Akhe ah Buddhist Tattooo hangin Kawlgam pan ki hawlkhia

Akhe ah Buddhist Tattooo hangin Kawlgam pan ki hawlkhia

Canadian Professor khat Kawlgam ah Vacation in ahawhpak hi a, akhe tungah Buddhist Tattoo lim kisuai kumpi thunei te’n amuh uh ciangin Kawlgam pan hawlkhia uh cihi.

Tuapa pen Jason Polley kici minnei khat hi a, Hong Kong Baptist University ah English Teacher asemkhat ahihi.

Jason Polley ii genkhiatna ah hih Tattoo vaitawh kisai buaina apianna pen Kawlgam ah kalawmnu Margaret Lam tawh kahawh uh a, kakhe tungah Buddhist Tattoo lim kisuai amuh ciangin Local khatin Photo hongzaih in, Facebook tungah nakoih cihi.

Tua Facebook Photo pen Southeast Asia gamsung tengah kizelgawp a, Buddhist leh Muslim abuaimahmah laitak ahihtawh Comment tuamtuam kipia in kibuai mahmah hi. Adiakdiak in Kawlgam ah kawngnuaisiah pen asiangtholo in aki ngaihsun hi a, khetung sese ah Buddhist Tattoo akimuh ciangin Buddhist biakna te’n thuakzolo uhhi.

Bangkok ah Jason Polley Interview akibawlna ah “Inle Lake ah ka omlaitak un kumpi thunei Officials mi 15 ka Hotel sungah honglut uh a, thudotna hongnei uhhi” cihi.

Ataktak in hipa zong Buddhist mikhatmah nahi a, ahi zongin amazuih Buddhist pen Mahayana Buddhist ahihi. Kawlgam aom Buddhist te zuihpen Theravada Buddhist ahihi.

ZD Sawltak