Airport sung kisuamlupna ah akihel mi 4 te Malaysia pan taikhiakhin

Airport sung kisuamlupna ah akihel mi 4 te Malaysia pan taikhiakhin

Malaysia, Kuala Lumpur International Airport sungah akisuamlum North Korean papen ama gammipih te mahin asuamlum hiding cih zanni Sunday (Feb 19) ni in Malaysia Police te’n genkhiata uhhi. Airport sungah aki suamlumpa pen Kim Jong Nam kicipa hi a, tulaitak North Korea gamkaipipa Kim Jong Un tawh unau, pakibang nukibanglo uh ahihi.

Kim Jong Nam suamlupna ah akihelding in aki ummawh mi 4 tepen aki suamlupni (Feb 13) ni mahin KLIA2 panin vanleng tawh lengkhiakhin uh a, North Korea khuapi, Pyongyang City tungkhinta ci’n zanni in Senior Police khatin Media te tungah genkhia hi.

North Korea ah aciahkhiakhin tepen a 4 un pasal vive hi a, February 17 ni in Pyongyang City tungkik khinta uh kici hi. Malaysia, Kuala Lumpur International Airport (KLIA2) sungah Kim Jong Nam aki suamlupkhit phetin tua mi 4 te vanleng tawh Kuala Lumpur panin Indonesia khuapi Jakarta City ah lengkhia uhhi. Indonesia khuapi Jakarta panin Dubai (United Arab Emirates) – Vladivostok (Russia) – Pyongyang City (North Korea) cihbangin abanban in vanleng tawh lengsuak uh cihi.

Deputy Inspector-General of Police Tan Sri Noor Rashid Ibrahim kicipa in zanni Press Conference ah agenkhiatna ah tua muanmawh Suspect mi 4 tepen akum uh 33 panin 57 kikal hiding uh cihi.

Vanlengtual ah Kim Jong Nam aki suamlupkhit phetin tua mi 4 te Malaysia gampan in pusuak khiakhin cih ka gencian theihi. Tua mi 4 tepen akhualzinna Passport uhpen Diplomatic Passports cihbang hituanlo a, amawkmawk Passport temah atawi uh ahihi.

Hihte pen matkhiattheih nadingin Interpol (International Criminal Police Organization) tetawh sepkhop kulding ci’n genkhia hi.

Kim Jong-nam murder: Police still hunting for four more suspects

Kim Jong Nam kithahna hangin Malaysia gamsung ahzong mi 4 kiman khin hi.

More: KL Airport sung kisuamlupna hangtawh mikhat kimatbeh leuleu

Siluang pen Kualua Lumpur General Hospital ah Post-mortem kibawlkhin a, ahi zongin Pathology leh Toxicology Tests cihte ki ngaklai cihi. Tuate tungtawn in Kim Jong Nam ii sihna taktak ki gencian theipanding cihi. ZD Sawltak #zomidaily