenhtell mahmah lai hi. A calculator zat tungah, application 36 om hi. Keibang in +, – , x leh a hawmna bek bang ka hihtheih laitakin, aman a vekpi in hihkim, zangkim thei ziau-ziau thong hi.

Ama thuthu ahihna

Ohkathah pa in, Central Govt. in hih Project tawh kisai amah bup-ap (duly authorized)ahih manin ama thuthu a hihna; hih Project in kum tampitak ki sem ding ahihna; tuaciangciang tampi takin contractor semnuam in ama kiangah dawp ahih hangin, kuamah pia nailo ahihna; DSA Alma Mater ahi, a lawmte, Bochoh, Tainghmu, Col. cihbangte zong tuate lakah ki hel ahih na; DSA Alma Mater ahi, Bu vive 36- ki pawlna, All Brother Private Ltd. te zongin ngenngen ahih hangin pia tuanlo ahihna zong hong gen hi.

Ta-baa-wah ciah laihda

Ke’n tuabangaa ahong offer tavuan lazo mah ning ka cihciangin lung damlua kisa in, ki paaktakin ,” Chin College, Chin Engineer, Chin Contractor, Ta-ba-wah ciahlaihda,” hong ciliang hi.

Tuabang kawmkal ah, All Bros. Pte. Ltd. te in Ohkathah pa kiangah na ngen na phuphu uh hi. Amah zong a cihna ding theilo in kei hong samin, tuate ka piakna dingin pressure ahong pia ahih peuhmah lohna; 1st: Phase bel sum tamlua nailo ahih manin, haksatna omlo in, zozo ding ka hih hangin, maikumaa ki pan ahong pailai ding kumte ah, kei guakin zozo lo ding ka hih ciangin, tua hun khualna tawhin ka hop na dingin ngaihsutna ahong piabek ahihna hong gen hi. Kei zong, tua ahih leh ci’n, Single Staff Qr. khat ka hawwm hi.

NASEP KI PAN

• Main Contractor……Northern Star Enterprises Co. Ltd.
• Owner……………………Sole Proprietor, Pa Pau Za Mung( Laaitui)
• Address………………….No. 16/A, Crisp Street, Latha Township, Rangoon.
• Established…………….1985
• Sub-Contractor……… All Bros. Construction & Trading Co. Pte. Ltd.
• Address…………………. Mogul Street, PabedanTownship, Rangoon.

1990-91 fiscal year in 1st: Phase kipan hi. Tua sungah, Reconnaissance Survey, Preliminary survey, Jungle clearing, Detailed survey, Maste Layout Plan, Sand Model, Miniature Plan, Water Supply and Sanitation, Power Supply te leh, Project Signboard with Project Particulars and Artist Impression te aki sep ding baanah, Single Staff Qr. khat leh Dining Hall khat zong lam ding ahi hi.

Water Supply and Sanitation; Electric Power Supply te zong aki hih ding ahih hangin, 1st: Phase sungin aki hih zokei hi. l

Reconnaissance Survey

Hihin, koi laimun, koi khua, koi lai kuam ah hih ding cih teelaa et masakna ahi hi. Gtn: KHAI KAM COLLEGE ding ahih ciangin, Tedim gam sung koi laitak ah, Khuasak ah maw, Tedim khua ah maw, Phalam gam ah maw, ahih kei leh Kawlpi kuamah maw cihbang aa a mun leh akuam aa teel masa in, amun aphual ah va pai aa teelna ahi hi. Hih nasep pen, kei tunma in Central Govt. panin, Chin State, Tedim Township, 9-miles teelin ana kip sakzo hi.

Preliminary Survey

Hih nasep in, tua College lamna dingaa aki tupna a kuampi aa azai thei penpen aa aki muhna ding munsang, mualsang belte tung panin gal et in, kawi laitak ah mualbo om, kawi laitak ah guam om, kawi laitak ah munzaang om, kawi laitak ah lui om, College Campus dingin kawi ciangciang ki lathei ki huam thei ding cih, mail amah future extension aa ding, a munlupzia a hampi in en in, sketch tawh gamlim suaih na ahi hi.

Jungle Clearing

Hih nasepin, Preliminary Survey aa bangin a kuampi in, detailed Survey aki bawl ciangin ahi zongin, construction aki sep ciangin ahong dal, ahong nang leh ahong nawngkai sak ding singkung lopa dongtakin vat maina ahi hi.

Detailed Survey

Hihin, Preliminary Survey bulphuh in, akuam buppi in Contour line detail takin aki teh, nasepna ahi hi. Hihin hih construction aa dingaa sep a kul Survey aki ci peuhmah te ii a a nunung pen, a tawpna(Final Survey) ahi hi.

Master Layout Plan

Hih nasepin, detailed Survey tungtawnin, aki lam ding inn, lampi, leii, Playgroud cih bangteng, koi teng ah bang innlam ding, koiteng ah bang bawl ding cih amun tektek ah bulh diimdiamin in gelna ahi hi. Tua in, scale tawh limsuai in, ahi ding bang linnliann aa aki suai ahi hi. Hih sungah Orientation in a thupi mahmah ahi hi. Tua in, inn ahih leh a ngatna ding, nisuahna lam, nitumna lam, saklam, khanglam limpha takin ngaihsun aa aki teel ding ahi hi.
Tuabangaa aki hihzawh ciangin Central Govt. ki confirm sak leuleu hi.

A kumkik ciangaa hih dingte

A kum masa kumin, ahun lah toilua si leh na khempeuh aki pantuung ki hi ahih manin, Layout plan, Sand Model, Miniature Plan, Project Signboard with Project Particulars and Artist Impression te baanah, Water Supply and Sanitation leh, Electric Power Supply te a kumkik ciangin limphatakin hih dingin ka gelzo hi.

Inn lam ding ki pan

Inn laam dingte in, Dining Hall khat leh, Single Staff Qr. khat ahi hi. Tuate lam dingin peg khetna tawh aki pan ding ahi hi. Tua ni in, 3rd: April 1990 kum hi’n, Kawlpi khua leh Tahan aa Pawlpi sia teng khempeuh ki samin, thungetna tawh peg aki khen ahi hi. Tua ni in ahong paiteng khempeuh moh leh niangtui tawh ki vaak hi. Sub-Contractor te in zong, ko hihmah hong eengin, a Phonggyi te uh samin, Gatha phuisamna tawh nasep apna a bawluh hi. Amau zong Phonggyite an a vaakuh hi.

Northern Star Enterprises Co. Ltd. in Dining Hall lamin, All Bros. Pte. Ltd in Single Staff Qr. a lam hi. Tuabang aa aki lamna ah bangmah haksatna omlo in, hawih phatak in ki mansiang hi.

Technician te

Hih KHAI KAM COLLEGE in, ih Zogam buppi vaang ahong pia ding a hihna tawh ki zui in, a hawih theithei aa aki lamna dingin Zangkung panin Technician ahi, Carpenters, Masons, Smiths te thaman val piak liangna tawh ki sam in aki semsak ahi hi. Worker dingte bel, Kawlpi, Tahan leh Phaai panin a diakdiak in Zomite aangvaanin ki semsak hi.

MI leh Sahtunglungte in hong sit

Worker tawh kisai in, ke’n ka genkhak mah hiding ahiam, ahih kei leh aki phuak tawwm ahiam, “Zomite simloh ki deihlo cih,” thuthang ahong om na tawh ki zui in, hong ki taii hiding hiven, MI leh Sahtunglungte in hong luh(probe)bawl in, nikhat tanghciim hong sitgawp ngiingeii hi.

Tuabangaa ahong ki sit na ah, ahong ki taii na tawh aki sai kilkello, thutuam dangdangte khawng tawh ka mawhna ding hong zonuh hangin bang mah thusia piangzo buanglo hi.

Medical First Aid

Hih COLLEGE ki lamhna munin, nattun natna khauh mahmah hi. Tua bek thamloh nasem bekbek 30-40 bang ki om tawntung baanah, gam sim thamh mahmah na mun hi’n, bangkhat peuhpeuh kituak leh khuapi tawh ki gamla ahih manin, Director, Chin State Health kiangah Nursing Staff khat ka nget leh, Tedim, Lawibual pan, Siamah Hau Man Cing hong ki pia hi.
Nattun natna khauh lua mahmah ahih manin, Zangkung panaa ahong pai Techniciante nih ka sihsuah kha hi.

A pahtaakhuai, Zomi Upate

Hihbangin na ka sep ciangin, sunkimh in Tahaan le Kawlpi aa eimi (Sihzaang) upa( ulianpipi retired pawlkhatte in, nisimin, vaikuanna in hong nei in, a theihnop teng naupang thuthei nuamte’n, anu/pate thu a dotdot bangdan) hong donghdongh uh aa, aki cimhkei tuam hi. Tuabangte paaktaak huai ka sa mahmah hi.

The Unsung Heroes

Thuam Thawng leh Kai Tuah

Khatvei, Secretary pa kiangah, Hih KHAI KAM CIOLLEGE bang kici liang ahih leh, Mangkangte lehdona Myo-oh suaamna hang ahih ciangin, tualai aa a minnei mahmah(leading Actors-key Players)te ahi, Thuam Thawng leh Kai Tuahte zong, bangkhat peuh minvawh lehang hawihlo ding ahi hiam? ci’n ka gen leh, “ Sia Pau aw, tuabang maimai hitheilo ding hi. Hihte in, Central Govt. te ii Policy hi, “ hong ci khuankhuan hi.

NB:- Eg. Thuam Thawng Convocation Hall; Kai Tuah Auditorium

Material Collection

Ohkathah pa in, a kumkik aa dingin Materials Collection bawlkholin, na khempeuh aki gingsa in ka kawihna dingin zong, hong gen tawntung hi. Tua ahih manin, ka hihtheih bangin, a haksa thei ahi, brick, sand, aggregate, hard wood and teak scantling, iron work tampi tak ka leikhol hi. Tua bek thamloh, ka zat tanghzang dingin Long body Jeep nih zong ka leikhol lai hi.

BABEL TAUSANG LAM A SAWMKHA KA HITAAM

Ohkathah pa’n a genin ah, hih KHAI KAM COLLEGE PROJECT in lian mahmah in, ama gelna bang hileh kum simin K 1,000- 1,500lakh bang hi tawntung dingaa, kum 7-8 bang sawt ding ahihna; keiman a mansiang dongh sem ding ka hihna hong kamciam hi.

Kawlpi ah nasep ka ki pat ciangin Head of Department pawlkhatte tawh ki thei ka hih manun, hih College Project paulam aa business septheih ding zong lampi ana omlua ahi hi. Gtn:- Brick and Timber Production Industries te bang hih, College Project paulamin licence laak( monopolized)ding, cihte pawl ahi hi. Tuabang hihthei hileng, ka Project pi nasep bel, a cihthamlo ding zahdong bang ahi ding ahi hi.

Mihing ih cihin, a tamzaw hibek kei, a vekpi phialin kici thei lehang, Pasian tawh aki gamla semsem zawte ih hi hi. Kei zong tua lampi tawn dingin aki pankha dektak ka hikei taammaw! ka nungcih sannsann hi.

ELOHIM (Pasian) IN A HONG HOTKHAITNA

Cikmahaa aki ngaihsun khangei kilkello, Ohkathah pa, New Delhi Military Attache dingin order hong tungvat laizang hi. Tuabangaa thu gamh ahong tun ciangin, Ohkathah pa zong tawh lim phatakin ki hotheih om nawnlo in aki dinkhen cihbang ka hi uh hi. Ahi zongin aman, New Delhi nong pai ciangin a innah ka tun na dingin a hong vaikhak hi.

NB:- Hihbang thu ahong pianna ahang aki cingin gen lehang, guiicing luamah mah ding ahih manin atuam in hong kigen ding hi.

Ohkathah thak hong tung

Col. Hla Myint Kyaw laih dingin Col. Soe Win hong tungpah liann hi. A innkuanpihte hong ton pihlo ahih manin, sun tawh zan tawh zune in, a lengnaa te tawh a buaikhop tawntung lel hi. Nasep siam ding siamloh ding bel ki thei khalo hi. Banghang hiam cih leh, adang dang ka gentheih kei hangin hih COLLEGE PROJECT nasepna uuk in nei kilkel lo hi. Nasepna tawh kisai kumh dingin, Project Secreary pa tawh va pai le ungh, ahong don vetkei hi.

Ko zong, ahong tuntuung ahih ciangin hong sawt pian leh hong hawih gawp dingin ka lamet uh hangin hong ki lamdanna omthei tuanlo in, a ngeimah hong ngeilel hi. Ohkathah lui pa lai in, nipi kalkhat ta cih bangin briefing ahong neihpih tawntung bek hikei, occasionally in instruction hong pia hi. A thakpa kiangpa in instruction ahong piak gengenloh, aki lathei vetkei hi.

Project Secretary pa lung himawh lua

Tuabangin Ohkathah pa, ahong tua cih ciangin, Secretary pa lung khamlua in, hih Project a mindai gawp ding lung himawh lua hi. Tuabangaa a lung himawh luat ciangin, aman Secretary ahihna tawh ki zui in, risk la in, ama own initiative tawh PLANNING khat a bawl hi.

Tua Planning in, hih Project aa dingin Cunsultant nih cial ding; tuate in; (i ). Mr. D.Minus, Chief Engineer ( Rtd:),
(ii).U Ko Gyi, Engineer (Rtd:) Hihte kha sum dingin, K 8,000/- hi ding, A omna ding inn pia ding, A zat tanghzang ding mawtaw khattuak pia ding, cihbangin Planning khat Central Govt.(Nahwahtah) ah a submit hi.

NB:- (i). Mr. D. Minus (Gualkha by blood) in, 1966- Pahlahkah aa nasep ka ngahtuungin, Maintenance (30), ah E E na hi’n, ama tungah report ka pia hi. A nungciangin Chief Engineer tawh Phalaam, Chin State ah ahong semngei pa ahi hi.

Amah in, mi nunneem mahmah khat ahi aa, kamtam hetlo, a lungsim hawih khat ahi hi. Ama kiangah kum nih ka sep zawhciang,  1968, February 15 ni’n No. 957. GE, Moulmein ah ka transfer ding ciangin ka va nohset leh, pate in a tate tungah thu agen bangin ahong gen hi. Tuate lakah thupi kasak, ka manggngilh theihloh khat in, “ Engineer’ etiquette na mangngilh kha ke’n ,” hong ci tangh tangh hi.

(ii).U Ko Gyi bel, Secretary pa tawh University ah a kahkhawm uh hi aa, athuak hawihmah in, a pil mahmah khat ahi hi. Construction Corporation, Head Office ah, staff officer ahi hi.

Ohkathah a thak hong tung leuleu

Col. Soe Win in a tua cihmah bangin, sauvei khan hetlo takpi in, amah ki paikhia sakin, a laih dingin Col. Maung Cho hong tung leuleu hi. Hih a thak pa in, a masa belpa mah bangin nasep uuk, thei leh management zong siam hi. Ka omdan khawnguh zong, hong ki theipah hanhanin, hong nuammahmah hi.

NB:- Col. Maung Cho bel, Maingzaung Taihpwe in, Maingzaung khua pi leh Cantonment teng kempeuh galte’n a la in, galte khut sungah a om na pan in, Col. Maung Cho leh Capt. Dai Khen Thangte hanciamna tawhin hot khiat kikzo ahih manin a minthang mahmah hi. Agang Khen in, Col. Maung Cho tawh ahong meihset na panin ka kithei uh hi. Lungsim hawih leh a nuamkhat ahi hi.

1992- kum, Laaitui ah ahong pai tungtaangin, a ciah ding ciangin, Tedim ciang hong kizui sak hi. Tedim pan a ciah niding zingsangin akhaan sungah hong tuamsapin, bang gennop ka neihna ahong dong hi.

Ke’n zong, Bahoo te in Pahwahtah Ohkathah pa a laikhak keiman by hand tawh la in, ama tungah ka piak, tua in Phalaam Bailey Bridge Parts te in, Maansuang lei dingaa aki reserved hiaa, mundang peuhmah ah aki tuah khak saklohna ding vai; Laaitui’ gam Reforestation ahong hihsakna ding vai;  Laaitui Station Hospital ahong upgrade sakna ding; Laaitui State Middle School sang innte ahong upgrade sakna ding teng ka gen hi. Tuate ka nget bangin ahong piak hangin, Laaituite ginatloh manin lunsim bangin ki ngahlo hi. Maansuang Bailey Suspension Bridge bek, mit
muhin a taangtung bek hi.

Secretary pa Planning Bahoo te muhdan

Project Secretary pa’ Planning Bahoo te in, amau khasum mahmah zong K 2,500/- bangbek ahih laitakin, tua Comsultant te aa, K 8,000/- tak ahi bek hilo lai, inn leh mawtaw aki piak lailai ding, sangthei vetlo bekthamloh, hehmah mah lai uh, kici hi.

KHAI KAM COLLEGE PROJECT PAHLAHKAH KI AAPTA

Tuabang thu ahong pian ciangin, Nahwahtah in, “ Chairman, Chin SLORC in tavuan la zolo ahih leh, Sahlahkah aap tahen, ” cih order a thohta hi. CONSTRUCTION OF KHAI KAM COLLEGE PROECT in, Sahlahkah khutnuai atun na in, hihbang teng hang ahi hi.

Sahlahkah panin, Construction Division Unit (6)

Tua in, Construction Division Unit(6) ah, U Ohn Kyaw in, EE in ahi hi. Tuabangaa tavuan ka ki laihna uh ah, bangmah, thubuai thu nawngkai, thu haksa a omkei aa, olno takin ka ki aapthei uh hi.

NB:- U Ohn Kyaw aki ci in, 1966- kum, Sahlahkah, Maintenance(30) aa nasep ka ki pattuungin, ke’n, Pazuundaung Township area teng hong ki len sak hi. U Ohn Kyaw zong, RIT sang tuaktuung hi’n, amah Pabedan Township area teng ki lensak hi. Amah bel, a mel neuciu-ciau in, ahih lenghlangh banglo in a lungsim ki liansak mahmah hi. Ko, khangno lai vai cihtak, kei, Kyauktada Township panin U San Aye, Lahtha Township panin U Kyaw Sein, Lanmadaw Township panin U Shwe Po teng hong langpanin ka ki lempih hetkei ponguh hi.

SIIKLUUMPI KHAT A PUA TAWH KIBANG

Nahwahtah in, olno takin order athoh uh banglo in, kei aa dingin Siikluum pikhat ahong ki suan tawh ka kibang hi. Banghang hiam cih leh, ka van leikholh( Material Collection) te in thuneulo ahih man ahi hi.

Chief Engineer kiangah huhna ngen

U Kyi Wa in, Chief Engineer, Chin State ahih laitak ahi hi. Tua ahih manin, hih KHAI KAM COLLEGE PROJECT in zong ama khutnuai ahi hi. Tua ahih manin, ka van leikholhsa teng ahong tatsakna ding ka gen leh, a thu in U Ohn Kyaw in ama khutnuai ahih hangin, ama thukimloh pi in aman pressure pia aa a tatsakna ding hitheilo ahihna hong gen hi.

Ke’n lah U Ohn Kyaw kiangah maineu liangin ka thuum ngeikei ding hi. Thuum mah taleng zong, ahong lak sakloh na mel ki theilo lai ahih manin ka hanciam kei hi. Tua ahih manin, ka Material Collection te khempeuh, vut leh vai a suakta hi.

KHAI KAM COLLEGE MAH HILAI

Hih, KHAI KAM COLLEGE min tawh kisai in, a lungkimlo aa taingsa khawng at om cihbel ka zangei mah hi. Ahih hangin, kei omlai ciangciang, bangmah ki laihna omlo, KHAI KAM COLLEGE mah ahi lai hi. Ahi zong, keima nungciangin, KALAY COLLEGE, tuhun tak ciangin KALAY UNIVERSITY ahi ta hi.

KA MANNGILH THEIHLOH DING THUTE

(My Unforgettable Characters, during the above Episodes.)

Khalkha ka pai na taktakin, ZATO vai ahi hi. Ahi zongin, theihkholh leh gelkholh lohpi in ka vai hong kihei hong kihei in;

(a). Zato vai

Thusia zo ding ahih kei hangin, ze-etna hong lutin, bangmah lo tawh ki buai dektak aki hih hangin, thupha ngahnuamlua liang kisa aa, aki peekphot, aki sannsann aki hi gige hi. Na peuhmah ahawih ding ciangin, asia hong pai masa hamtangh hi. Tua in, biakna pau lehang, ze-etna ih cihte ahi hi.

Nausuak ih cihin, lungdam na ding ahih zahkhat in, ahong suak ding taktak ciangin a nu in, khua-ulsa kai liangin a thuak masa hi. Tua ahih mah bangin, deihaa ih ngaklah mahmah guah ahong zukma in, khuapi guahpi leh huihpi ahong kipei masa hi.

Tuabang danin, hih leitungii dan leh zia,” Ka-bah nihzaa-mah- Theory of Nature “ ahi hi. Tuabang dan a theilote aa dingin aki samlopi in patau in, lungkhamin a sintawl thei hi. A theisate ahih leh, olnotak in a do zothei hi.

(b). Lamet lohpi Thupha (Blessing in disguise)

Aki lamet ngam ngeiloh, mangg zongaa ka matngam ngeiloh, thungetna aa zong ka helngam ngeiloh, kuamah kim ngahzawhloh, Construction of Khai Kam College Project, Main Contractor ka ngah laizang hi.

(c). Kuamah hihzawhloh leh hihtheihloh.( Able was I ; …..)

State Directorate of Health Head Office nei nailo

Khakhal ah ka paitung tungtaangin, ka vai tawh kisai in State Directorate of Health zumah ka pai leh, a BC, Pa Hei Cin, UDC, Pa Kam Cin Hau leh zum nasem pawlkhatte nana om uh hi. BC, Pa Hei Cin leh UDC, Pa Kam Cin Haute in zum vai tawh kisai thu ahong kuppih uh hi. Tua tawh ki zom in, tu ciangdong State Directorate of Health in zum nei nailo in, tua aa a zat laitakuh Red Cross Society te aa a kawwmuh ahihna hong gen hi.

Aki hanciam tawntung hangin

BC pa in, Director te ahi, Dr. Sillmann, Dr. Khup Za Pume, Dr. Ngin Thawng, Dr. Kam Za Dal, Dr. Fook Hlui(2)* te in, akhang akhangin ana hanciamuh hangin ana ngahzawh ngeilohna uh; tua in, banghang ahi taamah ci’h ahang ka etsakna dingin a case file honglak hi.

Procedure maanlo

Kei zong, a file ka et leh, zonzon kullo in, a beisa aa a siauhnate uh, procedure maanlo ahihna, etkhat in ka mupah liann hi. Procedure cihin, tuabang aa building aki siauh ciangin, Building Drawing, Builder’s Quantity, Engineer Endorsement baanah, aki sapna a thu a tomh in gen dingte short to the point aa gen ding ahi hi.

BC in, ka hihsak na dingin hong thuum

BC in, ka hihsak na ding hong thuum ciangin, kei zong tuabangin hihsak ding hileng, K 5- lakh bang bei ding ahihna ka genleh, amau tuabang hihzawhna ding neilo ahih manin ka huhna ding hong thuum hi. Kei zong mailamh khua leh tui aa dingin Pyenee te mah ki muang nuam ding ahihna tawh in, man lalo in ka hihsak hi. Ka hihsak leh, estimate K 43- lakh tak ka phasak hi. Letmat thuh ding khawng a vekpi in mansakin, ke’n copy khat la in, amau proper channel tawhin Directorate of Health ka khaksak hi.

State Health Head Office a neizo sa

Kei, Zangkung ka paikik ciangin tua kei puak copy tawh Budget Director pa kiangah ka gen zenzen leh, “ Hithong maw, ke’n Chin State Health in, Head Office Building anei zo asa hiveng ee, tuabang ahih leh, priority ah kawih pah ning ei,” hong cipah hi.

Dr. Sian Za Kam hong tung

December kha ciangin Dr. Sian Za Kam hong tungin Dr. Hawi Saang in Acting panin a khawlta hi. Hih thu Dr. Sian Za Kam ahong tun mapek aa aki siauh ahih hangin, ama khut sungah ahong kia ahi hi. Hih thu bel BC pa makaihna ahih manin naaktel mahmah hi.

NB:- Ke’n ka hihsakna hang tawhin, aki samh sanction nangawn zong, keima hangmah tawhin a ngahpah takpi ahi hi.

Alamh ding ki panta

Alam ding ciangin BC pa in, Director pa kiangah a thuteng genin keimah mah ahong lamhsakna dingin agen tawntung hangin, Director pa in, awlmawh vetlo in, Project ad hock EC Committee formup in, amah mah in Chairman semin, Contractor dingin tender asam hi.

NB:- Ke’n bel ahong ki pia phial zongin Khalkha bang munte ah ka sem nuamkei hi. Banghang hiam cih leh, na khempeuh Kawlpi tak panin aki pua vive hiaa, haksa mahmah hi. Director,Chin State Health aki cih hangin, amau bangmah peuhmah ahih hilo, BC pa ii hanciamna leh ama initiate bekbek ahi hi. BC pa bel, lungkim thei vetlo in ka ki muhsialsial un genthei tawntung hi.

Tender pia

Khalkhate, Pa Chum Lingg aki ci khat Contract apia hi. Amau bel, ih gen gen theih mahbangin Drawing leh BQ khawngte ki samsalo, kul a salote pawl mah hi’n, amau thu tawhin a lamhte ahi hi.

A theihloh lamtak, theilo

A inn lamuh bel, Thahnih ciang vaangkhuam in, atung zong siikkaang a khuhzo hi. Kei design bangin lamlo uh ahih manin, tuuknuai ahih si tawh, a lei pi 15’ sang dingaa a tawhuh cimhsukin a thah nuainungg teng vuk in a dim meimai hi. Ke’n bel tua thu ka gal zaakzo hi.

Director pa’n hong nehbawl

Khalkha ka pai ciangin, hong nehneh in, a sawtna ciangin, “ Pu Mung! Ka innlamuh nong etsak thei nam diam?,” ci’n hong dongh hi. Kei zong a thei nailo bangin, ka va en uh hi. Aphual ka tunuh ciangin, a lungkham huai dan bel, aki gen theilo ding zahdong ana hi hi.

Sum om peuhleh, Shwe inn nangawn ki lamthei

“ Pu Mung, aki bawlkik thei nawn naam?,” ci’n hong dong hi. Ke’n, ”A sum ding ompeuh leh, Engineer te’n, a bawltheiloh uh, omlo hi,”Kawlte in, ” Ngwe sihzian, shwe ingg tong sauhloh zahde,” cibuang hiven, ci’n ka dawng hi. “ Pu Mung, nang non hihsak zo nadiam?,” ci’n hong dong leuleu hi. Ke’n, “ ei mabaan cihloh, hihbang dan mi mabaan hih thadahhuai veh aw. Hon huh in non cih leh kon hihsak kei diam? ,” ka ci hi.

Estimate bawl

“A leisaii teng bel, nomau thatangh tawh nana nilkhia un,” ci’n ka sawl zawhciangin tehin, phung(retaining wall) cian dingin estimate ka tuat leh, K 5.5 lakhs ka ngah hi. Tua zong keimah mahin, Budget Director pa kiang ah ka gen leh, hong pia leuleu hi.

Tua hiaa, ama sa aa K 43.00 lakhs tawh kigawm leh. K 48.5 lakhs ka cih.

NB:- * Dr. Fook Hlui(2) aki ci in, ama hunin 2- veitak aki siau ahi hi.

(d ). Tedimte, Kaantalaihpipa kahih lai

1990- kumin, Khalkha ah, Post and Telecom: Dept. in, inn pawlkhat lamna dingin Budget K 35- lakhs a ngahuh hi. Tua bel, Pahwahtah Ohkathah pa manage ding ahi hi.

Tua project a sem dingin tender system tawh contrctor atel leh, amau leh amau ki thutuak thei mahmahlo in, khat leh khat ki lungkimlo, aki siat lawh lianguh hi. Ohkathah pa in a leplep hangin a lemzo tuankei hi. Tuabangin sauvei pi ki kanggin a om laitakuh, nikhat ni ciangin Ohkathah pa in, “ No hihbang lawmlawmaa aki thutuak kei uhaa, tender system tawh piangsak zo peuhmah lo ding na hih uhleh, Tedim Kaantalaihpipa samin ka semsak ding hi,” a cihtak ciangin, amau leh amau hong ki ho, hong ki kumhkikin, thukimna a ngahzo panuh hi.

NB:- Hihin, Ohkathah pa teekteekin kei tungah ahong genkik ahi hi.

(e ). Gumpa ka hih lai

Tua baanah, 1989kumin, October khain, Ciimnuai Golf Clubte in, Khuado Trophy Tournament bawl dingin, Pahwahtah Ohkathah pa in, Cub President,Pu Awn Za Nang leh Secretary,Pu Thual Za Thangte thu apia hi. Ohkathah pa in a sawlsawl hangin bangmah ki lamdanna om tuanloh  ciangin, hehmah mah in samin a tawwnggawp theizel hi. Tuabangaa ki lamdanna a neihtheih lohna in, tua tournament fund a neihloh manuh ahi hi. Tua aa ding sum a donuh hangin a ngahzo kei uh hi.

Secretary pa lungkhamin, Ohkathah pa in samaa a taiigawp ding a patau nihloh hi. Fund omlo, dongzo lo ci leuh lah, tuabang lawmhlawmh hihzo lo, vaihawm zolo acih ding lamtak lah a thei uh hi.

Tua bangaa a haksatna uh, Secretary pa in kei kiangah hong genkha lai zang hi. Tua leh kei zong, kei zong anei cihbang zong hilo, Ohkathah padeihna hi aa, amau lah genhthei lua ka sakman tawhin ah, aki samhzah ding Laaitui khua min tawh sikh ding ka hihna ka gen leh, Awnpi leh Thualthang zong nuamlua kisa in a diangliang uh hi. A maute gel nuam lua ka sak leh, Ohkathah pa in amau tegel sangin na nuamzaw kaanlai hi.

NB:- Abei in, vok go aa, zu leh sa tawh mehin anneek baanah, mimal 50/60 donghtakin gualnopna bawlna; a prize hawm dingte nangawn ahi hi. Ohkathah pa in, midangte in datsi(diesel) chit anget ciangin, galln 2/3/4/5 cihbang bek pia in, ke’n ka nget ciangin, a drum(pipaa) in ahong pia hi. Datsi sai Manager te bangin, lamdang hongsa mahmah uh hi. Kawlte in, “ Kuhtu leh zah, wun leh vuah- Thupha lah ngahsii, gil lah vah sii,” acihte ahi hi.

(f). A khuangaih, a khasiat huai, Siapipa’ zite nuta.. (misfortune never comes single)

Kei, 9- miles, Khai Kam College Construction ka seplai in, Kawlpi khuasung, Pinlone Ward, Bochoh lan, ka innuh ah ka giak hi. Nisimin, khuavak peuh leh nasep pai in, ni tumkuan dingh ta ciangin ka ciah tawntung hi. Nikhat, nasep ka manzawh ciang, nitum dektak, vaikamh zo in mawtaw khawng apai suk, a pato zong om nawnlo, daizo ta, ka ciahsuk leh, Sing-unau leh Phaai ki kalaa lei bul(Phaai lam), lam laaizangh ah, Sakolleeng khat nana khawlin, a kimah Siapi Vul Za Thang zi leh numei khanglai 2- nana khawl liing-leeng uh hi.

Ke’n zong ka mawtaw khawlsakin ka dot leh, a sakolleeng zawwlpi uh ki tanhaa, acihna dinguh theilo aa a cimawhin, op aa a omlel nana hiuh hi. Amau bel, nisan lai pek aa ana tuaci omzo uh na hi hi.

Siapipa’ zi ka dot leh; A tanu khat in a sauvei nailo in pasal nei ahihna; tuanu in a pasal tawh Tahan a innuh ah teenguh ahihna; aki tenzawh a sawtlo in a pasal in sihsan ahihna; a pasal sihzawh a sawtlo in a zi(a tanu) si leuleu ahihna; tua a tanu sih laitakin Zangkungaa om a sanggamnu in delhmanlo ahihna; tua ni in a sanggamnu in Zangkung panin Vanleng tawh a ciahto, vanleeng kuanah amau na dawnin, sakolleeng tawh a sanggamnu thaan, Phaai khuagal aa mualtungah pai in daaihawh dinguh ahihna uh tawh tuabang teng tuak a hihna uh hong gen hi.

Ni lah tumta, khua amial ding hiaa, vaikamh zo in kuamah a paisuk a paito cih omnawnlo, khua tawh ki gamla gam simthamh hi lailai. Amau lah, nopna hi peuhmahlo, khitui naptui tawh ki diahpiik peekin aki diikdiik kawmuh. Hihbang avai uh ngaihsut hak kasak sak mahmah hi. Kei tawh ki tuak khellkhelllo hile uh, bang a cita um, ka ngaihsut sakngam keiliang hi. Kei zong, ngaihsunsun nawnlo in, sianu hehnemin, bangmah a lunguh a himawh lohna dinguh, keiman aki sambang bangin huh ding ka hihna kagenzawh ciangin, a nuta un thaanah ka kapihto hi.

Thaan ka tunun, khuamial zota hi. A thaanin lei aki vuklel hiaa, a lei vuum bek aki mu mialmial hi. A nuta un, mawtaw tung panin a tuaksuk zong hi nawnlo, a thaan lei vuum tung ki den na sukpah, a leivum mah pomsuk in a kappah au-au uh hi.

Ke’n zong, ka hehnem ding sangsikin, “ kap vuau! kapkap mah vuau! na awmsunguhaa teng abei dongin kap vuau!,” ka ci zawtham hi. Banghang hiam cih leh, a awmsung aa ahuu, a bingteng beilo pi’n tawp leuh, a nua na dingaa, kha-khamh veilawhin, thuakhak zawkaan lai ding ahih man a hi hi.

Tuabangaa gamsimtham, mualtung, gamdai khipkhep, khuamial lakpi aa a kap ngeuu-ngeuu, kuamah a dawng ding omlo, lei-hik leh khuangbai haamte bekin adawng, a zate in ahih leh, lamdang a sak bekuh hikei, a khua-sikhmul uh tholo in a omkei ding hi.

Kei zong, tawlpi khatmah ka ngakzawh ciangin, a tho omkei leh, zan tha paai bang a kapzo ding zahdong in a omthong uh hi. Tuaciangin kei zong, a tuunglimh aa ka ngaihsut masakna khiam leuleu in;

Tu aa ciang tawh ki lungkim sakin, phasak ta un. Ki it, ki ngai hang ih cih hangin, sihpih zo saaplo ding hi saap ih hihteh, ki lungkim sakun, ci’n a khutun ka kaihkhiat liang takpi ciangin, amau zong hong zuipah uh hi. Tua hunin, 8:00PM bang hita dingin ka um hi. Khua bel a zing bikbek mah ahi hi. Tuabang teng tawh ciahkikin, Tahan, a tanute inn dong ka kha hi. Kei zong tu nawnlo in, ka ciahsan vinghvengh leh, inn ka tunin 9:30PM ahi ta hi. A khasiat huai dan ka ngaihsut ciangin, zanthapaai ka ihmut theih lohlawh hi.

THU KHUPHNA

Hih thute khempeuh ngaihsunin ka gawmtuah ciangin; Napolean Bonaparte in, “ I went out to seek for VIRTUE; I din’t find VIRTUE, but GLORY at the end,”. (Goettee) acih ka phawkmah mah hi.

Acknowledgement

Hih, a tungaa aki at thute in, keima hih, sep, bawl; muh, theih, zaak baanah, ka tuak, thuak, sinna panaa ka theihtawwmna tawh ka at ahi hi. (Excerpts from Pau Za Mung’s Memoirs)